काठमाडौं (हाम्रो खेलकुद) – नेपाली क्रिकेट टोलीका तीव्र गतिका बलिङ अलराउन्डर महबुब आलमले राष्ट्रिय र अन्तर्राष्ट्रिय दुवै क्रिकेट करिअरबाट विश्राम लिने भएका छन् । झण्डै दुई दशक नेपाली टोलीबाट खेलेका महबुबलाई राष्ट्रिय सम्मानका साथ बिदाइ गर्नुपर्ने माग प्रदेश २ ले नेपाल क्रिकेट संघ (क्यान) सँग माग गर्ने जनाइसकेको छ ।

४० वर्षिय महबुब पनि राम्रो बिदाईको साथ विश्राम लिन चाहेको बताउँछन् । बायाँ हाते महबुब नेपाली क्रिकेटमा स्वींग र आक्रामक ब्याटिङका चर्चित अलराउन्डर हुन् । महबुब नेपाली क्रिकेटका एक सफल अलराउन्डर हुन् । ‘मैले दुई वर्ष पहिलादेखि सन्न्यास लिने सोच राखेको थिएँ । कोरोनाले गर्दा सन्न्यास कार्यक्रम रोकिएको थियो । अहिले फेरि प्रदेश–२ लाई भन्दै क्यानलाई बिदाईको लागि पत्र पठाउन लगाएको थिएँ’, महबुबले हाम्रो खेलकुदसँग कुरा गर्दै भने ।

‘नेपाली क्रिकेट अहिले राम्रो अवस्थामा छ । हामी अहिले निकै राम्रो उचाईमा जादैछौं । युवा खेलाडी राम्रो छन् । यसले नेपाली क्रिकेटको भविष्य निकै राम्रो देखिन्छ’, महबुबले भने ।

‘मलाई खुसी लागिरहेको छ । दुई दशक नेपालको लागि खेल्न पाएँ । अन्तर्राष्ट्रिय स्तरमा नाम लेखायौं । मैले गिनिज बुकमा नाम लेखाए । त्यसले पनि नेपाली क्रिकेटलाई चिनाउँछ । क्यान हुँदा खेल सुरुवात र अन्त्य गर्न पाउँदा अझ खुसीको लागेको छ’, महबुबले भने ।

‘मलाई बिदाई राम्रो हुन्छ जस्तो लागेको छ । मेरो नेपाली क्रिकेटमा जुन योगदान छ । त्यसले गर्दा राम्रो बिदाई हुने विश्वास राखेको छु । क्यानमा राम्रो मान्छे र सबै क्रिकेट बुझेका पनि छन्’, महबुबले भने ।

त्यसैमा उनले थपे, ‘मेरो माग क्यानले राम्रो सम्मानका साथ बिदाई गरिदियोस् भन्ने हो । क्यानले जसरी गर्छ त्यसमा म खुसी खुसीका साथ बिदाई हुनेछु । त्यो अन्तर्राष्ट्रिय खेल होस् वा राष्ट्रिय, मेरो माग कुनै छैन । तर सम्मान भने राम्रो हुनुपर्छ । विनोद दासले राम्रो सम्मानका साथ बिदाई पाउनु भयो । म पनि त्यस्तै चाहन्छु ।’

‘मैले आफ्नो जीवन पूरै क्रिकेटमा बिताए । आगमी दिनमा पनि म नेपाली क्रिकेटमै जोडिएको हुन्छु । पूरा जीन्दगी क्रिकेटमा सुम्पिएको छु । अब पनि क्रिकेटमा नै लाग्छु । खेल्न छोडेपछि कुनै न कुनै भूमिकाबाट म नेपाली क्रिकेटबाट जोडिन चाहन्छु’, उनले भने ।

महबुबले प्रशिक्षकको रुपमा काम गर्न बढी इच्छा भएको बताए । ‘मैले अब खेल्ने भन्दापनि सिकाउने दिन आयो । क्यानले लेभल वान सिकाउँदै छ । प्रशिक्षकको रुपमा हुन्छु । प्रशिक्षक भएपछि जिम्मेवारी पनि हुन्छ । मैले अहिले सम्म सिकेको जतिपनि कुरा छ त्यो अव जुनियरलाई सिकाउन चाहन्छु’, महबुबले सन्न्यास पछिको योजना बताए ।

सबैको साथ र सहयोगलेनै १० विकेटको कीर्तिमान बनाउन सम्भव भएको महबुब बताउँछन् । ‘मेरो कप्तान विनोद दास अहिले क्यानको म्यानेजर हुनुन्छ । सँगै क्रिकेट खेलेका रोशन दाई क्यानको कोषाध्यक्ष हुनुन्छ । चतुरबहादुर चन्द लगायत सबै क्रिकेट र खेलाडीलाई बुझेका मान्छे भएकाले मैले सोचेको जस्तो बिदाई हुन्छ होला जस्तो लागेको छ । राष्ट्रिय बिदाई पाउनु भनेको धेरै गर्वको कुरा हो । त्यो धेरै कमले मात्र पाउँछन् । मलाई सन्न्यास लिदा लिन पाउँदा पनि गर्व लागेको छ’, महबुबले भने ।

महबुब प्रदेश–२ का कप्तानको रुपमा घरेलु क्रिकेटबाट विश्राम लिनेछन् । महबुबले नेपालबाट सन् २००० मा जापानविरुद्ध डेब्यू गरेका थिए । २००८ मा मोजाम्बिकविरुद्ध मेहबुबले ७.५ ओभरमा १ मेडन सहित १२ रन खर्चेर १० विकेट लिदै गिनिज बुकमा नेपाल लेखाएका थिए । उनी सिमित ओभरको अन्तर्राष्ट्रिय खेलमा १० विकेट लिने विश्वको एक्लो खेलाडी हुन् ।

टि२० क्रिकेटमा उनले २०११ मा साउदी अरेबियाविरुद्ध ४१ बलमा ५ चौका र ६ छक्का सहित ८८ रनको उत्कृष्ट इनिङ खेलेका थिए । जुन नेपाली क्रिकेटबाट टि२० खेलमा बनेको सर्वाधिक रन हो । तर २०१९ मा टि२० आईमा पारसले सिंगापुरविरुद्ध १ सय ५ र ज्ञानेन्द्र मल्लले भुटानविरुद्ध १ सय ६ रन बनाएका थिए ।

महबुब घरेलु क्रिकेटमा दोहोरो शतक प्रहार गर्ने पहिलो र एकै खेलमा सर्वाधिक रन बनाउने ब्याट्सम्यान समेत हुन् । महबुबले २००५ मा वीरेन्द्र स्मृति क्षेत्रिय छनोटमा सप्तरीबाट उदयपूरविरुद्ध १ सय २३ बलमा २६ चौका र १८ छक्का सहित २ सय ५६ रनको विष्फोटक इनिङ खेलेका थिए ।

उनीपछि गतवर्षमात्र प्रधानमन्त्री कप प्रतियोगिता अन्तर्गत बागमती प्रदेश छनोटमा आदील खानले ललितपुरबाट त्रिभुवन विश्वविद्यालयबाट १ सय २१ बलमा १५ चौका र १५ छक्का सहित २ सय १ रनको दोहोरो शतकीय इनिङ खेलेका थिए । प्रथम श्रेणीको खेलमा महबुबले २००४ मा मलेसियाविरुद्ध डेब्यू गरेका थिए । लिष्ट ए मा २०१५ मा पपुवा न्युगिनीविरुद्ध डेब्यू गरेका थिए । मेहबुबले नेपालबाट अन्तिम पटक २०१७ मार्चमा बंगलादेशमा सम्पन्न एसिसी इमर्जिङ टिम्स एसिया कप खेलेका थिए ।

नेपाली क्रिकेट इतिहासका ५ रोमाञ्चक जित

नेपाली खेलाडीका ४ विश्व कीर्तिमान जो तोडिन लगभग असम्भव!

नेपाली क्रिकेटका १० उत्कृष्ट क्षण