काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत ओमानले प्रस्तुत गरेको सामान्य विजयी लक्ष्य पछ्याउने क्रममा मजबुत सुरुवात गरेको छ ।

जितको लागि १ सय २२ रनको सामान्य विजयी लक्ष्य पछ्याएको नेपालले ८ ओभरमा १ विकेट गुमाउँदै ४९ रन बनाएको छ । नेपालका युवा ओपनर आसिफ शेख २२ बलमा ५ चौका सहित २२ रनमा अविजित छन् । कप्तान ज्ञानेन्द्र मल्ल १८ बलमा १ चौका सहित १७ रनमा अविजित छन् ।

ओपनर आसिफ शेख र कुशल भुर्तेलले नेपाललाई पहिलो विकेटका लागि १६ रनको साझेदारी गरेका थिए । कुशल भुर्तेल कलिमुल्लाहको चौथो ओभरको पहिलो बलमा खराब सटका साथ फस्ट स्लिपमा जतिन्दर सिंहबाट ६ रनमा क्याच आउट हुँदै पेभिलिएन फर्के । कुशलले ८ बलमा १ चौका प्रहार गरे । त्यसपछि आसिफ र ज्ञानेन्द्रले राम्रो साझेदारी गर्दै नेपाललाई सहज जितर्फ अगाडि बढाएका छन् ।

त्यसअघि अल अमरेत क्रिकेट मैदान मस्कटमा टस हारेर ब्याटिङको निम्तो पाएको घरेलु टोली ओमान ३७.१ ओभरमा १ सय २१ रनमा अल आउट भएको थियो । ओमानका कप्तान जिशान मकसुदले ६६ बलमा २ चौका र १ छक्का सहित सर्वाधिक ४१ रनको योगदान दिए । कप्तान मकसुद बाहेक अन्य कुनैपनि ब्याट्सम्यानले राम्रो प्रदर्शन गर्न सकेनन् । नेपालको घातक बलिङसामू ओमानका ७ खेलाडीले दोहोरो अंकमा रन बनाउन सकेनन् । तल्लोक्रमका कलिमुल्लाह १२ र विलाल खानले ९ रन बनाए ।

नेपालका सन्दीप लामिछानेले ८.१ ओभरमा २ मेडन सहित १८ रन खर्चेर ४ विकेट लिए । करण केसीले ८ ओभरमा १ मेडन सहित २५ रन खर्चेर ४ विकेट लिए । स्पिनर शरद भेषावकरले ६ ओभरमा १ मेडन सहित २१ रन खर्चेर २ विकेट लिए । यसअघि नेपाल पहिलो खेलमा ओमानसँग ५ विकेटले पराजित भएको थियो ।