काठमाडौं (हाम्रो खेलकुद) – ललितपुर प्याट्रियट्र्सका युवा अलराउन्डर पवन सरार्फले चौथो संस्करणको एभरेष्ट प्रिमियर लिग (इपिएल) मा उद्धघाटन खेलमा काठमाडौं किंग्स इलेभेनविरुद्ध अर्धशतक प्रहार गरेका छन् । टियु मैदानमा टस हारेर ब्याटिङको निम्तो पाएको ललितपुरले १५ ओभरमा ४ विकेट गुमाउँदै १ रन १३ बनाएको छ ।

पवन सरार्फ ४० बलमा ४ चौका र ३ छक्का सहित ५० रनमा अविजित छन् । योगेन्द्रसिंह कार्की १५ बलमा ३ छक्का सहित ३२ रनमा खेलि रहेका छन् । पवनले ४० बलमा ५० रन पूरा गर्दै यस सिजनमा अर्धशतक प्रहार गर्ने पहिलो खेलाडी बनेका थिए । पवनले १५ औं ओभरको चौथो बलमा गुलशन झालाई चौका र पाँचौ बलमा एक रन बटुल्दै आफ्नो अर्धशतक पूरा गरेका थिए ।

तीव्र गतिका बलर जितेन्द्र मुखियाले पहिलो ओभरको पहिलो बलमै कप्तान कुशल भुर्तेललाई शून्यमा आउट गर्दै उत्कृष्ट सुरुवात दिलाएका थिए । कुशल पहिलो बलमा ठूलो सट खेल्ने धुनमा टप एज लागेर विकेटकिपर रहमानउल्लाह गुरबाजबाट क्याच हुँदै गोल्डेन डक पेभिलिएन फर्केका थिए । अन्तिम बलमा जितेन्द्रले श्रीलंका ब्याट्सम्यान सन्दुन वीराकोडीलाई २ रनमा राजु रिजालबाट क्याच गराएका थिए ।

दोस्रो ओभरको तेस्रो बलमा तीव्र गतिका बलर गुलशन झाले श्रीलंका ब्याट्सम्यान ओशदा फर्नान्डोलाई चार रनमा एलबीडब्लू आउट गर्दै ललितपुरलाई ७–३ को अवस्थामा पुर्याएको थियो । चौथो विकेटका लागि पवन सरार्फ र शंकर रानाले ५६ रनको साझेदारी गर्दै ललितपुरको इनिङ उकासेका थिए ।

जितेन्द्रले दशौं ओभरको अन्तिम बलमा शंकरलाई गुरबाजबाट १४ रनमा क्याच गराउँदै साझेदारी तोडेका थिए । पाँचांै विकेटका लागि पवन र योगेन्द्रले उत्कृष्ट साझेदारी गर्दै इनिङ अघि बढाएका छन् ।