काठमाडौं (हाम्रो खेलकुद) – चितवन टाइगर्सले एभरेष्ट प्रिमियर लिग (इपिएल) मा दोस्रो खेलमा विराटनगर वारियर्सविरुद्ध २ विकेटको रोमान्चक जित हात पार्यो । चितवनको जितमा नेपाली खेलाडी नायक बन्दा विदेशी खेलाडी भने खासै चलेनन् ।

जितका लागि १ सय ५२ रनको विजयी लक्ष्य पछ्याएको चितवनले २० ओभरमा ८ विकेट गुमाउँदै पूरा गरेको थियो । चितवनको जितमा राजेश पुलामी ३९ बलमा २ चौका र २ छक्का सहित सर्वाधिक ४३ रनमा अविजित रहे । भीम सार्की ३०, दीलिप नाथ २३ र करिम जान्नत १९ रनमा आउट भए । विराटनगरका लागि जिम्बावेका सिकन्दर राजा र करण केसीले २-२ विकेट लिए ।

त्यसअघि टियु मैदानमा टस हारेर ब्याटिङको निम्तो पाएको विराटनगरले निर्धारित २० ओभरमा ९ विकेट गुमाउँदै १ सय ५१ रन बनाएको थियो । विराटनगरका सिकन्दर राजाले ४७ बलमा २ चौका र ७ छक्का सहित सर्वाधिक ६७ रनको योगदान दिए । सौरभ खनाल १९ बलमा ३ चौका र २ छक्का सहित ३० रनमा अविजित रहे । अनिल कुमार शाहले ३२ रनको योगदान दिए । चितवनका सोमपाल कामी, कमलसिंह ऐरी र स्पिनर सागर ढकालले २–२ विकेट लिए ।

चितवन विजयी भएपनि पहिलो खेलमा विदेशी खेलाडीको प्रदर्शन अपेक्षा अनुसार हुन सकेन । विराटनगरका सिकन्दर राजा बाहेक अन्य विदेशी खेलाडीले राम्रो प्रदर्शन गर्न सकेनन् । चितवन स्वदेशी खेलाडीको उच्च प्रदर्शनमा विजयी भएको थियो । विशेषगरि ठूलो अपेक्षा गरिएका अफगानिस्तानका विष्फोटक ब्याट्सम्यान मोहम्मद शाहजाद पहिलो खेलमा चल्न सकेनन् । दोस्रो खेलमा ६ विदेशी खेलाडीको प्रदर्शन यस प्रकार रह्यो ।

सिकन्दर राजा (विराटनगर)

जिम्बावेका अलराउन्डर सिकन्दर राजाले उत्कृष्ट प्रदर्शन गरेपनि टोलीको हार टार्न सकेनन् । राजाले ब्याटिङमा ६७ रन बनाउनुको साथै २ विकेट लिएका थिए । राजा दोस्रो ओभरको अन्तिम बलमा मैदान प्रवेश गरेका थिए । कमलसिंह ऐरीले दोस्रो ओभरको पाँचौ बलमा वेस्टइन्डिजका ओपनर चन्द्रपाउल हेमराजलाई २ रनमा आउट गरेपछि उनी मैदान छिरेका थिए ।

राजाले ४७ बलमा २ चौका र ७ छक्का सहित सर्वाधिक ६७ रन जोडेपछि विराटनगरले राम्रो पूनरागमन गरेको थियो । राजाले बलिङमा ४ ओभरमा ४३ रन खर्चेर २ विकेट लिए । जसक्रममा राजालाई पाँचौ ओभरको अन्तिम चार बलमा भीम सार्कीले लगातार चौका प्रहार गरेपछि एकै ओभरमा १७ रन खर्चेका थिए ।

चन्द्रपल हेमराज (विराटनगर)

वेस्टइन्डिजका तथा विराटनगरका ओपनर चन्द्रपल हेमराज भने पहिलो खेलमा चल्न सकेनन् । उनी २ रन बनाउदै आउट भए । सोमपालको पहिलो बलमै हेमराजले एक रन बटुलेका थिए । तेस्रो बलमा लेगवाईको रुपमा एक रन जोडे । त्यसपछि पहिलो ओभरमा उनले स्ट्राइक पाएनन् । कमलसिंह ऐरीले दोस्रो ओभरको पहिलो बलमा उनले एक रन जोडेका थिए । चौथो बल डट खादा पाँचौ बलमा कमलले बोल्ड आउट गरे ।

रयानखान पठान (विराटनगर)

क्यानडा तथा विराटनगरका रयानखान पठान पनि पहिलो खेलमा चल्न सकेनन् । सोमपाललाई पहिलो ओभरको चौथो बलमा चौका प्रहार गर्दै पठानले राम्रो सुरुवातको संकेत दिएका थिए । पाँचौ बल डट खादा अन्तिम बलमा बोल्ड आउट हुन पुगे । बलिङमा उनले ३ ओभरमा २१ रन खर्चेर १ विकेट लिए । उनले करिम जन्नतलाई आउट गरेका थिए ।

मोहम्मद शाहजाद (चितवन)

अफगानिस्तानका विष्फोटक ब्याट्सम्यान मोहम्मद शाहजाद पहिलो खेलमा चल्न सकेनन् । चितवनका ओपनर शाहजादले पहिलो ओभरको चौथो बलमा स्ट्राइक पाएका थिए । उक्त बलमा रन जोडन सकेनन् । पाँचौ बल डट खाएका राजाले अन्तिम बलमा एक रन बटुले ।

युवा बलर प्रतिश जि.सीको दोस्रो ओभरको पहिलो बलमा शाहजादले लेगवाइको रुपमा चार रन जोडेका थिए । तर अर्को बलमा शाहजाद विकेटकिपर आसिफ शेखबाट क्याच क्याच आउट हुँदै एक रनमा पेभिलिएन फर्केका थिए ।

शेकुगे प्रसन्ना (चितवन)

श्रीलंका स्पिनर प्रसन्नाले एक ओभरमा १७ रन खर्चिएका थिए । उनलाई कप्तान करणले नवौं ओभरमा बलिङमा ल्याएका थिए । सिकन्दर राजाले पहिलो बलमा चौका र दोस्रो बलमा छक्का प्रहार गरे । अनिलले पाँचौ बलमा छक्का प्रहार गरेपछि उनको प्रर्दशन कमजोर रहेको थियो । ब्याटिङमा ३ रनमा रन आउट थिए ।

करिम जान्नत (चितवन)

अफगानिस्तानका अलराउन्डर करिम जान्नतको प्रदर्शन अलराउन्ड रह्यो । बलिङमा करिमले ४ ओभरमा ३२ रन खर्चेर २ विकेट लिए । करिमले अन्तिम ओभरमा दुई विकेट लिए । करिमले दोस्रो बलमा विक्रम भुषाललाई ७ र प्रशितलाई शून्यमा एलबीडब्लू आउट गरेका थिए ।
ब्याटिङमा उनले १८ बलमा १ चौका र १ छक्का १९ रनमा आउट भए । ब्याटिङमा उनले १८ बलमा १ चौका र १ छक्का सहित १९ रनमा आउट भए ।