एजेन्सी – इन्डियन प्रिमियर लिग (आइपिएल) २०२१ को ३३ औं खेलमा आज दिल्ली क्यापिटल्स र सनराइजर्स हैदराबादबीच प्रतिस्पर्धा हुँदै छ । खेल नेपाली समय अनुसार साँझ ७:४५ पछि दुबईमा सुरु हुनेछ ।

दिल्ली हैदराबादलाई हराउँदै शीर्षस्थानमा उक्लिने लक्ष्यमा हुनेछ । हैदराबादलाई प्ले अफको झिनो आशा कायमै राख्न आजको खेल जित्नै पर्ने दबाब छ । दिल्लीको कप्तानी ऋषभ पन्त र हैदराबादको केन विलियम्सनले गर्ने छन् । युवा ब्याट्सम्यान श्रेयस ऐर टोलीमा चोटबाट फर्केको हुँदा दिल्लीको मध्यक्रम मजबुत बनेको छ ।

ओपनर शिखर धवन र पृथ्वी शाले आइपिएल उत्कृष्ट प्रदर्शन गर्दै आएका छन् । शा आक्रामक ब्याटिङका साथ विपक्षीलाई दबाबमा राख्दै आएका छन् । उच्च लयमा रहेका शा हैदराबादलाई घातक बन्न सक्छन् । ऐर तेस्रो र स्टिभ स्मिथलाई चौथो नम्बरमा खेलाउन सक्छ । पाँचौ नम्बरमा ऋषभ पन्त, छैटौंमा मार्कस स्टोइन र सातौमा अक्षर पटेल खेल्ने सम्भावना छ । बायाँ हाते विकेटकिपर ऋषभ टि२० विशेष ब्याट्सम्यान मानिन्छन् । ऋषभ चलेको खण्डमा उनलाई रोक्न कठिन पर्छ । पन्तले एकै ओभरमा खेललाई मोड्न सक्छन् ।

स्टोइनिसले लगातार उच्च प्रदर्शन गर्दै आएका छन् । पटेल र स्पिनर रविचन्द्रन आश्विन पनि राम्रो ब्याटिङको क्षमता राख्छन् । तीव्र गतिका बलरमा एनरिच नोर्किया र कागिसो रबाडा जोडी छन् । रबाडा विश्वका एक उत्कृष्ट डेथ ओभर स्पेलिष्ट बलर हुन् । नोर्किया १ सय ५० माथिको गतीमा बलिङ गर्ने गर्दछन् । स्पिन जोडीमा आश्विन र अमित मिश्रा छन् । दिल्लीको टोली सन्तुलित र मजबुत छ ।

हैदराबादको ओपनिङ डेविड वार्नर र ऋद्धिमान शाहले गर्ने सम्भावना छ । वार्नरको पहिलो सिजन भने कमजोर थियो । कमजोर प्रदर्शनकै कारण वार्नरले कप्तानी छाड्नु परेको थियो । कप्तानी दबाब नहुँदा वार्नरले उत्कृष्ट पूनरागमन गर्ने अनुमान गरिएको छ । तेस्रो नम्बरमा कप्तान केन विलियम्सन छन् । विलियम्सन ब्याटिङका खम्बा हुन् । उनको प्रदर्शन निकै महत्वपूर्ण हुने छ । हैदराबादको मध्यक्रम र तल्लोक्रम ब्याटिङ कमजोर रहँदै आएका छन् ।

मनिष पाण्डे मध्यक्रममा ब्याटिङ गर्ने छन् । उनको प्रदर्शन महत्वपूर्ण हुने छ । अब्दुल सामद र विजय शंकर अलराउन्डरको रुपमा खेल्ने छन् । ब्याटिङ बलियो बनाउन जेसन होल्डरलाई खेलाउने सम्भावना देखिन्छ । राशिद खान प्रमुख हतियार हुन् । उनको प्रदर्शन निकै महत्त्वपूर्ण हुनेछ । राशिद ब्याटिङमा पनि योगदान दिनसक्छन् । योर्कर किंग टिनटराजन पनि चोटपछि पूनरागमन गर्दै छन् । भुवनेश्वर कुमार र नटराजनले तीव्र गतिको बलिङ आक्रामण सम्हाल्ने छन् ।

हेड टु हेड :

पछिल्ला पाँच खेलमा दिल्ली तीनमा विजयी र दुईमा पराजित भएको छ । यस संस्करणको पहिलो खेलमा दिल्ली सुपर ओभरमा विजयी भएको थियो । हैदराबाद र दिल्लीबीच कुल १९ खेल भएको छ । हैदराबाद ११ खेलमा विजयी हुँदा ९ खेलमा पराजित भएको छ ।

अंक तालिका

चेन्नई सुपर किंग्स ८ खेलमा ६ जित र २ मा हार सहित १२ अंक जोड्दै शीर्ष स्थानमा उक्लिएको छ । दिल्ली क्यापिटल्स ८ खेलमा ६ मा जित र २ मा हार सहित १२ अंक भएपनि नेट रनरेटका कारण दोस्रो स्थानमा छ । रोयल च्यालेन्जर्स बेंगलोर ८ खेलमा ५ मा जित र ३ मा हार सहित १० अंक भएपनि नेट रनरेटको आधारमा तेस्रो स्थानमा छ । मुम्बई इन्डियन्स ८ खेलमा ४ मा जित र ४ मा हार सहित ८ अंक बटुल्दै चौथो स्थानमा छ । राजस्थान रोयल्स ८ खेलमा ४ मा हार र ४ मा जित सहित ८ अंकका साथ पाँचौ स्थानमा छ ।

कोलकाता ८ खेलमा ३ जित र ५ मा हार सहित ६ अंकका साथ छैटौ स्थानमा छ । पन्जाब ९ खेलमा ६ मा हार र ३ मा जित सहित ६ अंक जोड्दै सातौं स्थानमा छ । सनराइजर्स हैदराबाद ७ खेलमा ६ मा हार र १ मा जित सहित २ अंक जोड्दै पुछारमा छ ।