काठमाडौं (हाम्रो खेलकुद) – युवा ब्याट्सम्यान कुशल भुर्तेलले चौथो संस्करणको एभरेष्ट प्रिमियर लिग (इपिएल) मा ललितपुर प्याटियट्र्सको कप्तानी गर्ने भएका छन् । नेपाली क्रिकेट टोलीका कप्तान ज्ञानेन्द्र मल्लले इपिएल नखेल्ने भएपछि ललितपुरले कुशललाई कप्तानी जिम्मेवारी दिएको जनाएको छ ।

कुशलले पहिलो पटक कप्तानी गर्ने छन् । कुशलले यसअघि उमेर समूह र घरेलु क्रिकेट कुनै प्रतियोगितामा पनि कप्तानी गरेका छैनन् । कुशलले नेपाली क्रिकेटमा पछिल्लो समय लगातार उत्कृष्ट प्रदर्शन गर्दै आएका छन् । २०१९ मा बंगलादेशमा भएको एसिसी इमर्जिङ टिम्स एसिया कपमा कुशलले भारतको यू२३ विरुद्ध लिष्ट ए मार्फत नेपाली टोलीमा डेब्यू गरेका थिए । गत वैशाखमा भएको नेदरल्यान्ड्स र मलेसियासँग त्रिकोणात्मक टि२० आई सिरिजमा कुशलले टि२० आईमा डेब्यू गर्दै सानदार प्रदर्शन गरेका थिए ।

सुरुवाती तीन खेलमा लगातार टि२० आईमा अर्धशतक प्रहार गर्ने कुशल विश्वको पहिलो खेलाडी हुन् । कुल ५ टि२० आई खेलमा ४ मा अर्धशतक सहित २ सय ७८ रन बनाउँदै सर्वोत्कृष्ट खेलाडी चुनिएका थिए । कुशलले यसै साता ओमान भ्रमणमा पपुवा न्युगिनीविरुद्ध ओडिआई खेलमा डेब्यू गरेका थिए । कुशलले ओडिआईमा ६ खेलमा १ सय ४४ रन बनाएका थिए । अमेरिकासँग पहिलो खेलमा ८४ रन बनाउँदै नेपाललाई पाँच विकेटको जित दिलाउन उत्कृष्ट प्रर्दर्शन गरेका थिए ।

ललितपुरले बिहिबार एक प्रेस विज्ञप्ति मार्फत ज्ञानेन्द्रले इपिएल नखेल्ने जनाएको थियो । ज्ञानेन्द्रले ललितपुरका सिइओ निरज कोइरलालाई इमेल मार्फत आफूले खेल्न नसक्ने जानकारी दिएका थिए। ज्ञानेन्द्रले नखेल्ने भएपछि ललितपुर ठूलो समस्यामा परेको थियो । कुशलपछि पवन सरार्फ सम्भावित दाबेदारमा देखिएका थिए । ललितपुरमा स्वदेशी युवा खेलाडीको बाहुल्यता छ । कुनैपनि खेलाडीले कप्तानी गरेका छैनन् ।

यसअघि विराटनगर वारियर्सका कप्तान पारस खड्का, वसन्त रेग्मी र काठमाडौं किंग्स इलेभेनका दीपेन्द्रसिंह ऐरीले पनि इपिएल नखेल्ने जनाएका थिए । दीपेन्द्र चोटका कारण नखेलेका हुन् । पारस र वसन्तले व्यक्तिगत कारण नखेल्ने जनाएका छन् ।

ललितपुरले विदेशी खेलाडीको रुपमा भुटानका ब्याट्सम्यान मिक्यो दोर्जी, अफगानिस्तानका युवा अलराउन्डर आजमतुल्लाह ओमरजाई, श्रीलंकाली विकेटकिपर ब्याट्सम्यान सन्दुन वीराक्कोडी र ओशदा फर्नान्डो रहेका छन् । सन्दीप जोरा, राशिद खान, पवन सरार्फ, कुशल भुर्तेल, सोनु तामाङ, योगेन्द्रसिंह कार्की, कमल खत्री, रिजन ढकाल, बिभत्सु थापा, अरियो पौडेल, शंखर राना, नारायण जोशी, सुर्य तामाङ र नागराज सिंह स्वदेशी खेलाडीको रुपमा छन् ।

इपिएल असोज ९ देखि २३ सम्म टियुमा हुने छ । इपिएल विजेताले ५० लाख र उप विजेताले १५ लाख रुपैयाँ प्राप्त गर्ने छन् । ललितपुरले २०१८ को फाइनलमा भैरहवा ग्ल्याडियसटर्सलाई १४ रनले पराजित गर्दै उपाधि जितेको थियो । ललितपुरले उद्धघाटन खेलमा काठमाडौं किंग्स इलेभेनसँग खेल्ने छ ।