एजेन्सी – चेन्नई सुपर किंग्सले इन्डियन प्रिमियर लिग (आइपिएल) मा कोलकाता नाइट राइडर्सलाई २ विकेटले पराजित गर्दै अंक तालिका शीर्षस्थानमा उक्लिएको छ । चेन्नई १६ अंकका साथ प्लेअफ लगभग पक्कापक्की भएको छ । औपचारिक मात्र बाँकी छ ।

जितको लागि १ सय ७२ रनको विजयी लक्ष्य पछ्याएको चेन्नईले निर्धारित २० ओभरमा ८ विकेट गुमाउँदै पूरा गर्यो । चेन्नईलाई अन्तिम १२ बलमा २६ रन चाहिँएको थियो । १९ औं ओभरमा रविन्द्र जडेजाले तीव्र गतिका बलर प्रसिद्ध कृष्णलाई दुई चौका र दुई छक्का सहित कुल २२ रन जोडेपछि नतिजा चेन्नईको पक्षमा गएको थियो । तर अन्तिम ओभरमा जितको लागि ४ रन आवश्यक परेको अवस्थामा खेल थप रोचक बनेको थियो । स्पिनर सुनिल नारायणले अन्तिम ओभरमा उत्कृष्ट बलिङ गरेपछि खेल अन्तिम बलमा पुगेको थियो । अन्तिम बलमा एक रन चाहिँएको अवस्थामा दीपक चाहरले एक रन बटुल्दै जित पक्का गराए ।

रविन्द्र जडेजाले तल्लोक्रममा ८ बलमा २ चौका र २ छक्का सहित २२ रनमा आउट भए । चेन्नईका ओपनर फाफ डु प्लेसिसले ३० बलमा ७ चौका सहित सर्वाधिक ४३ रनको योगदान दिए । ऋतुराज गायकवाड २८ बलमा २ चौका र ३ छक्का सहित ४० रन बनाउँदै आउट भए । पहिलो विकेटका लागि फाफ डु प्लेसिस र ऋतुराज गायकवाडले ८.२ ओभरमा ७४ रनको साझेदारी गर्दै राम्रो सुरुवात दिलाएका थिए । मोईन अली २८ बलमा २ चौका र १ छक्का सहित ३२ रनमा आउट भए । महेन्द्रसिंह धोनी १, अम्बाती रायुडू ९ र सुरेश रैना ११ रनमा आउट भए ।

कोलकाता स्पिनर सुनिल नारायणले ४ ओभरमा ४१ रन खर्चेर सर्वाधिक तीन विकेट लिए । प्रसिद्ध कृष्ण, लोकी फर्गुसन, बरुणचक्रवर्ती र आन्द्रे रसेलले एक एक विकेट लिए ।

त्यसअघि आबूधाबीमा टस जितेर पहिला ब्याटिङ थालेको कोलकाताले निर्धारित २० ओभरमा ६ विकेट गुमाउँदै १ सय ७१ रन बनाएको थियो । कोलकाता राहुल त्रिपाठीले ३३ बलमा ४ चौका र १ छक्का सहित सर्वाधिक ४५ रनको योगदान दिए । नितिश राणा २७ बलमा ३ चौका र १ छक्का सहित ३७ रनमा अविजित रहे । ओपनर सुभमन गिल पहिलो ओभरको अन्तिम बलमा ९ रनमा रन आउट भए । तीव्र गतिका बलर शार्दूल ठाकुरले छैटौं ओभरको पहिलो बलमा वेंकटेश ऐरलाई महेन्द्रसिंह धोनीबाट १८ रनमा क्याच आउट गराए । ऐरले १५ बलमा ३ चौका प्रहार गरे ।

कप्तान ओईन मोर्गन ८ रनमा क्याच आउट भए । मोर्गन जोश हेजलवुडको बलमा फाफ डु प्लेसिसबाट क्याच आउट भए । १७ औं ओभरको चौथो बलमा ठाकुरले आन्द्रे रसेललाई २० बोल्ड आउट गरे । रसेलले १५ बलमा २ चौका र १ छक्का प्रहार गरे । चेन्नईका शार्दूल ठाकुरले ४ ओभरमा १ मेडन सहित २० रन खर्चेर २ विकेट लिए । जोश हेजलवुडले २ र रविन्द्र जडेजाले एक विकेट लिए ।

अंक तालिका

चेन्नई सुपर किंग्स १० खेलमा ८ जित र २ मा हार सहित १६ अंक जोड्दै शीर्षस्थानमा छ । दिल्ली क्यापिटल्स १० खेलमा ८ मा जित र २ मा हार सहित १६ अंकका साथ शीर्षस्थानमा छ । दिल्ली र चेन्नईको प्लेअफ लगभग निश्चित भएको छ । औपचारिक मात्र बाँकी छ । आइापिएल इतिहासमा १६ अंक भएर पनि प्लेअफ नखेलेको रेकर्ड छैन । रोयल च्यालेन्जर्स बेंगलोर ९ खेलमा ५ मा जित र ४ मा हार सहित १० अंकका साथ तेस्रो स्थानमा छ । कोलकाता १० खेलमा ४ जित र ६ मा हार सहित ८ अंकका साथ चौथो स्थानमा छ ।

पन्जाब १० खेलमा ६ मा हार र ४ मा जित सहित ८ अंक जोड्दै पाँचौ स्थानमा छ । मुम्बई इन्डियन्स ९ खेलमा ४ मा जित र ५ मा हार सहित ८ अंक बटुल्दै छैटौं स्थानमा छ । राजस्थान रोयल्स ९ खेलमा ५ मा हार र ४ मा जित सहित ८ अंकका साथ सातौ स्थानमा छ । सनराइजर्स हैदराबाद ९ खेलमा ८ मा हार र १ मा जित सहित २ अंक जोड्दै पुछारमा छ ।