एजेन्सी – चेन्नई सुपर किंग्सले इन्डियन प्रिमियर लिग (आइपिएल) को ३५ औं खेलमा रोयल च्यालेन्जर्स बेंगलोरलाई ६ विकेटले पराजित गर्दै अंक तालिका शीर्षस्थानमा उक्लिएको छ ।

जितको लागि १ सय ५७ रनको विजयी लक्ष्य पछ्याएको चेन्नईले १८.१ ओभरमा ४ विकेट गुमाउँदै पुरा गर्यो । चेन्नईका सुरेश रैना १० बलमा २ चौका र १ छक्का सहित १७ रनमा अविजित रहे । कप्तान महेन्द्रसिंह धोनी ९ बलमा २ चौका सहित ११ रनमा अविजित रहे । चेन्नईलाई ओपनर ऋतुराज गायकवाड र फाफ डु प्लेसिसले पहिलो विकेटका लागि ८.२ ओभरमा ७१ रनको साझेदारी गर्दै राम्रो सुरुवात दिलाएका थिए ।

स्पिनर युजभेन्द्र चहलले कप्तान विराट कोहलीबाट ऋतुराजलाई ३८ रनमा क्याच गराउँदै पहिलो सफलता दिलाए । ऋतुराजले २६ बलमा ४ चौका र १ छक्का प्रहार गरे । फाफ डु प्लेसिस २६ बलमा २ चौका र २ छक्का सहित ३१ रनमा क्याच आउट भए । डु प्लेसिस ग्लेन म्याक्सवेलको बलमा नवदीप सैनीबाट क्याच हुन पुगे । मोईन अली १८ बलमा २ छक्का सहित २२ रनमा क्याच आउट भए । बेगलोरका हर्षल पटेलले सर्वाधिक दुई विकेट लिए । युजभेन्द्र चहल र ग्लेन म्याक्सवेलले एक एक विकेट लिए ।

त्यसअघि शारजाहमा टस हारेर ब्याटिङको निम्तो पाएको बेंगलोरले निर्धारित २० ओभरमा ६ विकेट गुमाउँदै १ सय ५६ रन बनाएको थियो । बेंगलोरका ओपनर देवदत्त पाडिक्कलले ५० बलमा ५ चौका र ३ छक्का सहित सर्वाधिक ७० रनको योगदान दिए । कप्तान विराट कोहलीले ४१ बलमा ६ चौका र १ छक्का सहित ५३ रनको योगदान दिए ।

बेंगलोरलाई कोहली र पाडिक्कलले पहिलो विकेटका लागि १३.२ ओभरमा १ सय ११ रनको उत्कृष्ट साझेदारीका साथ सानदार सुरुवात दिलाएका थिए । ड्वेन ब्राभोको बलमा कोहली रविन्द्र जडेजाबाट क्याच आउट भएपछि बेंगलोरले रन बनाउन सकेको थिएन । एवि डिभिलियर्स १२, म्याक्सवेल ११ रनमा आउट भए । एक समय १६.४ ओभरमा १४०-१ को अवस्थामा रहेको बेंगलोर लगातार विकेट गुमाएपछि सस्तैमा समेटिएको थियो ।

चेन्नईका ड्वेन ब्राभोले ४ ओभरमा २४ रन खर्चेर ३ विकेट लिए । शार्दूल ठाकुरले दुई र दीपक चाहरले एक एक विकेट लिए ।

अंक तालिका

चेन्नई सुपर किंग्स ९ खेलमा ७ जित र २ मा हार सहित १४ अंक जोड्दै शीर्षस्थानमा छ । दिल्ली क्यापिटल्स ९ खेलमा ७ मा जित र २ मा हार सहित १४ अंकका साथ दोस्रो स्थानमा छ । रोयल च्यालेन्जर्स बेंगलोर ९ खेलमा ५ मा जित र ४ मा हार सहित १० अंकका साथ तेस्रो स्थानमा छ । कोलकाता ९ खेलमा ४ जित र ५ मा हार सहित ८ अंकका साथ चौथो स्थानमा छ । राजस्थान रोयल्स ८ खेलमा ४ मा हार र ४ मा जित सहित ८ अंकका साथ पाँचौ स्थानमा छ । मुम्बई इन्डियन्स ९ खेलमा ४ मा जित र ५ मा हार सहित ८ अंक बटुल्दै छैटौ स्थानमा छ । पन्जाब ९ खेलमा ६ मा हार र ३ मा जित सहित ६ अंक जोड्दै सातौं स्थानमा छ । सनराइजर्स हैदराबाद ८ खेलमा ७ मा हार र १ मा जित सहित २ अंक जोड्दै पुछारमा छ ।