काठमाडौं (हाम्रो खेलकुद) – पाकिस्तानका स्टार अलराउन्डर शाहिद अफ्रिदीले चौथो संस्करणको एभरेष्ट प्रिमियर लिग (इपिएल) को उद्धघाटन खेलमा काठमाडौं किंग्स इलेभेनबाट ललितपुर प्याट्रियटर्सविरुद्ध कमजोर बलिङ गरेका छन् । काठमाडौंले ललितपुरलाई १ सय ५८ रनको प्रतिस्पर्धात्मक लक्ष्य दिएको छ । टियु मैदानमा टस हारेर ब्याटिङको निम्तो पाएको ललितपुरले निर्धाारित २० ओभरमा ८ विकेट गुमाउँदै १ सय ५७ रन बनायो ।

ललितपुरका पवन सरार्फले ४४ बलमा ५ चौका र ४ छक्का सहित सर्वाधिक ६१ रनको योगदान दिए । योगेन्द्रसिंह कार्कीले २० बलमा ३ छक्का सहित ३३ रनको योगदान दिए । तल्लोक्रममा नारायण जोशी ४ बलमा ३ चौका सहित १२ रनमा शाहिद अफ्रिदीबाट क्याच आउट भए । भुटानका ब्याट्सम्यान मिक्यो दोर्जी १३ बलमा १ चौका र १ छक्का सहित १७ रनमा अविजित रहे । ललितपुरले १.३ ओभरमा ७–३ को अवस्थाबाट उत्कृष्ट पूनरागमन गर्दै प्रतिस्र्धात्मक लक्ष्य तयार पारेको थियो ।

काठमाडौंका स्पिनर रयान बर्लले ४ ओभरमा २० रन खर्चेर २ विकेट लिए । जितेन्द्र मुखियाले ४ ओभरमा १८ रन खर्चेर ४ विकेट लिए । गुलशन झाले ४ ओभरमा ३५ रन खर्चेर २ विकेट लिए । कप्तान तथा लेगस्पिनर सन्दीप लामिछानेले ४ ओभरमा ४४ रन खर्चिदै खराब प्रदर्शन गरे । शाहिद अफ्रिदीले ४ ओभरमा ३२ रन खर्चिए ।

यस्तो रह्यो इपिएलमा अफ्रिदीको चार ओभर बलिङ

कप्तान सन्दीपले अफ्रिदीलाई छैटौं ओभरमा बलिङमा ल्याएका थिए । अफ्रिदी बलिङमा आउदा ललितपुर ५ ओभरमा २९–३ को अवस्थामा थियो । पहिलो बलमा शंकर रानाले कभरमा एक रन बटुल्दै स्ट्राइक पवन सरार्फलाई दिएका थिए । सरार्फले दोस्रो बलमा अफ्रिदीलाई अङअफमा छक्का प्रहार गर्दै स्वागत गरेका थिए । तेस्रो बलमा पवनले दुई रन र चौथो बलमा अफ्रिदीलाई मिड विकेटमा चौका प्रहार गरे । पाँचौ बल डट खादा अन्तिम बलमा लेग वाईको रुपमा पनवले एक रन बटुलेका थिए ।

आठौं ओभरमा अफ्रिदीले तीन रन खर्चिए । पहिलो बल शंकरले डट खादा दोस्रो बलमा एक रन बटुलेका थिए । अफ्रिदीको तेस्रो बलमा पवनले एक रन बटुले । चौथो बल शंकरले डट र पाँचौ बलमा एक रन जोडेका थिए । अफ्रिदीले अन्तिम बल डट राखे ।

त्यसपछि सन्दीपले अफ्रिदीलाई १४ औं ओभरमा ल्याएका थिए । तर अफ्रिदीको प्रदर्शन राम्रो हुन सकेन । यस ओभरमा अफ्रिदीले १० औं रन खर्चेका थिए । अफ्रिदीको पहिलो बलमा योगेन्द्रले एक रन बटुलेका थिए । दोस्रो बल अफ्रिदीले डट राख्दा तेस्रो, चौथो र पाँचौ बलमा एक एक रन खर्चेका थिए । अन्तिम बलमा योगेन्द्रले अफ्रिदीलाई लङअफमा छक्का प्रहार गरेका थिए ।

अफ्रिदीले स्पेलको अन्तिम ओभरमा ६ रन खर्चे । १६ औं ओभरको पहिलो र दोस्रो बल अफ्रिदीले योगेन्द्रलाई डट राखे । तेस्रो बलमा एक रन खर्चिदा चौथो बलमा पवनले थर्ड म्यानमा चौका प्रहार गरेका थिए । पाँचौं बलमा एक रन खर्चिदा अन्तिम बल डटका साथ अन्त्य गरे । समग्रमा अफ्रिदीले ४ ओभरमा ३२ रन खर्चिदा विकेट लिन सकेनन् ।