एजेन्सी – भारतीय क्रिकेट टोलीका कप्तान विराट कोहलीले इन्डियन प्रिमियर लिग (आइपिएल) मा रोयल च्यालेन्जर्स बेंगलोरको कप्तानी छाड्ने भएका छन् । कोहलीले यस सिजनको आइपिएलपछि कप्तान छाड्ने बेंगलोरले जनाएको छ । कोहलीले बेंगलोरबाट खेलाडीको रुपमा भने निरन्तर खेल्ने जनाएका छन् ।

कोहलीले २०१३ देखि बेंगलोरको कप्तानी गर्दै आएका छन् । १ सय ३२ खेलमा कप्तानी गर्दा ६२ खेलमा जित, ६६ खेलमा हार र ४ खेलको नजिता विहिन छ । विराटको कप्तानीमा बेंगलोरले २०१६ को आइपिएल फाइनल खेलेको थियो । फाइनलमा बेंगलोर सनराइजर्स हैदराबादसँग ८ रनले पराजित हुन पुगेको थियो । विराटको कप्तानीमा बेंगलोर २०१५ र २०२० को सिजनमा प्लेअफ सम्म यात्रा तय गरेको थियो । अन्य सिजनमा लिग चरणबाटै बाहिरिएको थियो ।

‘मैले कप्तानीको रुपमा महान् र प्रेरणादायी यात्रा गरे । यो अवसर प्रदान गर्ने बेंगलोरको व्यवस्थापन, कोचिङस्टाफ, प्रशिक्षक, खेलाडी र सम्पूर्ण बेंगलोरको परिवारलाई धन्यावाद’, कोहलीले कप्तानी छाड्ने बताउँदै जानकारी दिएका छन् ।

कोहलीले बिहीबारमात्र भारतीय क्रिकेट टोलीको टि२० कप्तानी अर्को महिना हुने टि२० विश्वकपपछि छाड्ने बताई सकेका छन् । विराटले टेस्ट र ओडिआईमा भने निरन्तर टोलीको कप्तानी गर्ने छन् । सिमित ओभरमा २०१७ देखि भारतीय टोलीको कप्तानी गर्दै आएका थिए । सन् २०१६ मा महेन्द्रसिंह धोनीले कप्तान छाडेपछि विराटले भारतीय टोलीको नेतृत्व गर्दै आएका थिए ।

इन्डियन प्रिमियर लिग (आइपिएल) मा बेंगलोरले कोहलीको कप्तानीमा उपाधि जित्न सकेको छैन । यता मुम्बई इन्डियन्सका कप्तान रोहित शर्माले आफ्नो कप्तानीमा पाँच उपाधि दिलाइसकेका छन् । लामो समयदेखि रोहित भारतको टि२० कप्तान बन्नुपर्ने माग उठ्दै आएको थियो । आइपिएलमा उपाधि जित्न नसक्दा कोहलीलाई निरन्तर दबाब पर्दै आएको थियो । विराटको कप्तानीमा भारतले सिनियर टोलीमा हालसम्म आइसिसी उपाधि जितेको छैन ।