काठमाडौं (हाम्रो खेलकुद) – चौथो संस्करणको एभरेष्ट प्रिमियर लिग (इपिएल) मा सोमबार दोस्रो खेलमा भैरहवा ग्ल्याडियटर्स र चितवन टाइगर्सबीचको खेल पनि स्थगित भएको छ । टियु मैदानको चिसो आउटफिल्ड र त्यसपछि वर्षाका कारण सोमबारको दुवै खेल स्थगित भएको हो ।

दिउँसो १:३० सुरु हुनुपर्ने खेल चिसो आउटफिल्डका कारण स्थगित भएको थियो । खेल सुरु हुन ढिलाइ भएको केहीबेरमा नै पुन: वर्षा भएपछि मैदान कभरले ढाकिएको छ । वर्षासँगै खेल स्थगित भएको हो । अब दुई टोलीले अंक बाँड्ने वा खेल पुन: अर्को दिन खेलाइने भन्नेबारे आयोजक छलफलमा छ ।

निर्धारित समय अनुसार खेल १:३० सुरु हुने कार्यक्रम थियो । त्यसका लागि टस १ बजे हुनुपर्ने थियो । भैरहवाका कप्तान शरद भेषावकर र चितवनका सोमपाल कामीसँग छलफलपछि अम्पायरले टस स्थगित गरेका थिए । दोस्रो पटक १:४० मा अम्पायरले मैदान निरिक्षण गरेर फर्किएका थिए । दोस्रो निरिक्षण २:३० मा हुने भनिएको थियो ।

चितवनले पहिलो खेलमा विराटनगर वारियर्सलाई २ विकेटले पराजित गरेको थियो । भैरहवा ग्ल्याडियटर्सको पहिलो खेल वर्षाको कारण पोखरा राइनोजसँग अंक बाँडेको थियो । आइतबार दोस्रो खेलमा टस जितेर ब्याटिङ रोजेको पोखरा १०.१ ओभरमा ६५–७ को अवस्थामा वर्षाको कारण अंक बाँड्न पुगेको थियो । सोमबार विराटनगर र काठमाडौं किंग्स इलेभेनबीचको खेल वर्षाको कारण स्थगित भइसकेको छ ।