एजेन्सी – श्रीलंका युवा स्पिनर वानिन्दु हसरंगाले इन्डियन प्रिमियर लिग (आइपिएल) २०२१ का बाँकी खेलहरु रोयल च्यालेन्जर्स बेंगलोरबाट खेल्ने भएका छन् । अष्ट्रेलिया लेगस्पिनर एडम जाम्पा उपलब्ध नहुने भएपछि बेंगलोरले वानिन्दुलाई टोलीमा भित्र्याएको छ ।

२४ वर्षिय श्रीलंका वानिन्दु उत्कृष्ट लयमा छन् । श्रीलंकालाई अघिल्लो महिना भारतविरुद्ध तीन टि२० सिरिज २-१ ले जिताउन वानिन्दुले उत्कृष्ट प्रदर्शन गरेका थिए । तीन खेलमा वानिन्दुले ७ विकेट लिँदै प्लेयर अफ द सिरिज चुनिएका थिए । भारतलाई तेस्रो खेलमा ८१ रनमा रोक्न वानिन्दुले ४ ओभरमा ९ रन खर्चेर ४ विकेट लिएका थिए ।

वानिन्दु तल्लोक्रममा राम्रो ब्याटिङको क्षमता पनि राख्छन् । वानिन्दुले २२ टि२० आई खेलमा ३३ विकेट लिएका छन् । वानिन्दु टि२० विश्व वरीयतामा दोस्रो स्थानमा छन् । जाम्पाले टि२० विश्वकपको कारण आइपिएलबाट आफ्नो नाम फिर्ता लिएका हुन् । बेंगलोरका अर्का तीव्र गतिका बलर ड्यानियल साम्सले पनि नाम फिर्ता लिएपछि श्रीलंका तीव्र गतिका बलर दुश्मन्था चामिरालाई अुनबन्ध गरेको छ । आइपिएल सेप्टेम्बर १९ देखि अक्टोबर १५ सम्म यूएईमा चल्ने छ । टि२० विश्वकप अक्टोबर १७ देखि नोभेम्बर १४ सम्म चल्ने छ ।

विराट कोहली कप्तान रहेको बेंगलोर २० सेप्टेम्बरमा कोलकाता नाइट राइडर्ससँग खेल्ने छ । गत वैशाखमा कोरोना कारण स्थगित हुनुअघि बेंगलोर ७ खेलमा ५ मा जित र २ मा हार सहित १० अंकका साथ तेस्रो स्थानमा छ ।