काठमाडौं (हाम्रो खेलकुद) – युवा तीव्र गतिका बलर गुलशन झा ओमान भ्रमणको लागि नेपाली टोलीको १९ सदस्य बन्द प्रशिक्षणमा छन् । पहिलो पटक बन्द प्रशिक्षणमा परेका गुलशनको मुख्य हतियार बाउन्सर फ्याँक्ने क्षमता हो ।

गुलशन नेपाली क्रिकेटमा देखिएको धेरै भएको छैन । गत फागुनमा सम्पन्न काठमाडौं मेयर्स कप एकदिवसिय प्रतियोगितामा नेपाल पुलिस क्लबबाट दुई खेल खेलेका थिए । फाइनलमा एपिएफमाथि सहज जित निकाल्दै पुलिसलाई च्याम्पियन बनाउन गुलशनले ४ विकेट लिँदै प्लेयर अफ द म्याच चुनिएका थिए । तर उनको उत्कृष्ट बलिङको गति र बाउन्सर बलले दुई खेलनै बन्द प्रशिक्षणमा पुयाउन पर्याप्त रह्यो ।

गुलशन बन्द प्रशिक्षणमा धेरै कुरा सिक्ने अवसर पाएको बताउँछन् । ‘पहिलो पटक बन्द प्रशिक्षणमा परेको छु । धेरै कुरा सिक्न पाएको छु । मलाई कुनै दबाब छैन’, उनले हाम्रो खेलकुदसँग भने, ‘प्रशिक्षक ह्वाटमोर, कप्तान ज्ञानेन्द्र मल्ल, अन्य सबै साथीहरुले पनि राम्रो साथ र सहयोग गरि राख्नु भएको छ । प्रशिक्षक निकै सकरात्मक हुनुहुन्छ ।’

गुलशनले आफू बन्द प्रशिक्षणमा परेको जानकारी नेपाल क्रिकेट संघले सबैभन्दा पहिला दिएको बताउँछन् । ‘क्यानबाट टोलीमा परेको पहिला फोन आएको थियो । सुन्दा धेरै खुसी लाग्यो । टोलीमा पर्छु वा पर्दैन भन्ने थाहा थिएन । तर मैले आफ्नो तयारी भने गरि राखेको थिए, उनले भने ।

गुलशन प्रधानमन्त्री कपमा सर्लाहीबाट छनोट खेलेपनि प्रदेश–२ को टोलीमा परेका थिएनन् । ६ फिट एक इन्च अग्ला गुलशनले पुलिसबाट पहिलो खेलमै काठमाडौं मेयर–११ विरुद्ध गति र बाउन्सरका साथ उत्कृष्ट प्रभाव छाड्न सफल भएका थिए । गुलशन दायाँ हातले बलिङ गर्दा बायाँ हातले ब्याटिङ गर्छन् ।

यति चाँडो राष्ट्रिय टोलीको बन्द प्रशिक्षणमा पर्छु भन्ने सोचेको थियो भन्ने प्रश्नमा उनले भने, ‘आउन पनि सक्छु वा सक्दैन ५०-५० प्रतिशत सम्भावना देखेका थिए । तर मैले जतिबेला पनि नेपाली टोलीको बन्द प्रशिक्षणको अवसर आउन सक्छ भनेर तयारी गरिरहेको थिएँ । म माथिल्लो स्तरको लागि तयारी निरन्तर गर्दै आएको थिएँ ।’

‘मेरो सपना चाँडो भन्दा चाँडो नेपाली टोलीमा पर्ने छ । पहिलो पटक बन्द प्रशिक्षणमा परेको हुँदा आनन्द लिइरहेको छु । आफ्नो उत्कृष्ट प्रदर्शन गर्न खोजिरहेको छु । मेरो सपना नेपाली टोलीबाट खेल्ने र लामो समयसम्म स्थान बनाइरहने छ,’ उनले भने ।

गुलशनले पुलिस क्लबलाई आफ्नो प्रदर्शन देखाउने अवसर दिएकोमा धेरै धेरै धन्यवाद दिएका छन् । गुलशन आफ्नो बाउन्सरलाई प्रमुख खुबी मान्छन् । उनको फिटनेस भने केहि कमजोरी रुपमा देखिएको थियो । गुलशन काठमाडौं मेयर्स कपदेखि हालसम्म सबैभन्दा बढी फिटनेशमा जोड दिएको बताउँछन् ।

नेपालले यसै महिना पपुवा न्युगिनीसँग दुई ओडिआई र आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिजको अर्काे साता ओमान भ्रमण गर्नेछ । पपुवा न्युगिनीसँग पहिलो ओडिआई सेप्टेम्बर ५ र दोस्रो ओडिआई सेप्टेम्बर ८ मा हुने छ । नेपाल, ओमान र अमेरिकाबीच त्रिकोणात्मक सिरिज सेप्टेम्बर १३ देखि २० सम्म चल्ने छ । १७ सदस्य खेलाडी ओमान भ्रमणमा जानेछन् ।

गुलशन बारे थप जानकारीको लागि :पुलिसका सरप्राइज प्याकेज गुलशन