काठमाडौं (हाम्रो खेलकुद) – नेपाली राष्ट्रिय क्रिकेट टोलीका मुख्य प्रशिक्षक डेभ ह्वाटमोरले आफ्नो पदबाट राजीनामा दिएको चर्चा भारतीय संचारमाध्यमले उल्लेख गरेका छन् । ह्वाटमोरका व्यवस्थापक कौस्तभ लाहिरीले यसबारे भारतीय मिडियामा पुष्टि गरेपनि नेपाल क्रिकेट संघ (क्यान) ले यसबारे अहिले केहि भन्न नसकिने जनाएको छ ।

भारतका केहि संचारमाध्यमले ह्वाटमोरको व्यवस्थापक लाहिरीलाई उदृत गर्दै ह्वाटमोरले ओमान भ्रमणपछि पद त्याग्ने भन्दै राजीनामा बुझाएको जानकारी दिएका छन् । तर क्यानले भने यसबारे कुनै यकिन जानकारी प्राप्त नभएको जनाएको छ ।

क्यानका सचिव अशोकनाथ प्याकुर्यालले यसबारे प्रशिक्षक र उनको एजेन्टबाट हालसम्म यकिन जानकारी आइनसकेको हाम्रो खेलकुदलाई जानकारी दिए । उनले आफूले पनि भारतीय संचारमाध्यमलाई आधार मानेर केहि प्रश्न आएपनि हालसम्म दुवै जनाबाट यसबारे जानकारी नभएको बताए । उनले क्यानले यसबारे भोली आफ्नो धारणा राख्ने पनि जानकारी दिए ।

नेपाली राष्ट्रिय क्रिकेट टोली हाल पपुवा न्युगिनी विरुद्ध दुई खेलको मैत्रीपूर्ण सिरिज तथा आइसीसी विश्वकप क्रिकेट लिग -२ को खेलका लागि ओमानमा छ । टोलीले विहीबार ओमान पुगेर प्रशिक्षण पनि गरिसकेको छ । ह्वाटमोरले पछिल्लो समय परिवारबाट टाढा बस्नुपर्दा केहि समस्या रहेको बताएको क्यान निकट स्रोतले जानकारी दियो । उनको राजीनामाले भने ओमान भ्रमणलाई असर नगर्ने बताइएको छ ।

ह्वाटमोर ८ महिनाअघि मात्र नेपाल आएका थिए । उनको नेतृत्वमा नेपालले घरेलु मैदानमा आयोजित त्रिकोणात्मक सिरिज पनि जितेको थियो ।

यस लेखको अपडेट यहाँ छ : व्यक्तिगत कारण देखाउँदै ह्वाटमोरले दिए राजीनामा