भूपेन्द्र जिसी, काठमाडौं

एक समय थियो, नेपाली लेगस्पिनर सन्दीप लामिछानेलेलाई अन्तर्राष्ट्रिय फ्रेन्चाइज लिग खेल्न भ्याई नभ्याई हुन्थ्यो । फ्रेन्चाइज लिगसँगै राष्ट्रिय टोलीको व्यस्तता पनि त्यति नै थियो । राष्ट्रिय टोलीको अन्तर्राष्ट्रिय खेलको कारण सन्दीपले थुप्रै पटक फ्रेन्चाइज लिगबीचमै छाडेर स्वेदश फर्किएका छन् । तर पछिल्लो समय सन्दीप फ्रेन्चाइज लिग र राष्ट्रिय टोली दुवैबाट खालि बनेका छन् ।

सन्दीपले इंग्ल्यान्डमा विहीबार सुरु हुने द हन्ड्रेड प्रतियोगिता पनि गुमाउने भएका छन् । असार २४ मा द हन्ड्रेड खेल्न इंग्ल्यान्ड गएका सन्दीप बेलायत सरकारको नियम अनुसार १० दिन क्वारेनटाइन अवधि सकेपछि टिएर ५ भिसाको समस्याका कारण नेपाल फर्कनुपर्ने भएको छ । सन्दीप द हन्ड्रेडमा ओभल इन्भिन्सिबल्समा झण्डै एक करोड नेपाली रुपैयाँमा अनुबन्ध भएका थिए ।

पछिल्लो समय सन्दीपको लागि निकै खराब सावित बनेको छ । माघ पहिलो साता (जनवरी तेस्रो साता) इन्डियन प्रिमियर लिग (आइपिएल) मा दिल्ली क्यापिटल्सले सन्दीपलाई टोलीबाट फुकुवा (रिलिज) गरेको थियो । दिल्लीले न्युनतम वार्षिक मूल्य २० लाख लगातार तीन वर्ष राखेपछि टोलीबाट फुकुवा गरेको थियो । दिल्लीको फुकुवापछि अक्सनमा गएका सन्दीपलाई कुनैपनि टोलीले मूल्य लगाएनन् । सन्दीपको व्यवसायिक यात्रामा लागेको त्यो ठूलो धक्का थियो ।

आइपिएल अक्सनमा नबिकेपछि सन्दीपले फेब्रुअरी महिनामा पाकिस्तान सुपर लिग (पिएसएल) खेल्ने अवसर पाएका थिए । पिएसएल २०२१ मा अफगानिस्तानका स्पिनर राशिद खानको अन्तर्राष्ट्रिय खेलको कारण राष्ट्रिय टोलीमा फर्किपछि लाहोर कलन्दर्सले सन्दीपलाई उनको स्थानमा मौका दिएको थियो । तर कराँची गएको ६ दिनमै खेलाडीमै कोरोना देखिएपछि पिएसएलनै स्थगित हुन पुग्यो । त्यसैले एक साता हुँदै नेपाल फर्किनु भएको थियो ।

कराँचीबाट नेपाल आएको २४ घण्टा नहुँदै सन्दीपले काठमाडौं मेयर कप एकदिवसिय प्रतियोगितामा काठमाडौं–११ कप्तानी पाएका थिए । उक्त प्रतियोगितमा सन्दीपले अनुशासित बलिङसँगै ब्याटिङमा पनि आक्रामक सटका साथ समर्थकलाई आर्कषित पारेका थिए । काठमाडौं मेयर कपपछि क्यानले टोली बन्द प्रशिक्षणमा बोलाएको थियो । तर कोरोना कारण सिरिज स्थगित हुँदा बन्द प्रशिक्षण दुई हप्ता नहुँदै स्थगित भएको थियो ।

लगत्तै मार्च महिनामा सन्दीप पहिलो पटक इंग्ल्यान्डको टि२० ब्लास्ट खेल्ने पक्का भएको थियो । सन्दीपलाई वोर्सेस्टरशायले अनुबन्ध गरेको थियो । तर भिसा समयमै नपाउँदा सन्दीपले टि२० ब्लास्ट गुमाउनु परेको थियो । सन्दीपले भिसा कारण गुमाएको टि२० ब्लास्ट पहिलो विदेशी प्रतियोगिता थियो ।

भिसा ढिलो हुनुमा सन्दीपले सरकारलाई बढी दोष दिएका थिए । पछि सन्दीप त्यहि टि२० ब्लास्टको भिसा प्रक्रियामार्फत द हन्ड्रेड खेल्न इंग्ल्यान्ड पुगेका थिए । द हन्ड्रेड खेल्न जानुअघि उनी असारमा पहिलो साता क्यानले स्पेन भ्रमणको टोली बन्द प्रशिक्षणमा बोलाएको थियो । तर बन्द प्रशिक्षणमा बोलाएको दुई दिनमै स्पेन भ्रमण कोरोना कारण स्थगित भएपछि सन्दीप द हन्ड्रेड खेल्न गएका थिए ।

सन्दीपले ईसीबीको निर्देशन अनुसारनै टिएर ५ भिसाका साथ इंग्ल्यान्ड आएको बताएका छन् । भिसा कारण खेल्न नपाउनुमा ईसीबीलाई दोष दिएका छन् । एक महिना अन्तरमा सन्दीपले भिसाको कारण इंग्ल्यान्डका चर्चित टि२० ब्लास्ट र द हन्ड्रेड गुमाउने भएका छन् ।

गत वैशाखमा घरेलु मैदानमा सम्पन्न नेपाल, नेदरल्यान्ड्स र मलेसियाबीचको टि२० आई त्रिकोणात्मक सिरिजमा सन्दीपले १३ विकेट लिँदै सानदार प्रदर्शन गरेका थिए । आइपिएलमा अनुबन्ध नभएपछि सन्दीपलाई अन्य विदेशी लिग र नेपालको अन्तर्राष्ट्रिय खेलमा उत्कृष्ट प्रदर्शन गर्नुपर्ने दबाब पनि छ । तर सन्दीपले खेल खेल्ने अवसरनै पाएका छैनन् ।

सन्दीपले पछिल्लो पटक गत माघमा होबार्ट हरिकेन्सबाट बिग ब्यास लिग खेलेका थिए । होबार्टबाट ८ खेलमा ८ विकेट लिएका थिए । पछिल्लो समय लगातार फ्रेन्चाइज लिगमा मौका पाएर पनि अन्तिम समयमा खेल्न नपाउनु यो सन्दीपका लागि राम्रो संकेत भने होईन । यसले सन्दीपको करिअरको खराब समय चलि राखेको संकेत देखाउछ । सन्दीपलाई पनि यहि भनेर चित्त बुझाउन बाहेक अन्य विकल्प पनि छैन ।

यो पनि पढ्नुहोस : क्रिकेटका पाँच अविश्वसनिय घटनाहरु