काठमाडौं (हाम्रो खेलकुद) – चितवन टाइगर्सले एभरेष्ट प्रिमियर लिग (इपिएल) मा रोमान्चक विजयी सुरुवात गरेको छ । आइतबार चितवनले विराटनगर वारियर्सलाई २ विकेटले पराजित गर्दै प्रतियोगितामा रोमान्चक विजयी सुरुवात गरेको हो ।

जितका लागि १ सय ५२ रनको विजयी लक्ष्य पछ्याएको चितवनले २० ओभरमा ८ विकेट गुमाउँदै पूरा गर्यो । चितवनलाई जितको लागि अन्तिम ६ बलमा २ रन चाहिँएको थियो । युवा स्पिनर अनिल खरेलले सुरुवाती पाँच बलमा १ रन खर्चेर १ विकेट लिएपछि खेल रोमान्चक बनेको थियो । अन्तिम बलमा एक रन चाहिँएको अवस्थामा राजेश पुलामीले चौका प्रहार गर्दै चितवनलाई रोमान्चक जित पक्का गराए ।

अनिलले पहिलो बलमा कमललाई बोल्ड आउट गरे । दोस्रो बल साहब आलमलाई डट राल्दा तेस्रो बलमा एक रन खर्चिए । राजेशले चौथो र पाँचौ बलमा रन जोड्न नसकेपछि खेल रोमान्चक बनेको थियो । चितवनको जितमा राजेश पुलामी ३९ बलमा २ चौका र २ छक्का सहित सर्वाधिक ४३ रनमा अविजित रहे ।

विराटनगरलाई युवा बायाँ हाते तीव्र गतिका बलर प्रतिश जि.सी.ले दोस्रो ओभरको दोस्रो बलमा चितवनका प्रमुख ब्याट्सम्यान मोहम्मद शाहजादलाई विकेटकिपर आसिफ शेखबाट एक रनमा क्याच आउट गर्दै उत्कृष्ट सुरुवात दिलाएका थिए । तेस्रो ओभरको तेस्रो बलमा सिकन्दर राजाले ईशान पाण्डेलाई १० रनमा एलबीडब्लू आउट गरे । ईशानले ७ बलमा १ चौका र १ छक्का प्रहार गरे ।

युवा ब्याटर भीम सार्की ११ बलमा ५ चौका र १ छक्का सहित ३० रन जोड्दै क्याच आउट भए । भीम करण केसीको छैटौं ओभरको तेस्रो बलमा आसिफबाट क्याच हुन पुगेका थिए । त्यसअघि भीमले राजालाई पाँचौ ओभरको अन्तिम चार बलमा लगातार चार चौका प्रहार गरेका थिए ।
उपकप्तान दीलिपनाथ २१ बलमा १ चौका र २ छक्का सहित २३ रनमा आउट भए ।

करिम जन्नत १९ र सोमपाल कामी ९ रनमा आउट भए । विराटनगरका सिकन्दर राजाले ४ ओभरमा ३४ रन खर्चेर २ विकेट लिए । प्रतिश जि.सी.ले ४ ओभरमा २१ रन खर्चेर १ विकेट लिए । करण केसी र रयानखान पठान र अनिल खरेलको नाममा एक एक विकेट रह्यो ।

त्यसअघि टियु मैदानमा टस हारेर ब्याटिङको निम्तो पाएको विराटनगरले निर्धारित २० ओभरमा ९ विकेट गुमाउँदै १ सय ५१ रन बनाएको थियो । विराटनगरका सिकन्दर राजाले ४७ बलमा २ चौका र ७ छक्का सहित सर्वाधिक ६७ रनको योगदान दिएपनि टोली पराजित हुन पुग्यो । राजाले ३७ बलमा अर्धशतक पूरा गरेका थिए । राजाले १५ औं ओभरको तेस्रो बलमा स्पिनर सागर ढकाललाई लङअफमा छक्का प्रहार गर्दै अर्धशतक पूरा गरेका थिए । सौरभ खनाल १९ बलमा ३ चौका र २ छक्का सहित ३० रनमा अविजित रहे ।

तीव्र गतिका बलर तथा कप्तान सोमपाल कामीले पहिलो ओभरमै दुई विकेट लिँदै चितवनलाई सानदार सुरुवात दिलाएका थिए । ओपनर आसिफ शेखलाई दोस्रो बलमा सोमपालले शून्यमा क्याच गराएका थिए । आसिफ सोमपालको बलमा टप एज लागेर करिम जन्नतबाट क्याच आउट हुँदै गोल्डेन डक पेभिलिएन फर्के । अन्तिम बलमा सोमपालले रयानखान पठानलाई ४ रनमा बोल्ड आउट गरे । अर्का तीव्र गतिका बलर कमलसिंह ऐरीले दोस्रो ओभरको पाँचौ बलमा वेस्टइन्डिजका ओपनर चन्द्रपाउल हेमराजलाई २ रनमा बोल्ड आउट गरेपछि विराटनगरले ९–३ को अवस्थामा पुगेको थियो ।

उक्त खराब अवस्थाबाट चौथो विकेटका लागि अनिलकुमार शाह र सिकन्दर राजाले ६१ रनको महत्वपूर्ण साझेदारी गर्दै संकट टारेका थिए । ११ औं ओभरको पाँचौ बलमा स्पिनर सागर ढकालले अनिललाई ३२ रनमा बोल्ड आउट गर्दै सफलता दिलाएका थिए । अनिलले ३१ बलमा ३ चौका र १ छक्का प्रहार गरे । लगत्तै अर्कोबलमा सुमित महर्जन एलबीडब्लू आउट हुँदै गोल्डेन डक पेभिलिएन फर्केका थिए । १२ औं ओभरको पाँचौ बलमा करण केसी १ रनमै आउट भएपछि विराटनगर ७३–६ को कमजोर अवस्थामा पुगेको थियो ।

त्यसअघि अनिलले ब्यक्तिगत १ रनमा जीवनदान पाएका थिए । कमलको चौथो ओभरको तेस्रो बलमा फस्ट स्लिपमा राजेश पुलामीले क्याच ड्रप गरेका थिए । राजा कमलको १८ औं ओभरको चौथो बलमा ठूलो सट प्रहार गर्नेधुनमा डिप मिडविकेटमा भीम सार्कीबाट क्याच आउट हुन पुगे । सातौं विकेटका लागि राजा र खनालले ५१ रनको साझेदारी गरेका थिए । विक्रम भुषाल ७ रनमा आउट हुँदा प्रतिश जिसीले खाता खोल्न सकेनन् ।

चितवनका सोमपाल कामीले ४ ओभरमा ३४ रन खर्चेर २ विकेट लिए । कमलसिंह ऐरीले ४ ओभरमा १९ रन खर्चेर २ विकेट लिए । स्पिनर सागर ढकालले ३ ओभरमा १४ रन खर्चेर २ विकेट लिए । करिम जन्नतले २ र साहब आलमले एक विकेट लिए । विराटनगरले सोमबार काठमाडौं किंग्स इलेभेनसँग खेल्ने छ । सोमबार चितवनले भैरहवा ग्ल्याडियटर्ससँग खेल्ने छ ।