काठमाडौं (हाम्रो खेलकुद) – चौथो संस्करणको एभरेष्ट प्रिमियर लिग (इपिलए) को तेस्रो खेलमा पोखरा राइनोज र भैरहवा ग्ल्याडियटर्सले वर्षाको कारण बाँडेका छन् । वर्षाको कारण खेल हुन नसकेपछि दुवै टोलीले १-१ अंक बाँडेका हुन् ।

आइतबार दोस्रो खेलमा टियु मैदानमा टस जितेर पहिला ब्याटिङ थालेको पोखराले १०.१ ओभरमा ६५–७ को अवस्थामा खेल वर्षाको कारण रोकिएको थियो । निरन्तर वर्षाका कारण खेल सुचारु हुन सम्भव नहुँदा अंक बाँडेका हुन् । वर्षाले खेल रोकिनु अघि विक्रम सोब ७ र विवेक यादव १६ रनमा अविजित थिए ।

तीव्र गतिका बलर धाम्मिका प्रसादले पहिलो ओभरको दोस्रो बलमै ओपनर रिचार्ड लेभीलाई कभरमा कप्तान शरद भेषावकरबाट एक रनमा क्याच आउट गराउँदै राम्रो सुरुवात दिलाएका थिए । लेभी सुरुवातमै आउट भएपछि पोखरा अन्य ब्याट्सम्यान क्रिजमा सम्हालिन सकेनन् । बायाँ हाते तीव्र गतिका बलर दुर्गेश गुप्ताले दोस्रो ओभरको अन्तिम दुई बलमा लगातार दुई विकेट लिँदै भैरहवालाई सानदार सुरुवात दिलाएका थिए ।

इपिएलमा पाहिलो खेल खेलि रहेका दुर्गेशले दोस्रो ओभरको पाँचौ बलमा बायाँ हाते विपिन रावललाई ६ रनमा प्रदीप ऐरीबाट क्याचा गराए । अर्को बलमा कप्तान विनोद भण्डारीलाई शून्यमा बोल्ड आउट गरे । विनोद गोल्डेन डक आउट भए ।

चौथो ओभरको पहिलो बलमा धमला विकेट लिन नसकेपछि ह्याट्रिकबाट चुकेका थिए । तर लगत्तै अर्को बलमा धमलालाई एक रनमा दुर्गेशले बोल्ड आउट गरे । पाँचौं ओभरको पहिलो बलमा अभिनाशले लोकेश बमलाई आरिफ शेखबाट शून्यमा क्याच आउट गराएपछि पोखरा १२–५ को कमजोर अवस्थामा पुगेको थियो । लोकेश पनि गोल्डेन डक भएका थिए ।

असेला गुणरत्नेलाई तमिम इकबालले २३ रनमा रन आउट गरे । पहिलो पटक इपिएल खेलेका चाइनामेन तुलबहादुर थापाले केस्रिक विलियम्सलाई शून्यमा एलबीडब्लू आउट गर्दा पोखरा ८।४ ओभरमा ५७–७ को दयनीय अवस्थामा पुगेको थियो ।

दुर्गेश गुप्ताले ३ ओभरमा १ मेडन सहित १६ रन खर्चेर २ विकेट लिए । धाम्मिका प्रसाद, तुलबहादुर थापा र अभिनाश बोहराले एक एक विकेट लिए । भैरहवाले सोमबार चितवन टाइगर्ससँग खेल्ने छ । पोखरााले मंगलबार काठमाडौं किंग्स इलेभेनसँग खेल्ने छ ।