काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत ओमानसँग दोस्रो खेलमा उत्कृष्ट बलिङ प्रदर्शन गरेको छ ।

अल अमरेत क्रिकेट मैदान मस्कटमा टस हारेर ब्याटिङको निम्तो पाएको घरेलु टोली ओमान २३ ओभरमा ६६-७ को संकट अवस्थामा छ । ओमानका कप्तान जिशान मकसुद १९ रनमा अविजित छन् । तीव्र गतिका बलर करण केसी र स्पिनर सन्दीप लामिछानेले तीन तीन विकेट लिएपछि ओमान नेपाल सामू निरिह बनेको छ ।

करणको तेस्रो ओभरको चौथो बलमा स्कुपसट खेल्नेक्रममा एज लागेर ओपनर जतिन्दर सिंह फस्ट स्लिपमा आसिफ शेखबाट १३ रनमा क्याच आउट हुन पुगेका थिए । पहिलो खेलमा नेपालविरुद्ध शतक प्रहार गरेका जतिन्दरले दोस्रो खेलमा १३ बलमा १ चौका र १ छक्का प्रहार गरे ।

करणको सातौं ओभरको पाँचौ बलमा टप एज लागेर डेब्यू खेल खेलेका सुफ्यान मोहम्मद चार रनमा सुशान भारीबाट क्याच आउट हुन पुगेका थिए । नवौं ओभरको पाँचौं बलमा करणले अयान खानलाई ७ रनमा बोल्ड आउट गर्दै ओमानलाई ३०–३ को कमजोर अवस्थामा पुर्याएका थिए । त्यसको दुई बल अघि विकेटकिपर विनोद भण्डारीले अयानको क्याच ७ रनमा छोड्न पुगेका थिए ।

त्यसपछि लेग स्पिनर सन्दीप लामिछानेले ओमानको ब्याटिङ ध्वस्त बनाएका थिए । सन्दीप लामिछानेले ११ औं ओभरको अन्तिम बलमा मोहम्मद नदीमलाई चार रनमा एलबीडब्लू आउट गरे । सन्दीपलेनै १४ औं ओभरको चौथो बलमा नेपाली मुलका विकेटकिपर सुरज कुमारलाई शून्यमा बोल्ड आउट गरे । लगत्तै सन्दीप अर्को बलमा नेस्टर धम्बालाई एलबीडब्लू आउट गर्दै ह्याट्रिक नजिक पुगेका थिए । अन्तिम बलम सन्दीप गौडले ह्याट्रिक हुनबाट रोके ।

पार्टटाइम स्पिनर शरदले आफ्नो पहिलो ओभरको दोस्रो बलमै विकेट लिदै नेपाललाई सातौ सफलता दिलाए । शरदको २२ औं ओभरको दोस्रो बलमा ठूलो सट खेलेका सन्दीप गौडे सुशान भारीबाट ८ रनमा क्याच आउट हुन पुगे । ओडिआईमा शरदको यो पहिलो विकेट हो । शरदले ओडिआईमा पहिलो पटक बलिङ गरेका हुन् । लिष्ट ए मा भने शरदले ८ विकेट लिएका छन् । अलराउन्डर कुशल मल्लको स्थानमा नेपालले आज शरदलाई मौका दिएको थियो ।