एजेन्सी – ओपनर क्विन्टन डी कको अर्धशतकमा मुम्बई इन्डियन्सले इन्डियन प्रिमियर लिग (आइपिएल) को ३४ औं खेलमा कोलकता नाइट राइडर्सलाई १ सय ५६ रनको मध्यम लक्ष्य दिएको छ । आबूधाबीमा टस हारेर ब्याटिङको निम्तो पाएको मुम्बईले निर्धारित २० ओभरमा ६ विकेट गुमाउँदै १ सय ५५ रन बनायो ।

मुम्बईका ओपनर क्विन्टन डि ककले ४२ बलमा ४ चौका र ३ छक्का सहित सर्वाधिक ५५ रनको योगदान दिए । मुम्बईलाई ओपनर रोहित शर्मा र डि ककले पहिलो विकेटका लागि ९.२ ओभरमा ७८ रनको साझेदारी गर्दै राम्रो सुरुवात दिलाएका थिए । त्यसपछि भने मुम्बईका ब्याट्सम्यान चल्न सकेनन् । स्पिनर सुनिल नारायणले रोहितलाई सुभमन गिलबाट ३३ रनमा क्याच आउट गर्दै उक्त साझेदारी तोडेका थिए ।

रोहितले ३० बलमा ४ चौका प्रहार गरे । प्रसिद्ध कृष्णको १३ औं ओभरको पहिलो बलमा नारायणबाट डि कक समातिन पुगेका थिए । १५ औं ओभरको पाँचौं बलमा सूर्यकुमार यादवलाई कृष्णले ५ रनमा क्याच आउट गराए । ईशान किशन १३ बलमा १ छक्का सहित १५ रनमा आउट भए । अलराउन्डर काइरन पोलार्ड १५ बलमा २ चौका र १ छक्का सहित २१ रनमा रन आउट भए । क्रुनाल पान्ड्याले ९ बलमा १ छक्का सहित १२ रन बनाए ।

कोलकाता प्रसिद्ध कृष्णले ४ ओभरमा ४३ रन खर्चेर २ विकेट लिए । लोकी फर्गुसनले ४ ओभरमा २७ रन खर्चेर २ विकेट लिए । सुनिल नारायणको नाममा एक विकेट रह्यो ।