भुपेन्द्र जिसी, काठमाडौं

नेपाली राष्ट्रिय क्रिकेट टोलीका पूर्व मुख्य प्रशिक्षक पुबुदु दसानायके यतिबेला नेपालमा छन् । शनिबारबाट काठमाडौंमा सुरु हुने एभरेष्ट प्रिमियर लिग (इपिएल) मा भैरहवा ग्ल्याडियटर्सको मुख्य प्रशिक्षकको जिम्मेवारी सम्हाल्न उनी मंगलबार नेपाल आइपुगेका हुन् । नेपाली क्रिकेटले अन्तर्राष्ट्रिय क्षेत्रमा ठूलो फड्को मार्दा प्रशिक्षक रहेका दसानायकेले नेपाललाई सहयोग गर्न सधैं तयार रहेको बताएका छन् ।

दसानायके नेपाल आइपुगेको दुई दिनअघि मात्र नेपाली टोली पुन: प्रशिक्षकविहिन बन्न पुगेको छ । सम्झौता अवधि सकिनुअघि नै ह्वाटमोरले राजीनामा दिएपछि नेपाल क्रिकेट संघ (क्यान) नयाँ प्रशिक्षकको खोजीमा छ । दसानायके यसअघि नेपालले प्रशिक्षक आवेदन माग्दा उम्मेदवारी दिनेमध्यमा थिए । क्यानले गतवर्ष मागेको आवेदनमा दसानायकेले अन्तरवार्ता नै पनि दिएका थिए । तर अन्त्यमा क्यानले उनलाई राखेन ।

नेपाली क्रिकेटको इतिहास पल्टाएर हेर्दा दसानायके नेपाली क्रिकेटका सर्वाधिक सफल प्रशिक्षक हुन् । उनकै प्रशिक्षकमा नेपालले २०१४ मा पहिलो पटक टि२० विश्वकप खेल्न सफल भएको थियो । उनकै नेतृत्वमा नेपालले डिभिजन चार देखि विश्वकपसम्मको यात्रा तय गरेको थियो । त्यसैले पनि समर्थकमाझ बेग्लै स्थान बनाएका दसानायकेको पुन: नियुक्त हुनुपर्ने माग बेलाबेलामा उठ्ने गर्छ ।

सन् २०११ मा नेपाल आएका दसानायकेले सन् २०१५ मा नेपालले क्रिकेटको मुख्य प्रशिक्षकबाट राजीनामा दिएका थिए । क्यानको आन्तरिक किचलोको कारण उनले छाडेका थिए । तर आइसीसीकै आग्रहमा उनले नामिबियासँग खेल र एमसीसीविरुद्ध टुरका लागि कन्सल्टेन्ट प्रशिक्षकको रुपमा फर्किए । त्यसपछि दसानायके २०२० को सुरुवातमै इपिएलकै लागि नेपाल आएका थिए । भैरहवामा ट्यालेन्ट हन्ट सम्पन्नसँगै कोरोना महामारीको कारण इपिएल स्थगित भएपछि उनी क्यानडा लागेका थिए ।

नेपाली टोलीको मुख्य प्रशिक्षकमा फर्कने इच्छाबारे गरिएको प्रश्नमा दसानायकेले भने, ‘मैले अहिले यस विषयमा केहि पनि सोचेको छैन । नेपाली क्रिकेटलाई सहयोग गर्न म सधैं तयार छु । नेपाली क्रिकेट प्रति म सधैं सकारात्मक छु । अब नियुक्तिको विषयमा संघले जे निर्णय छ त्यो नेपाली क्रिकेटको हितमै हुनेछ । मैले सधैं त्यसको सम्मान गर्छु । अहिलेलाई भने मेरो ध्यान इपिएलमा केन्द्रित रहेको छ ।’

इपिएलमा शरद भेषावकर कप्तान रहेको भैरहवामा उनी आबद्ध छन् । उनको नजरमा भैरहवा टोली सन्तुलित र बलियो रहेको छ । ‘टिम तयार छ । विदेशी खेलाडीबाट म खुसी छु । पक्कैपनि नेपालका स्थानीय खेलाडी पनि त्यतिनै बलियो छन् । केहि अभ्यासपछि पहिलो खेल खेल्नेछौं । पुरै प्रतियोगितामा राम्रो गर्ने मौका छ’, दसानायकेले भने ।

विदेशी खेलाडीको स्तरसँगै नेपाली खेलाडीको क्षमतालाई लिएर दसानायके उत्साहित छन् । ‘हामीसँग बंगलादेशका तमिम इकबाल, श्रीलंका उपुल थरंगा र धाम्मिका प्रसाद टोलीमा छन् । सबैले अन्तर्राष्ट्रिय स्तरमा आफूलाई प्रमाणित गरेका छन् । शरदको कप्तानी र स्थानिय खेलाडीको उपस्थितिले टोली बलियो बनाएको छ,’ उनले थपे, ‘रोहितले ओमानमा साच्चै उत्कृष्ट ब्याटिङ गरे । यो हाम्रो लागि अतिरिक्त फाइदा हो । अभिनाष बोहराले टि२० मा सधैं राम्रो गरेका छन् । अनुभवी खेलाडी प्रदीप ऐरी, भुवन कार्की र अन्य खेलाडी पनि सबै राम्रा छन् । मलाई लाग्छ भैरहवा धेरै सन्तुलित छ ।’

शरद नेपाली घरेलु क्रिकेटका सर्वाधिक सफल कप्तान मानिन्छन् । शरदले कप्तानी गरेका प्राय सबै प्रतियोगितामा टोली फाइनलमा पुगेको छ । इपिएलका पछिल्ला दुवै सिजनमा भैरहवा फाइनलमा चुकेको थियो । शरदको कप्तानीमा टोली निर्माण गर्दाबारे प्रश्नमा उनले भने, ‘पक्कैपनि शरदलाई टोलीको कप्तानको रुपमा पाउँदा म एकदमै खुसी छु । शरद एक अनुभवी खेलाडी हुन् । उनले भैरहवाबाट राम्रो गर्दै आएका छन् । उनीसँग आगामी दिनमा सँगै काम गर्दै राम्रो नतिजा निकाल्नेछौं ।’

विदेशी खेलाडीको स्तरले टोलीलाई च्याम्पियन बनाउन मदत पुग्ने दसानायकेले बताए । ‘तमिमले यो प्रतियोगिताकै उत्कृष्ट खेलाडीमा पर्छन् । उनले राम्रो प्रदर्शन गर्नेमा म विश्वस्त छु । उपुल र धाम्मिकाले पनि अन्तर्राष्ट्रिय स्तरमा आफ्नो प्रदर्शन देखाएका छन् । दुवै राम्रा खेलाडी हुन् । विशेषगरी तमिमको आगमनले टोली धेरै बलियो भएको छ,’ उनले थपे, ‘पछिल्ला दुवै संस्करणमा उपविजेतामा सिमित टोलीलाई यसपटक उपाधि जिताउने लक्ष्य राखेका छौं ।’

‘हामी सधैं जितमात्र सोच्छौं । हाम्रो लक्ष्य हरेक खेलमा राम्रो गर्ने हो । त्यसका लागि खेलपिछे हाम्रो ध्यान हुनेछ । पहिला लिगमा राम्रो गर्दै अनि मात्र दोस्रो चरणको लागि योजना बनाउन चाहन्छौं । यो प्रतियोगिता एक लोकप्रिय प्रतियोगिता हो । प्राय सबै टोलीमा एसोसिएट खेलाडी पनि रहेकाले एसोसियटमा निकै लोकप्रिय हुनेछ,’ उनले थपे ।

नेपालको अन्तर्राष्ट्रिय क्रिकेटमा पछिल्लो प्रदर्शनबारे बोल्दै दसानायकेले पारसको अनुभव केहि मिस भएको बताए । ‘नेपाल राम्रो टोली हो । मैले ओमानको सिरिज पनि हेरेको थिएँ । टोलीमा धेरै युवा खेलाडी छन् । अझ भन्नुपर्दा यहाँ सधैं प्रतिभावान खेलाडी रहेका छन् । त्यसो भनिरहँदा विश्वकप लिग–२ को शीर्ष तीनमा स्थान बनाउन कडा मिहिनेत भने गर्नुपर्छ’, उनले भने ।

‘पारसको सन्न्यास नेपाली क्रिकेटले सबैभन्दा ठूलो मिस हुने अनुभव गरेको छु । नेपाली युवा खेलाडीको प्रदर्शनले धेरै खुसी छु । युवा प्रतिभालाई एक्स्पोजर र खेल अनुभवको बढी आवश्यक छ । बलर राम्रो छन् । नेपालको ब्याटिङ लाइनअपमा पनि पछिल्लो समय विकास भएको छ । बलरहरुले पनि रन बनाउँदै आएका छन्,’ उनले थपे ।

समर्थकबारे बोल्दै दसानायकेले नेपालको क्रिकेट विकासमा महत्त्वपूर्ण पाटो रहेको बताए । ‘म नेपाली समर्थकसामू सधैं रमाउँछु । नेपाली समर्थक मलाई र टिमलाई सधैं समर्थन गर्दछन् । मैले सधैं भन्दै आएको छु समर्थकको ठूलो साथले नेपाल यो अवस्थामा छ । नेपाली समर्थक क्रिकेट विकासका एक खम्बा हुन् । यसैगरी नेपाली क्रिकेटलाई सहयोग गरिरहन आग्रह गर्छु,’ उनले भने ।

इपिएलमा आफ्नो उपस्थिति र प्रतियोगिताबारे दसानायके उत्साहित देखिए । ‘इपिएल कुनै सामान्य प्रतियोगिता होईन । म क्यानडाबाट यसकै लागि आएँ । एसोसिएट क्रिकेटमा सबैजना इपिएलकै बारे कुरा गरिरहेका हुन्छन् । अहिले त क्यारेवियन, यूरोप, एसियाका खेलाडी इपिएलमा आएका छन् । इपिएल ठूलो प्रतियोगिता हो । यसले नेपाली क्रिकेट विकासमा सहयोग गर्नेछ,’ उनले भने ।