काठमाडौं (हाम्रो खेलकुद) – मलेसिया युवा स्टार ब्याट्सम्यान विरनदीप सिंहले चौथो संस्करणको एभरेष्ट प्रिमियर लिग (इपिएल) खेल्ने भएका छन् । मलेसिया कप्तानी भूमिका निर्वाह गरि सकेका विरनदीपले सोमपाल कामी कप्तान रहेको चितवन टाइगर्सबाट इपिएल खेल्ने छन् ।

२२ वर्षिय विरनदीप शीर्षक्रमका ब्याट्सम्यान हुन् । एसोसियट देशमा विरनदीप उदाउँदा स्टार हुन् । विरनदीप विदेशी फ्रेन्चाइज लिग खेल्ने पहिलो मलेसियाली खेलाडी बनेको छन् । मलेसियाबाट विदेशी फ्रेन्चाइज लिग खेल्ने पहिलो खेलाडी बनेसँगै विरनदीपलाई मलेसिया क्रिकेट एसोसियसनले बधाई दिएको छ ।

विरनदीपलाई चितवनले अफगानिस्तानका ओपनर मोहम्मद शाहजाद र पाकिस्तानी अलराउन्डर दानिस अजिजलाई पनि टोलीमा अनुबन्ध गरि सकेको छ । त्यस्तै चितवनले श्रीलंका स्पिनर सीक्कुगे प्रसन्ना र अफगानिस्तानका करिम जान्तलाई पनि चितवनले टोलीमा अनुबन्ध गरेको छ । सिक्कुगे र जान्तको औपचारिक घोषणा हुन बाँकी छ ।

विकेटकिपर ब्याट्सम्यान समेत रहेका विरनदीपले २५ टि२० आई खेलमा ६ सय ८४ रन बनाएका छन् । गत वैशाखमा नेपालमा भएको त्रिकोणात्मक टि२० सिरिजमा विरनदीपले नेदरल्यान्ड्सविरुद्ध पहिलो खेलमा ५३ बलमा ६ चौका र ६ छक्का सहित ८७ रनको उत्कृष्ट इनिङ खेलेका थिए । जुन इनिङसँगै उनीमाथि इपिएल फ्रेन्चाइज टोलीमो नजर गएको थियो । २०१९ जुलाईमा विरनदीपले नेपालविरुद्ध टि२० आईको पहिलो अर्धशतक बनाउनेक्रममा ४९ बलमा ५७ रन जोडेका थिए । विरनदीपले पार्टटाइम स्पिन पनि गर्ने गर्दछन् ।

चितवनमा सोमपाल कामीसँगै दिलिप नाथ, सन्दीप सुनार, साहब आलम, ललित भण्डारी, कमल सिंह ऐरी, भीम सार्की, सागर ढकाल, आदिल खान, ईशान पाण्डे र खडक बोहरा स्वदेशी खेलाडी रहेका छन् । इपिएल आगमी असोज ९ देखि २३ सम्म टियु मैदानमा हुने छ । सोमपाल कामीले चितवनको कप्तानी गर्ने छन् ।

विरनदीप दुईवर्षअघि नेपाल आएको बेला उनको बारे लेखिएको लेख : मलेसियाली स्टार विरनदीपको नेपालमा खेल्ने चाहना