काठमाडौं (हाम्रो खेलकुद) – श्रीलंका क्रिकेट टोलीका विकेटकिपर ब्याट्सम्यान तथा विश्वकप च्याम्पियन दीनेश चान्डिमलले चौथो संस्करणको एभरेष्ट प्रिमियर लिग (इपिएल) नखेल्ने भएका छन् । चान्डिमललाई शरद भेषावकरको कप्तानीमा रहेको भैरहवा ग्ल्याडियटर्सबाट यसै महिना टोलीमा अनुबन्ध गरेको थियो ।

तर चान्डिमल श्रीलंका टोलीबाट अन्तर्राष्ट्रिय क्रिकेटमा व्यस्त हुने भएपछि इपिएल खेल्न नआउने भएका हुन् । श्रीलंकाले बिहीबार देखि घरेलु मैदानमा दक्षिण अफ्रिकासँग तीन ओडिआई र तीन टि२० आई सिरिज खेल्दै छ । उक्त सिरिजको लागि चान्डिमल श्रीलंका टोलीमा पूनरागमन गरेका छन् । दक्षिण अफ्रिकासँगको सिरिज १४ सेप्टेम्बर सम्म चल्ने छ ।

श्रीलंका टोलीले पछिल्लो समय अन्तर्राष्ट्रिय क्रिकेटमा लगातार खराब प्रदर्शन गर्दै आएका छन् । टोलीमा युवा खेलाडी बढी निर्भर छन् । यस अवस्थामा अनुभवी खेलाडी दीनेश चान्डिमललाई श्रीलंकाले सिमित ओभरमा टोलीमा बोलाएको छ । चान्डिमलले राष्ट्रिय टि२० क्रिकेट प्रतियोगितामा राम्रो प्रदर्शन गर्नेक्रममा ६ खेलमा २ अर्धशतक सहित १ सय ८३ रन बनाउँदै सर्वाधिक रन बनाउनेमा तेस्रो स्थानमा रहेका थिए ।

चान्डिमल राम्रो लयमा हुँदा उनी टि२० विश्वकप खेल्ने श्रीलंका टोलीमा पर्ने सम्भावना उच्च छ । त्यसैले उनले इपिएल नखेल्ने निर्णय लिएका हुन् । टि२० विश्वकप अक्टोबर १७ देखि सुरु हुने छ । दक्षिण अफ्रिका सिरिजपछि श्रीलंका टि२० विश्वकप तयारीमा जुट्ने छ । विश्वकप अघि ओमानसँग दुई टि२० आई खेल खेल्ने छ ।

चान्डिमलले श्रीलंकाबाट ६२ टेस्ट, १ सय ४९ ओडिआई र ५७ टि२० आई खेल खेलेका छन् । टि२० आईमा चान्डिमलले ५ अर्धशतक सहित कुल ८ सय ६८ रन जोडेका छन् । ३१ वर्षिय विकेटकिपर ब्याट्सम्यान चान्डिमल श्रीलंका वर्तमान टोलीका प्रमुख ब्याट्सम्यान हुन् । चान्डिमलले श्रीलंका टेस्ट, ओडिआई र टि२० तीनै शैलीमा कप्तानी गरेका छन् । ओाडिआई र टि२० आईमा श्रीलंकाबाट कप्तानी गर्ने कान्छा खेलाडी समेत हुन् । इपिएल असोज ९ देखि २३ सम्म टियु मैदानमा हुँदैछ । सबै फ्रेन्चाइज टोलीले तीव्र रुपमा तयारी अगाडि बढाउँदै आएका छन् ।

यो पनि पढ्नुहोस् : श्रीलंका क्रिकेटको दुर्गति : चार वर्षमा १० कप्तान परिवर्तन