काठमाडौं (हाम्रो खेलकुद) – जिम्बावेका अलराउन्डर सिकन्दर राजाको अर्धशतकमा चौथो संस्करणको एभरेष्ट प्रिमियर लिग (इपिएल) मा विराटनगर वारियर्सले चितवन टाइगर्सलाई १ सय ५२ रनको मध्यम लक्ष्य दिएको छ । टियु मैदानमा टस हारेर ब्याटिङको निम्तो पाएको विराटनगरले निर्धारित २० ओभरमा ९ विकेट गुमाउँदै १ सय ५१ रन बनायो ।

विराटनगरका सिकन्दर राजाले ४७ बलमा २ चौका र ७ छक्का सहित सर्वाधिक ६७ रनको योगदान दिए । राजाले ३७ बलमा अर्धशतक पूरा गरे । राजाले १५ औं ओभरको तेस्रो बलमा स्पिनर सागर ढकाललाई लङअफमा छक्का प्रहार गर्दै अर्धशतक पूरा गरेका थिए । सौरभ खनाल १९ बलमा ३ चौका र २ छक्का सहित ३० रनमा अविजित रहे ।

तीव्र गतिका बलर तथा कप्तान सोमपाल कामीले पहिलो ओभरमै दुई विकेट लिँदै चितवनलाई सानदार सुरुवात दिलाएका थिए । ओपनर आसिफ शेखलाई दोस्रो बलमा सोमपालले शून्यमा क्याच गराएका थिए । आसिफ सोमपालको बलमा टप एज लागेर करिम जन्नतबाट क्याच आउट हुँदै गोल्डेन डक पेभिलिएन फर्के । अन्तिम बलमा सोमपालले रयानखान पठानलाई ४ रनमा बोल्ड आउट गरे । अर्का तीव्र गतिका बलर कमलसिंह ऐरीले दोस्रो ओभरको पाँचौ बलमा वेस्टइन्डिजका ओपनर चन्द्रपाउल हेमराजलाई २ रनमा बोल्ड आउट गरेपछि विराटनगरले ९–३ को अवस्थामा पुगेको थियो ।

उक्त खराब अवस्थाबाट चौथो विकेटका लागि अनिलकुमार शाह र सिकन्दर राजाले ६१ रनको महत्वपूर्ण साझेदारी गर्दै संकट टारेका थिए । ११ औं ओभरको पाँचौ बलमा स्पिनर सागर ढकालले अनिललाई ३२ रनमा बोल्ड आउट गर्दै सफलता दिलाएका थिए । अनिलले ३१ बलमा ३ चौका र १ छक्का प्रहार गरे । लगत्तै अर्कोबलमा सुमित महर्जन एलबीडब्लू आउट हुँदै गोल्डेन डक पेभिलिएन फर्केका थिए । १२ औं ओभरको पाँचौ बलमा करण केसी १ रनमै आउट भएपछि विराटनगर ७३–६ को कमजोर अवस्थामा पुगेको थियो ।

त्यसअघि अनिलले ब्यक्तिगत १ रनमा जीवनदान पाएका थिए । कमलको चौथो ओभरको तेस्रो बलमा फस्ट स्लिपमा राजेश पुलामीले क्याच ड्रप गरेका थिए । राजा कमलको १८ औं ओभरको चौथो बलमा ठूलो सट प्रहार गर्नेधुनमा डिप मिडविकेटमा भीम सार्कीबाट क्याच आउट हुन पुगे । सातौं विकेटका लागि राजा र खनालले ५१ रनको साझेदारी गरेका थिए । विक्रम भुषाल ७ रनमा आउट हुँदा प्रतिश जिसीले खाता खोल्न सकेनन् ।

चितवनका सोमपाल कामीले ४ ओभरमा ३४ रन खर्चेर २ विकेट लिए । कमलसिंह ऐरीले ४ ओभरमा १९ रन खर्चेर २ विकेट लिए । स्पिनर सागर ढकालले ३ ओभरमा १४ रन खर्चेर २ विकेट लिए । करिम जन्नतले २ र साहब आलमले एक विकेट लिए ।