काठमाडौं (हाम्रो खेलकुद) – नेपाली राष्ट्रिय क्रिकेट टोलीका पूर्व कप्तान तथा सर्वाधिक सफल खेलाडी पारस खड्काले अन्तर्राष्ट्रिय क्रिकेटबाट सन्न्यासको घोषणा गरेका छन् । पारसले मंगलबार बिहान सामाजिक सञ्जालमार्फत सन्न्यासको घोषणा गरेका हुन् ।

पारसले नेपालका लागि खेल्नु आफ्नो जीवनको सर्वश्रेष्ठ उपलब्धि भएको बताएका छन् । ‘सम्पूर्ण नेपाली क्रिकेट समर्थक, सरोकारवाला, प्रति कृतज्ञता ब्यक्त गर्दै अन्तर्राष्ट्रिय क्रिकेटबाट सन्न्यास लिने निर्णय गरेको छुँ, नेपालका लागि खेल्नु मेरो जीवनको सर्वश्रेष्ठ उपलब्धि हो’, पारसले सन्न्यास पत्रमा लेखेका छन् ।

सन् २००४ मा मलेसियाविरुद्ध डेब्यू गर्दै अन्तर्राष्ट्रिय क्रिकेट यात्रालाई अघि बढाएका पारसले नेपालबाट अन्तिम खेल २०२० मार्च ४ मा थाईल्यान्डविरुद्ध खेलेका थिए । ‘२००२ मा १५ वर्षको हुँदा सुरु गरेको क्रिकेट यात्रा साथ, समर्थन, माया, हौसला, दिने प्रशिक्षकहरु, प्रशंसकहरु, सरोकारवालाहरु, मिडियाकर्मी, मेरो परिवार र साथीपर्ति म सदैव ऋणि रहने छु’, पारसले सन्न्यास लिँदै भनेका छन् ।

पारसले नेपालका लागि १० ओडिआई, ३३ टि२० आई, २ प्रथम श्रेणी, ४६ लिष्ट ए र ५६ टि२० खेलेका छन् । पारसले ओडिआईमा २०१८ अगष्ट ए मा नेदरल्यान्ड्सविरुद्ध डेब्यू गरेका थिए । अन्तिम ओडिआई खेल घरेलु मैदानमा अमेरिकाविरुद्ध २०२० फेब्रुअरी १२ मा खेले । पारसले ओडिआईमा एक शतक सहित कुल ३ सय १५ रन बनाएका छन् ।

नेपालबाट ओडिआईमा शतक प्रहार गर्ने पारस एक्लो खेलाडी हुन् । पारसले २०१९ मा यूएईविरुद्ध जनवरी २८ मा १ सय १५ रनको ऐतिहासिक शतकीय इनिङ खेलेका थिए । पारसले ओडिआईमा ९ विकेट लिदा उत्कृष्ट प्रदर्शन ४–२६ छ ।

‘क्रिकेटको रुपमा मैले आफ्नो मन, वचन र कर्मले कर्तव्यनिष्ठ भई देश र नेपाली क्रिकेट जगतको उत्थानको लागि सदैब आफ्नो भूमिका निर्वाह गरें । मैले देखेको सपना नेपाली क्रिकेटको उन्नती हो । तर यसको लागि सम्पूर्ण क्रिकेट समाज र सरोकारवालाहरुको संयुक्त प्रयासको आवश्यक छ’, पारसले सन्न्यास लिँदै भनेका छन् ।

त्यसैमा थपेका छन्, ‘इमानदारिताको साथ काम गर्ने हो भने हामीले नेपाली क्रिकेटलाई अवश्य नयाँ उचाईमा पुर्याउछौं’ ।

पारसले अन्तर्राष्ट्रिय यात्रा आफ्नो टुङ्गिएपनि क्यान प्रशासन हुँदै क्रिकेट विकासमानै लाग्ने विगतदेखि बताउँदै आएका छन् । नेपाली क्रिकेट विकासको लागि आफ्नो सपना भने अझै बामे सर्दै गरेको बताउँछन् ।

पारस नेपाली क्रिकेटका सर्वाधिक सफल खेलाडी र कप्तान हुन् । २००९ देखि २०१९ सम्म नेपाली क्रिकेट टोलीको कप्तानी समालेका थिए । पारसको कप्तानीमा नेपालले पहिलो पटक २०१० मा घरेलु मैदानमा आइसिसी डिभिजन पाँचको उपाधि जितेको थियो । २०१४ मा पहिलो पटक टि२० विश्वकप खेलेको थियो । पारसको प्रदर्शन र कप्तानी दुवै उत्कृष्ट रहँदा नेपालले यादगार प्रदर्शन गरेका थियो ।

२०१८ मा पारसले आफ्नो कप्तानीमा नेपाललाई ओडिआईमा मान्यता दिलाउँदै थप नयाँ उचाईमा पुर्याएका थिए । पारस टि२० आई क्रिकेटमा लक्ष्य पछ्याउँदा शतक प्रहार गर्ने विश्वको पहिलो कप्तान हुन् । उनले सिंगापुरविरुद्ध २०१९ सेप्टेम्बरमा १ सय ५ रनको ऐतिहासिक शतकीय इनिङ खेलेका थिए । नेपालबाट टि२० क्रिकेट इतिहासमा शतक प्रहार गर्ने पहिलो खेलाडी हुन् ।

पारसले ३३ टि२० आई खेलमा १ शतक र ४ अर्धशतक सहित कुल ७ सय ९९ रन बनाएका छन् । ८ विकेट लिएका छन् । लिष्ट ए मा पारसले ३ शतक र ९ अर्धशतक सहित कुल १ हजार ४ सय ९७ रन बनाउँदा २६ विकेट लिएका छन् । पारसले टि२० क्रिकेटमा कुल २८ विकेट लिदा कुल १ हजार ३ सय १७ रन बनाएका छन् ।

यो पनि : पारसले सन्न्यास लिनुका पाँच कारण