एजेन्सी – कप्तान जो रुटको सानदार शतकको सहयोगमा इंग्ल्यान्डले भारतबिरुद्ध दोस्रो टेस्ट खेलको पहिलो इनिङमा अग्रता लिएको छ । तेस्रो दिनको खेल सकिँदा इंग्ल्यान्डले २७ रनको अग्रत लिएको छ । इंग्ल्यान्ड पहिलो इनिङमा १ सय २८ ओभरमा ३ सय ९१ रनमा अल आउट भयो ।

इंग्ल्यान्डका कप्तान जो रुट ३ सय २१ बलमा १८ चौका सहित १ सय ८० रनमा अविजित रहँदै उत्कृष्ट शतकीय इनिङ खेले । रुटले एकतर्फबाट विशाल इनिङ खेल्दा अर्कोतर्फबाट राम्रो भने साथ पाउन सकेनन् । रुटको यो टेस्ट करीअरको २२ औं शतक हो । रुटले आफ्नो टेस्ट करीअरको नौं हजार रन पनि पूरा गरेका छन् । रुट टेस्टमा इंग्ल्यान्डमा एलिस्टर कुकपछि सर्वाधिक रन बनाउने खेलाडी हुन् ।

इंग्ल्यान्डबाट एकै वर्ष टेस्टमा सर्वाधिक पाँच शतक प्रहार गर्ने पहिलो कप्तान पनि बनेका छन् । यसअघि कप्तानको रुपमा इंग्ल्यान्डबाट सन् १९९० मा ग्राहम गुच, माइकल एथरटनले १९९४ र एन्ड्र्यू स्ट्रासले २००९ मा चार-चार शतक प्रहार गरेका थिए । ओपनर डोम सिब्ले ११ र हसिब हमीद गोल्डेन डक आउट भए ।

मोहम्मद शिराजले १५ औं ओभरमा लगातार दुई विकेट लिएका थिए । तेस्रो विकेटका लागि रुट र रोरी बन्र्सले ८५ रनको महत्वपूर्ण साझेदारी गरेका थिए । दोस्रो दिनको अन्तिम समयतिर बन्र्सलाई मोहम्मद शामीले ४९ रनमा एलबिडब्लू आउट गरे । उनले १ सय ३६ बलमा ७ चौका प्रहार गरे ।

कमजोर सुरुवात गरेको घरेलु टोली इंग्ल्यान्डलाई चौथो विकेटका लागि रुट र जोनी बेयरस्टोले १ सय २१ रनको महत्वपूर्ण साझेदारी गर्दै बलियो योगफलतर्फ अघि बढाएका थिए। बेयरस्टोलाई मोहम्मद शिराजले कप्तान विराट कोहलीबाट ५७ रनमा क्याच गराउँदै चौथो सफलता दिलाए । बेयरस्टोले १ सय ७ बलमा ७ चौका प्रहार गरे ।

त्यसपछि भने रुटले राम्रो साथ पाउन सकेनन् । पाँचौं विकेटका लागि विकेटकिपर जस बटलरसँग ५४ रनको साझेदारी गरेका थिए । बटलरलाई ईशान्त शर्माले २३ रनमा बोल्ड आउट गरे । छैटौं विकेटका लागि रुटले मोईन अलीसँग ५८ रन जोड्दै टोलीलाई अगाडि बढाएका थिए । ईशान्तलेनै अलीलाई २७ रनमा विराट कोहलीबाट क्याच आउट गराए ।

ईशान्तको बलमा साम करन गोल्डेन गक आउट भए । ओली रोबिन्सन ६ र मार्कवुड ५ रनमा रन आउट भए । अन्तिम विकेटको रुपमा जेम्श एन्डरसन आउट भएका थिए । भारतका तीव्र गतिका बलर मोहम्मद शिराजले सर्वाधिक चार विकेट लिए । ईशान्त शर्माले तीन र मोहम्मद शामीले दुई विकेट लिए ।

त्यसअघि लर्ड्स क्रिकेट मैदानमा टस हारेर ब्याटिङको निम्तो पाएको भारत १२६.१ ओभरमा ३ सय ६४ रनमा अल आउट भएको थियो । भारतका ओपनर लोकेश राहुलले २ सय ५० बलमा १२ चौका र १ छक्का सहित सर्वाधिक १ सय २९ रनको योगदान दिए । राहुलले यो टेस्ट करीअरको छैटौं शतक हो ।

भारतलाई ओपनर रोहित शर्मा र लोकेश राहुलले ४३.४ ओभरमा १ सय २६ रनको शतकीय साझेदारीका साथ उत्कृष्ट सुरुवात दिलाएका थिए । तीव्र गतिका बलर जेम्स एन्डरसनले रोहितलाई ८३ रनमा बोल्ड आउट गर्दै पहिलो विकेट लिन सफल भए । रोहितले १ सय ४५ बलमा ११ चौका र १ छक्का प्रहार गर्दै उत्कृष्ट सुरुवात दिलाएका थिए ।

एन्डरसनलेनै चेतेश्वर पुजारालाई ९ रनमा जोनी बेयरस्टोबाट क्याच आउट गराए । तेस्रो विकेटका लागि विराट कोहली र राहुलले १ सय १७ रनको साझेदारी गरेका थिए। दिनको अन्तिम समयमा विराट कोहली ओली रोबिन्सनको बलमा जो रुटबाट ४२ रनमा क्याच आउट भए ।

दोस्रो दिन इंग्ल्यान्डले बलिङमा उत्कृष्ट पूनरागमनका साथ भारतलाई मध्यम योगफलमै रोकेको थियो । एक समय २७८–३ को अवस्थामा रहेको भारतले बाँकी ८६ रन जोड्न ७ विकेट गुमाउँदै अल आउट भएको थियो ।

दोस्रो दिनको दोस्रो बलमै राहुललाई रोबिन्सनले सिब्लेबाट क्याच गराएका थिए । अजिक्या रहाणे जेम्श एन्डरसनको बलमा एक रनमा जो रुटबाट क्याच आउट हुन पुगे । पन्तले ५८ बलमा ५ चौका सहित ३७ रन जोडे । रविन्द्र जडेजाले १ सय २० बलमा ३ चौका सहित ४० रनको योगदान दिए ।

पन्त र जडेजा दुबै मार्कवुडको बलमा क्याच आउट भएका थिए । ईशान्त शर्मा ८ रनमा आउट हुँदा मोम्मद शामी, जस्प्रित बुमराह र मोहम्मद शिराजले खाता खोल्न सकेनन् ।

इंग्ल्यान्डका तीव्र गतिका बलर जेम्श एन्डरसनले सर्वाधिक पाँच विकेट लिए । ओली रोबिन्सन र मार्कवुडको नाममा दुई दुई विकेट रह्यो । स्पिनर मोईन अलीले एक विकेट लिए ।