एजेन्सी – इन्डियन प्रिमियर लिग (आइपिएल) २०२१ को रोकिएका बाँकी खेलहरु आजदेखि संयुक्त अरव इमिरेट्स (युएई) मा सुरु हुँदैछ । भारतमा दोस्रो लहरको कोरोना महामारीको कारण वैशाखमा स्थगित आइपिएलका बाँकी खेलहरु आजबाट सुरु हुनेछ । खेलाडी, अफिसियल र प्रशिक्षकमा कोरोना देखिएपछि गत आइपिएल बीचमै स्थगित भएको थियो ।

यसपटकको आइपिएल धेरै खेलाडीको लागि टि२० विश्वकप तयारी हुनेछ । आइपिएल फाइनल अक्टोबर १५ मा हुने छ । टि२० विश्वकप अक्टोबर १७ देखि युएई र ओमानमा सुरु हुँदै छ । आज बेलुका आइपिएलमा दुई सर्वाधिक सफल टोली चेन्नई सुपर किंग्स र मुम्बई इन्डियन्सबीच प्रतिस्पर्धा हुँदै छ । खेल नेपाली समय अनुसार बेलुका ७:४५ पछि दुबईमा सुरु हुनेछ । मुम्बईको रोहित शर्मा र चेन्नईको महेन्द्रसिंह धोनीले कप्तानी गर्ने छन् । आइपिएलका यी दुई सर्वाधिक सफल टिम र कप्तानबीच कडा प्रतिस्पर्धा हुने अनुमान गरिएको छ ।

चेन्नई र मुम्बईको खेललाई ‘आइपिएल क्लासिको’ पनि भनिन्छ । दुई सफल टोलीबीचको खेलसँगै आइपिएल फर्कनेछ । आइपिएलका २९ खेल सकिदा चेन्नई ७ खेलमा ५ मा जित र २ मा हार सहित १० अंकका साथ दोस्रो स्थानमा छ । चेन्नई मुम्बईलाई हराउँदै अंक तालिका शीर्षस्थानमा उक्लिने सोचमा छ । मुम्बई समान खेलमा ४ मा जित र ३ मा हार सहित ८ अंकका साथ चौथो स्थानमा छ । चेन्नईलाई हराउँदै मुम्बई दोस्रो स्थानमा फड्को मार्ने सोचमा देखिन्छ ।

मुम्बई र चेन्नई दुबैमा विश्वका स्टार खेलाडीको बाहुल्यता छ । मुम्बइको ओपनिङ रोहित शर्मा र क्विन्टन डी ककले गर्ने छन् । दुबै ठूलो इनिङ खेल्न सक्छन् । सूर्यकुमार यादव र ईशान किशन मुम्बईका मध्यक्रमका ब्याट्सम्यान हुन् । यी दुई युवा स्टारले मुम्बईबाट उत्कृष्ट प्रदर्शनका साथ भारतीय टि२० विश्वकप टोलीमा स्थान बनाइसकेका छन् ।

क्रुनाल पान्ड्या, काइरन पोलार्ड र हार्दिक पान्ड्या जस्ता विश्वस्तरिय अलराउन्डर मुम्बईमा छन् । पोलार्ड र हार्दिक ठूला सटका लागि चर्चित खेलाडी हुन् । दुबैले एकै ओभरमा खेललाई मोड्न सक्छन् । नाथन कुल्टर नाइल र जेम्श निसम मध्य एकले मौका पाउने छन् । राहुल चाहर मुम्बईका प्रमुख स्पिनर हुन् । जस्प्रित बुमराह र ट्रेन्ट बोल्टको जोडीले मुम्बईको तीव्र गतिको बलिङ युनिट बलियो छ ।

यता चेन्नईमा अनुभवी खेलाडीको बाहुल्यता छ । चेन्नईको ओपनिङ युवा ब्याट्सम्यान ऋतुराज गायकवाड र दक्षिण अफ्रिका फाफ डु प्लेसिसले गर्ने छन् । यी दुबै खेलाडी राम्रो लयमा छन् । आइपिएल स्थगित हुनुअघि फाफ डु प्लेसिसले ७ खेलमा ४ अर्धशतक सहित कुल ३ सय २० रन बनाएका थिए । यसै साता सम्पन्न क्वारेवियन प्रिमियर लिग (सिपिएल) मा शतक प्रहार गरेका थिए । दक्षिण अफ्रिका टि२० विश्वकप टोलीमा नपरेका फाफ डु प्लेसिसले आइपिएलमा सानदार प्रदर्शनका साथ छनोट समितिलाई राम्रो जवाफ दिन चाहन्छन् ।

मोईन ओली, सुरेश रैना र अम्बाति रायुडू जस्ता अनुभवी ब्याट्सम्यानले चेन्नईको मध्यक्रम ब्याटिङ बलियो बनेको छ । तल्लोक्रममा महेन्द्रसिंह धोनी छन् । विश्व क्रिकेटका सफल फिनिसर मानिन्छन् । रविन्द्र जडेजा, साम करन र ड्वेन ब्राभो जस्ता विश्वस्तरीय अलराउन्डर टोलीमा हुँदा ब्याटिङ र बलिङ दुबैमा सन्तुलित बनेको छ । यी चारै खेलाडी तल्लोक्रममा आक्रामक ब्याटिङ गर्न सक्छन् । पछिल्लो समय भारतीय टोलीबाट उत्कृष्ट प्रदर्शन गर्दै आएका शार्दूल ठाकुर पनि चेन्नईमै छन् । ठाकुर र दीपक चाहर तीव्र गतिका बलिङ हतियार हुन् ।

सर्वाधिक सफल कप्तान र टिम

आइपिएल इतिहासमा चेन्नई र मुम्बई सर्वाधिक सफल टिम हुन् । १३ संस्करण सकिँदा यी दुई टोलीले ८ उपाधि जितेका छन् । मुम्बईले ५ र चेन्नईले ३ उपाधि जितेका छन् । मुम्बईले ६ र चेन्नईले ८ पटक आइपिएलको फाइनल खेलेको छन् । चेन्नई गत वर्ष बाहेक अन्य सबै संस्करणमा प्लेअफमा पुग्ने एक्लो टोली ।

चेन्नईलाई धोनी र मुम्बईलाई रोहितले सवै उपाधि जिताएका हुन् । धोनीले १ सय ९५ खेलमा कप्तानी गर्दा १ सय १५ खेलमा जित र ७९ खेलमा हार बेहोरेका छन् । रोहितले १ सय २३ खेलमा कप्तानी गर्दा ७२ मा जित र ४७ मा हार बेहोरेका छन् । दुबै कप्तान शालिन, शान्त र खेलाडीलाई स्वतन्त्र छोड्नुको साथै विश्वास बढी गर्ने गर्दछन् ।

हेड टु हेड :

मुम्बई र चेन्नईबीच हालसम्म ३१ खेल भएको छन् । मुम्बई १९ खेलमा विजयी हुँदा १२ खेलमा पराजित भएको छ । पहिलो खेलमा मुम्बईले चेन्नईलाई ४ विकेटले पराजित गरेको थियो । जसक्रममा मुम्बईले २ सय १९ रनको विजयी लक्ष्य सफल रुपमा पूरा गरेको थियो । गतवर्ष पहिलो खेलमा मुम्बई ५ विकेटले पराजित हुँदा दोस्रो खेलमा १० विकेटले विजयी भएको थियो । २०१९ मा चेन्नईलाई एक रनले हराउँदै मुम्बईले उपाधि जितेको थियो । त्यस सिजनका चारै खेलमा मुम्बईले जितेको थियो । मुम्बईले जितेका पाँच मध्य तीन उपाधि फाइनलमा चेन्नईलाई हराउँदै छ । २०१८ यता यी दुई टोलीबीच ८ खेल हुँदा मुम्बई ६ खेलमा विजयी भएको छ ।

अंक तालिका

दिल्ली क्यापिटल्स ८ खेलमा ६ मा जित र २ मा हार सहित १२ अंकका साथ शीर्षस्थानमा छ । चेन्नई सुपर किंग्स ७ खेलमा ५ जित र २ मा हार सहित १० अंक दोस्रो स्थानमा । रोयल च्यालेन्जर्स बेंगलोर ७ खेलमा ५ मा जित र २ मा हार सहित १० अंक भएपनि नेट रनरेटको आधारमा तेस्रो स्थानमा छ । मुम्बई इन्डियन्स ७ खेलमा ४ मा जित र ३ मा हार सहित ८ अंक बटुल्दै चौथो स्थानमा छ ।

राजस्थान रोयल्स ७ खेलमा ४ मा हार र ३ मा जित सहित ६ अंकका साथ पाँचौं स्थानमा छ । पन्जाब ८ खेलमा ५ मा हार र ३ मा जित सहित ६ अंक जोड्दै छैटौं स्थानमा छ । कोलकाता ७ खेलमा ५ मा हार र २ जित सहित ४ अंकका साथ सातौ स्थानमा छ । सनराइजर्स हैदराबाद ७ खेलमा ६ मा हार र १ मा जित सहित २ अंक जोड्दै पुछारमा छ ।