एजेन्सी – इन्डियन प्रिमियर लिग (आइपिएल) २०२१ कौं ३५ औं खेलमा आज चेन्नई सुपर किंग्स र रोयल च्यालेन्जर्स बेंगलोरबीच प्रतिस्पर्धा हुँदै छ । खेल नेपाली समय अनुसार साँझ ७ : ४५ मा शारजाह क्रिकेट स्टेडियमा सुरु हुनेछ ।

चेन्नई बेंगलोरलाई पराजित गर्दै अंक तालिका शीर्षस्थानमा उक्लिन चाहन्छ । बेंगलोर चेन्नईलाई पराजित गर्दै दोस्रो स्थानमा उक्लिने सोचमा छ । चेन्नईको भारतीय पूर्व सफल कप्तान महेन्द्रसिंह धोनीले नेतृत्व गर्ने छन् । बेंगलोरको भारतीय वर्तमान टोलीका कप्तान विराट कोहलीले कप्तानी गर्ने छन् । यस खेललाई गुरु र चेलाबीचको भिडन्त अर्थात धोनी र कोहलीबीचको प्रतिस्पर्धाको रुपमा समेत हेरिएको छ ।

चेन्नईले पछिल्लो खेलमा मुम्बई इन्डियन्सलाई २० रनले पराजित गरेको थियो । उक्त खेल चेन्नईले एक समय २५–५ को अवस्थाबाट उत्कृष्ट प्रदर्शन गर्दै जित निकालेको थियो । युवा ओपनर ऋतुराज गायकवाडले ८८ रनको उत्कृष्ट अविजित इनिङ खेलेका थिए । सुरेश रैना, फाफ डु प्लेसिस, धोनी जस्ता खेलाडी हुँदा चेन्नईको ब्याटिङ निकै बलियो छ । ड्वने ब्राभो, रविन्द्र जडेजा र साम करन जस्ता विश्वस्तरिय अलराउन्डर चेन्नईमा छन् । शार्दूल ठाकुर र दीपक चाहर तीव्र गतिका बलिङ हतियार हुन् । शारजाह मैदान छोटो हुँदा आजको खेलमा मोईन अलीको स्थानमा साम करनले मौका पाउन सक्छन् ।

यता बेंगलोरले पछिल्लो खेलमा कोलकता नाइट राइडर्ससँग ९ विकेटले पराजित हुन पुगेको थियो । जसक्रममा बेंगलोर ९२ रनमा अल आउट भएको थियो । बेंगलोरका ब्याट्सम्यानलाई जिम्मेवारीका साथ उत्कृष्ट प्रदर्शन गर्न आवश्यक छ । ग्लेन म्याक्सवेल, विराट र एवि डिभिलियर्स बेंगलोरका प्रमुख हतियार हुन् । देवदत्त पाडिक्कलले पनि लगातार राम्रो प्रदर्शन गर्दै आएका छन् । तल्लोक्रममा काइल जेमिसन र वानिन्दु हसरंगाले राम्रो ब्याटिङ गर्न सक्छन् । स्पिनर युजभेन्द्र चहलको प्रदर्शन निकै महत्वपूर्ण हुनसक्छ । म्याक्सवेल र डिभिलिर्स टोलीमा हुँदा मैदानमा छक्का वर्षा गराउन सक्छन् ।

धोनी आफ्नो मास्टर माइन्ड र कप्तानीमा पनि खेल जिताउन सक्ने गुण भएका कप्तान हुन् । धोनीले आफ्नो कप्तानीमा चेन्नईलाई तीन आइपिएल उपाधि दिलाई सकेका छन् । आइपिएल इतिहासमा चेन्नई पहिलो पटक मात्र गतवर्ष लिगबाटै बाहिरिएको थियो । २०१३ देखि बेंगलोरको कप्तानी गर्दै आएका कोहलीले एक पटक मात्र फाइनल खेलेका छन् । आफ्नो कप्तानीमा तीन पटक प्लेअफमा स्थान बनाउँदा अन्य सिजनमा लिगबाटै बाहिरिएको छ । शारजाह मैदानको बाउन्ड्री छोटो हुँदा रनको वर्षा हुनसक्छ । शारजाहमा २ सय भन्दा कम योगफलमा जित निकाल्न कठिन बन्दै आएको छ ।

हेड टु हेड :
पछिल्ला पाँच भेटमा चेन्नईले बेंगलोरलाई ३ पटक पराजित गरेको छ । यस सिजनको पहिलो खेलमा चेन्नइ ६९ रनले विजयी भएको थियो । आइपिएलमा यी दुई टोलीबीच कुल २७ खेल भएको छ । चेन्नई १७ खेलमा विजयी हुँदा ९ खेलमा पराजित भएको छ ।

अंक तालिका

दिल्ली क्यापिटल्स ९ खेलमा ७ मा जित र २ मा हार सहित १४ अंकका साथ शीर्ष स्थानमा छ । चेन्नई सुपर किंग्स ८ खेलमा ६ जित र २ मा हार सहित १२ अंक जोड्दै दोस्रो स्थानमा छ । रोयल च्यालेन्जर्स बेंगलोर ८ खेलमा ५ मा जित र ३ मा हार सहित १० अंक भएपनि नेट रनरेटको आधारमा तेस्रो स्थानमा छ ।

कोलकाता ९ खेलमा ४ जित र ५ मा हार सहित ८ अंकका साथ चौथो स्थानमा छ । राजस्थान रोयल्स ८ खेलमा ४ मा हार र ४ मा जित सहित ८ अंकका साथ पाँचौ स्थानमा छ । मुम्बई इन्डियन्स ९ खेलमा ४ मा जित र ५ मा हार सहित ८ अंक बटुल्दै छैटौ स्थानमा छ । पन्जाब ९ खेलमा ६ मा हार र ३ मा जित सहित ६ अंक जोड्दै सातौं स्थानमा छ । सनराइजर्स हैदराबाद ८ खेलमा ७ मा हार र १ मा जित सहित २ अंक जोड्दै पुछारमा छ ।