काठमाडौं (हाम्रो खेलकुद) – चौथो संस्करणको एभरेष्ट प्रिमियर लिग (इपिएल) मा सोमबार दोस्रो खेलमा भैरहवा ग्ल्याडियटर्स र चितवन टाइगर्सबीचको खेल निर्धारित समय भन्दा ढिलो सुरु हुने भएको छ । टियु मैदानको चिसो आउटफिल्ट (भिजेको) कारण दोस्रो खेल ढिला हुने निश्चित भएको छ ।

निर्धारित समय अनुसार खेल १:३० सुरु हुने कार्यक्रम थियो । त्यसका लागि टस १ बजे हुनुपर्ने थियो । तर मैदानमा अम्पायरले निरिक्षण गरेर फर्किएका छन् । भैरहवाका कप्तान शरद भेषावकर र चितवनका सोमपाल कामीसँग छलफलपछि अम्पायरले टस स्थगित गरेका हुन् ।

अब अम्पायरले केहिबेरमा पुन: मैदान निरीक्षण गर्नेछन् । खेल ढिलो हुने भएपछि भैरहवा रोहित कुमार पौडैल सहितका केहि खेलाडी नेटमा ब्याटिङ गर्न गएका छन् । चितवनका केहि खेलाडीले पेभिलिएनको बाउन्ड्री नजिकै अभ्यास गरिरहेका छन् ।

चितवनले पहिलो खेलमा विराटनगर वारियर्सलाई २ विकेटले पराजित गरेको थियो । भैरहवा ग्ल्याडियटर्सको पहिलो खेल वर्षाको कारण पोखरा राइनोजसँग अंक बाँडेको थियो । आइतबार दोस्रो खेलमा टस जितेर ब्याटिङ रोजेको पोखरा १०.१ ओभरमा ६५–७ को अवस्थामा वर्षाको कारण अंक बाँड्न पुगेको थियो । सोमबार विराटनगर र काठमाडौं किंग्स इलेभेनबीचको खेल वर्षाको कारण स्थगित भइसकेको छ ।

सोमबार बिहानै देखि टियु मैदानमा घाम लागेको छ । तर आइतबार वर्षा बढी भएको हुँदा आउटफिल्ट पूर्णरुपमा सुक्न सकेको छैन । जसको कारण पहिलो खेल स्थगित हुँदा भैरहवा र चितवनबीचको खेल ढिलो सुरु हुने भएको छ ।