काठमाडौं (हाम्रो खेलकुद) – श्रीलंका क्रिकेट टोलीका विकेटकिपर ब्याट्सम्यान तथा विश्वकप च्याम्पियन दीनेश चान्डिमलले चौथो संस्करणको एभरेष्ट प्रिमियर लिग (इपिएल) खेल्ने भएका छन् । चान्डिमलले शरद भेषावकरको कप्तानीमा रहेको भैरहवा ग्ल्याडियटर्सबाट इपिएल खेल्ने छन् ।

भैरहवाले सामाजिक सञ्जाल मार्फत चान्डिमल इपिएल खेल्ने लागेको जनाएको छ । भैरहवाले सिधै नाम नतोकेपनि टि२० विश्वकप च्याम्पियन र श्रीलंका सर्वाधिक कम उमेरमा टि२० कप्तानी गर्ने खेलाडी टोलीमा जोडिन लागेको सार्वजनिक गरेको छ । चान्डिमल श्रीलंका टि२० आई टोलीमा कप्तानी गर्ने सर्वाधिक कम उमेरका खेलाडी हुन् । सन् २०१३ मा चान्डिमलले बंगलादेशविरुद्ध २३ वर्ष १ सय ३३ दिनको उमेरमा कप्तानी गर्दै श्रीलंकाबाट टि२० आईमा नेतृत्व गर्ने सबैभन्दा कम उमेरका खेलाडी बनेका थिए ।

२०१४ को टि२० विश्वकप उपाधि श्रीलंकाले जित्दा चान्डिमल टोलीका सदस्य थिए । उक्त विश्वकप श्रीलंकाले फाइनलमा भारतलाई ६ विकेटले हराउँदै उपाधि जितेको थियो । भैरहवाले उक्त खेलाडीले श्रीलंकाबाट २४ बलमा ५२ रन जोडेको जनाएको छ । चान्डिमलले २०१५ को एकदिवसिय विश्वकपमा अष्ट्रेलियाविरुद्ध सिड्नीमा २४ बलमा ५२ रन जोड्दै रिटायर्ड हर्ट भएका थिए । चान्डिमल ओडिआईमा पनि श्रीलंकाबाट कम उमेरमा कप्तानी गर्ने खेलाडी हुन् । उनले २०१३ मा दक्षिण अफ्रिकाविरुद्ध ओडिआईमा कप्तानी गरेका थिए ।

चान्डिमलले श्रीलंकाबाट ६२ टेस्ट, १ सय ४९ ओडिआई र ५७ टि२० आई खेल खेलेका छन् । टि२० आईमा चान्डिमलले ५ अर्धशतक सहित कुल ८ सय ६८ रन जोडेका छन् । चान्डिमलले राजस्थान रोयल्सबाट आइपिएल खेलिसकेका छन् । ३१ वर्षिय विकेटकिपर ब्याट्सम्यान चान्डिमल श्रीलंका वर्तमान टोलीका प्रमुख ब्याट्सम्यान हुन् । चान्डिमलले श्रीलंका टेस्ट, ओडिआई र टि२० तीनै शैलीमा कप्तानी गरेका छन् ।

भैरहवा ग्ल्याडिएटर्सको प्रशिक्षकको रुपमा नेपाली राष्ट्रिय क्रिकेट टोलीका पूर्व प्रमुख प्रशिक्षक पुबुदु दसानायके छन् । भैरहवाले गत वर्ष ओमानका बायाँ हाते तीब्र गतिका बलर बिलाल खान, श्रीलंका स्पिनर जीवन मेन्डिस र बायाँ हाते अलराउन्डर मिलिन्डा श्रीवार्दानालाई अनुबन्ध गरेको थियो । बिलाल खान टि२० विश्वकपको कारण इपिएल नखेल्ने निश्चित छ । अन्य खेलाडीको बारे भैरहवाले कुनै जानकारी दिएको छैन ।

भैरहवाले यसअघि वेस्ट इन्डिजका विश्फोटक ब्याट्सम्यान ड्वेन स्मिथको पनि नाम सार्वजनिक गरेको थियो । भैरहवामा शरद भेषवाकर, प्रदीप ऐरी, मोहम्मद आरिफ शेख, कृष्ण कार्की, भुवन कार्की, दीपेश श्रेष्ठ, रोहित कुमार पौडेल, हरि शंकर झा, अभिनाश बोहरा, कुशल मल्ल, विकास आग्री र हिमान्शु दत्त स्वदेशी खेलाडीको रुपमा रहेका छन् ।

इपिएल असोज ९ देखि २३ सम्म टियु मैदानमा हुँदैछ । आयोजकले तयारी तीव्र रुपमा अगाडि बढाएको छ । काठमाडौं किंग्स ११ बाट पाकिस्तानका पूर्व क्रिकेटर शाहिद अफ्रिदी खेल्नेछन् ।

यो पनि : इपिएलले पायो नेपाली खेलकुदकै सर्वाधिक ठूलो प्रायोजन