काठमाडौं (हाम्रो खेलकुद) – चौथो संस्करणको एभरेष्ट प्रिमियर लिग (इपिएल) को मुख्य प्रायोजकका रुपमा बजाज पल्सर रहने भएको छ । चौथो संस्करणको इपिएल असोज ९ देखि २३ सम्म टियु मैदानमा हुँदै छ ।

इपिएलले काठमाडौंमा सोमबार एक पत्रकार सम्मेलन गर्दै आफ्नो मुख्य प्रायोजक बजाज पल्सर रहेको जनाएको छ । गोल्छा ग्रुपका अध्यक्ष शेखर गोल्छा र इपिएलका प्रबन्ध निर्देशक आमिर अख्तरले सम्झौता पत्रमा हस्तक्षर गरेका थिए । सम्झौता एक वर्षको हुने छ । आयोजकले कोरोना महामारीको कारण टेलिभिजनलाई लक्षित गर्दै सबै स्वास्थ्य प्रोटोकललाई पालना गरेर इपिएल आयोजना गर्ने जनाएको छ ।

‘बजाज पल्सरलाई सधैं नेपाली युवाहरुले माया गरि राख्नु भएको छ । पछिल्लो समय क्रिकेट पनि युवाहरुको जोश बनेको छ । यसैले हामीले नेपालको सबैभन्दा ठूलो क्रिकेट प्रतियोगिता इपिएलको लागि मुख्य प्रायोजक गरेका छौं’, सम्झौतापछि गोल्छा ग्रुपका अध्यक्ष शेखरले भने ।

वेस्टइन्डिजका स्टार अलराउन्डर कार्लोस ब्रेथवेट र पाकिस्तानका अनुभवी ब्याट्सम्यान शोएब मलिकले इपिएल खेल्ने आयोजकले सार्वजनिक गरेको छ । तर कुन टोलीबाट भने खुलाएको छैन । प्रतियोगिताको लागि आयोजकले तीव्र तयारी अगाडि बढाएको छ । ठूला नाम पनि सार्वजनिक हुन थालेका छन् । यस सिजनको इपिएल पाकिस्तानका स्टार अलराउन्डर शाहिद अफ्रिदीले काठमडौं किंग्स–११ बाट खेल्ने छन् ।

आयोजकले प्रतियोगिता ट्रफी पनि सार्वजनिक गरेको छ । प्रतियोगिताम विराटनगर वारियर्स, काठमाडौं किंग्स ११, चितवन टाइगर्स, ललितपुर प्याट्रियट्र्स, भैरहवा ग्ल्याडियटर्स र पोखरा राइनोज गरि ६ सहरका ६ फ्रेन्चाइज टोली छन् ।

पछिल्लो पटक २०१८ को इपिएलको फाइनलमा ललितपुरले भैरहवालाई १४ रनले हराउँदै उपधि जितेको थियो । त्यसपछि नेपालको ब्यस्त अन्तर्राष्ट्रिय कार्यतालिका र कोरोना महामरीको कारण इपिएल स्थगित हुँदै आएको थियो ।

यो पनि : इपिएलले पायो नेपाली खेलकुदकै सर्वाधिक ठूलो प्रायोजन