एजेन्सी – अलराउन्डर ग्लेन म्याक्सवेलको अलराउन्ड प्रदर्शन र तीव्र गतिका बलर हर्षल पटेलको ह्याट्रिकमा रोयल च्यालेन्जर्स बेंगलोरले इन्डियन प्रिमियर लिग (आइपिएल) मा साविक विजेता मुम्बई इन्डियन्सलाई ५४ रनले पराजित गरेको छ ।

जितको लागि १ सय ६६ रनको विजयी लक्ष्य पछ्याएको मुम्बईले १८.१ ओभरमा १ सय ११ रनमा अल आउट भयो । मुम्बईका ओपनर रोहित शर्माले २८ बलमा ५ चौका र १ छक्का सहित सर्वाधिक ४३ रनको योगदान दिए । क्विन्टन डि कक २३ बलमा ४ चौका सहित २४ रनमा आउट भए ।

मुम्बईका ९ खेलाडीले दोहोरो अंकमा रन बनाउन सकेनन् । ईशान किशन ९, सूर्यकुमार यादव ८ र क्रुनाल पान्ड्या ५ रनमा आउट भए ।
मुम्बईलाई रोहित शर्मा र क्विन्टन डि ककले पहिलो विकेटका लागि ६.४ ओभरमा ५७ रनको साझेदारी गर्दै राम्रो सुरुवात दिलाएका थिए । स्पिनर युजभेन्द्र चहलले डि ककलाई ग्लेन म्याक्सवेलबाट क्याच गराउँदै पहिलो सफलता दिलाएका थिए । दशौं ओभरको अन्तिम बलमा म्याक्सवेलले रोहितलाई देवदत्त पाडिक्कलबाट क्याच गराउँदै बेंगलोरलाई महत्वपूर्ण सफलता दिलाएका थिए । त्यसपछिका ब्याट्सम्यान चल्न सकेनन् ।

हर्षलले १७ औं ओभरमा ह्याट्रिक लिएका थिए । हर्षलको १७ औं ओभरको पहिलो बलमा हार्दिक पान्ड्या एक्स्ट्राकभरमा विराट कोहलीबाट ३ रनमा क्याच आउट हुन पुगे । दोस्रो बलमा अर्का विष्फोटक ब्याट्सम्यान काइरन पोलार्ड ७ रनमा बोल्ड आउट भएपछि मुम्बईको जितको सम्भावना लगभग सकिएको थियो । तेस्रो बलमा राहुल चाहरलाई एलबीडब्लू आउट गर्दै हर्षलले ह्याट्रिक लिएका थिए । उनी बेंगलोरबाट आपिएलमा ह्याट्रिक लिने तेस्रो खेलाडी बनेका छन् ।

बेंंगलोरका हर्षल पटेलले ३.१ ओभरमा १७ रन खर्चेर ४ विकेट लिए । ग्लेन म्याक्सवेलले ४ ओभरमा २३ रन खर्चेर २ विकेट लिए । युजभेन्द्र चहलले ४ ओभरमा १ मेडन सहित ११ रन खर्चेर ३ विकेट लिए । मोहम्मद शिराजको नाममा एक विकेट रह्यो ।

त्यसअघि दुबईमा टस हारेर ब्याटिङको निम्तो पाएको बेंगलोरले निर्धारित २० ओभरमा ६ विकेट गुमाउँदै १ सय ६५ रन बनाएको थियो । भारतका कप्तान विराट कोहलीले ४२ बलमा ३ चौका र ३ छक्का सहित ५१ रनको योगदान दिए । ग्लेन म्याक्सवेलले ३७ बलमा ६ चौका र ३ छक्का सहित सर्वाधिक ५६ रनको योगदान दिए ।

सिकर भरतले २४ बलमा २ चौका र २ छक्का सहित ३२ रन बनाए । एवि डिभिलियर्स ६ बलमा १ चौका र १ छक्का सहित ११ रनमा आउट भए । जस्प्रित बुमराहले ४ ओभरमा ३६ रन खर्चेर ३ विकेट लिए । ट्रेन्ट बोल्ट, एडम मिल्ने र राहुल चाहरले एक एक विकेट लिए ।

अंक तालिका

चेन्नई सुपर किंग्स १० खेलमा ८ जित र २ मा हार सहित १६ अंक जोड्दै शीर्षस्थानमा छ । दिल्ली क्यापिटल्स १० खेलमा ८ मा जित र २ मा हार सहित १६ अंकका साथ शीर्षस्थानमा छ । दिल्ली र चेन्नईको प्लेअफ लगभग निश्चित भएको छ । औपचारिक मात्र बाँकी छ । आइपिएल इतिहासमा १६ अंक भएर पनि प्लेअफ नखेलेको रेकर्ड छैन । रोयल च्यालेन्जर्स बेंगलोर १० खेलमा ६ मा जित र ४ मा हार सहित १२ अंकका साथ तेस्रो स्थानमा छ । कोलकाता १० खेलमा ४ जित र ६ मा हार सहित ८ अंकका साथ चौथो स्थानमा छ ।

पन्जाब १० खेलमा ६ मा हार र ४ मा जित सहित ८ अंक जोड्दै पाँचौ स्थानमा छ । राजस्थान रोयल्स ९ खेलमा ५ मा हार र ४ मा जित सहित ८ अंकका साथ छैटौं स्थानमा छ । मुम्बई इन्डियन्स १० खेलमा ४ मा जित र ६ मा हार सहित ८ अंक बटुल्दै सातौ स्थानमा छ । सनराइजर्स हैदराबाद ९ खेलमा ८ मा हार र १ मा जित सहित २ अंक जोड्दै पुछारमा छ ।