एजेन्सी – स्टार अलराउन्डर बेन स्टोक्स अर्को महिना संयुक्त अरब इमिरेट्स (यूएई) र ओमानमा हुने टि२० विश्वकपको लागि इंग्ल्यान्डको प्रारभिम्क टोलीमै परेका छैनन् । इंग्ल्यान्डले विश्वकपको लागि आफ्नो १५ सदस्य प्रारम्भिक टोली घोषणा गर्दा स्टोक्स टोलीमा छैनन् ।

स्टोक्स विश्वकप खेलाडी छनोटमै समावेश नभएको बुझिएको छ । स्टोक्सले मानसिक स्वास्थ्यको कारण अघिल्लो महिना क्रिकेटबाट अनिश्चित विश्राम लिएका थिए । जुन विश्राम जारी रहेको इंग्ल्यान्ड क्रिकेट बोर्डले जनाएको छ । इंग्ल्यान्डको टोलीमा तीव्र गतिका बलर टाइमल मिल्सले पूनरागमन गरेका छन् ।

डेथ ओभरका प्रमुख बलर जोफ्रा आर्चरले चोटका कारण विश्वकप गुमाउने भएपछि इंग्ल्यान्डले मिल्सलाई टोलीमा समेटेको छ । उनले २०१७ पछि टोलीमा पूनरागमन गरेका हुन् । घरेलु प्रतियोगिता द हन्ड्रेड र टि२० ब्लास्टमा उत्कृष्ट प्रदर्शन गर्दै मिल्स टोलीमा फर्किएका हुन् । इंग्ल्यान्डले आगमी अक्टोबर १० मा आफ्नो अन्तिम टोली टुङ्गो लगाउने जनाएको छ । उपाधिको दाबेदार इंग्ल्यान्ड सुपर १२ को समूह ए मा छ । इंग्ल्यान्डले पहिलो खेल अक्टोबर २३ मा वेस्टइन्डिजसँग खेल्ने छ । त्यसअघि पाकिस्तानसँग दुई टि२० आई खेल खेल्ने छ । जुन अक्टोबर १४ र १५ मा हुने छ ।

विश्वकपमा इंग्ल्यान्डको प्रारम्भिक टोली : ओईन मोर्गन (कप्तान), मोईन अली, जोनी बेयरस्टो, साम बिलिंग्स, जस बटलर, साम करन, क्रिस जोर्डन, लियाम लिभिङस्टोन, डेविड मलान, टाइमल मिल्स, आदिल राशिद, जेसन रोय, डेविड विल्ली, क्रिस वोक्स र मार्कवुड । भ्रमण वैकल्पिक खेलाडी : टम करन, लियाम दासन र जेम्स भिन्स ।

टि२० विश्वकपमा समूह चरण :

पहिलो चरण :

समूह ए : नेदरल्यान्ड्स, आयरल्यान्ड, नामिबिया र श्रीलंका

समूह बी : ओमान, पिएनजी, बंगलादेश र स्टकल्यान्ड

सुपर १२ :

समूह ए : इंग्ल्यान्ड, वेस्टइन्डिज, दक्षिण अफ्रिका, अष्ट्रेलिया, पहिलो चरणको समूह ए को विजेता र समूह बी को उपविजेता ।

समूह बी : भारत, पाकिस्तान, अफगानिस्तान, न्युजिल्यान्ड, पहिलो चरणको समूह बी को विजेता र समूह ए को उपविजेता ।

यो पनि पढ्नुहोस् : क्रिकेटबाट स्टोक्सको अनिश्चित विश्राम