एजेन्सी – सुन्दा अचम्म लाग्न सक्छ । विश्व क्रिकेटमा विवाहित जोडीले सँगै क्रिकेट खेलेको कमै देखिन्छ । तर विवाहित जोडीले प्लेयर अफ द म्याच र प्लेयर अफ द सिरिज (सर्वोउत्कृष्ट) दुर्लभ उपलब्धि हासिल गरेको सायद यसअघि देखिएको थिएन ।

शनिवार राती सम्पन्न द हन्ड्रेडको महिलातर्फ प्रतियोगितामा दक्षिण अफ्रिका विवाहित जोडी डेन भ्यान निकर्क प्लेयर अफ द सिरिज र मारिजान काप प्लेयर अफ द म्याच चुनिएका छन् । यी दुई विवाहित जोडीको उत्कृष्ट प्रदर्शनमा ओभल ईन्भिन्सिबल्सले साउर्थन ब्रेभलाई ४८ रनले हराउँदै उपाधि जितेको थियो ।

निकर्क ओभलको कप्तान हुन् भने काप अलराउन्डर हुन् । कप्तान निकर्क २९ बलमा ३ चौका सहित २६ रन जोड्दै आउट भएकी थिईन् । कापले १४ बलमा ४ चौका सहित २६ रन बनाएकी थिइन् । एक सय बलमा ओभलले ६ विकेट गुमाउँदै कुल १ सय २१ रन बनाएको थियो ।

ब्रेथलाई ९८ बलमा ७३ रनमा अल आउट गर्दै ओभलले उपाधि जितेको थियो । बलिङमा मध्य गतिकी बलर कापले १८ बलमा १३ डट बल राख्दै ९ रन खर्चेर चार विकेट लिएपछि प्लेयर अफ द म्याच चुनिएकी थिइन् । ओभललाई उपाधि जिताउन निकर्कले १० खेलमा २ सय ५९ रन जोड्दै शीर्ष स्थानमा थिइन् । बलिङतर्फ प्रतियोगिताभर आठ विकेट लिएकी उनी सर्वोत्कृष्ट खेलाडी चुनिइन् । उनले प्रदर्शनसँगै कप्तानी पनि उत्कृष्ट गरेकी थिइन् ।

२८ वर्षिय निकर्क दक्षिण अफ्रिकाको राष्ट्रिय टोलीको पनि कप्तान हुन् । काप दक्षिण अफ्रिकाको टोलीको महत्त्वपूर्ण अलराउन्डर हुन् । ३१ वर्षिय कापले एक टेस्ट, १ सय १५ ओडिआई र ८१ टि२० आई खेलेकी छिन् । कप्तान डेन भ्यानले दक्षिण अफ्रिकाबाट एक टेस्ट, १ सय २ ओडिआई र ८३ टि२० आई खेलेकी छिन् । दक्षिण अफ्रिकाबाट अन्तर्राष्ट्रिय क्रिकेटसँगै खेल्दै आएका निकर्क र कापले सन् २०१८ मा विवाह गरेका थिए ।

दुवैले सन् २००९ देखि दक्षिण अफ्रिका टोलीबाट एकै साथ खेल्दै आएका छन् । यी दुवैले टेष्टमा एकै खेलमा डेब्यु गरेका थिए । आइसिसीको प्रतियोगितामा सँगै ब्याटिङ गर्ने यी पहिलो विवाहीत जोडी हुन् । यी दुईलेसँगै विदेशी लिग खेल्दै उत्कृष्ट प्रदर्शनका साथ उपाधि पनि जित्दै आएका छन् । यसअघि यी दुई जोडीले बिग ब्यास लिग सिड्नी सिक्सर्सलाई पनि उपाधि जिताइसकेका छन् ।

यो पनिः क्रिकेटका ४ विवाहित जोडी