एजेन्सी – ओपनर जेसन रोय र कप्तान केन विलियम्सनको अर्धशतकमा सनराइजर्स हैदराबादले इन्डियन प्रिमियर लिग (आइपिएल) मा राजस्थान रोयल्सलाई ७ विकेटले पराजित गरेको छ । जारी प्रतियोगितामा हैदाराबादको यो दोस्रो जित हो ।

जितको लागि १ सय ६५ रनको विजयी लक्ष्य पछ्याएको हैदराबादले १८.३ ओभरमा ३ विकेट गुमाउँदै पूरा गर्यो । हैदराबादको जितमा कप्तान केन विलियम्सन ४१ बलमा ५ चौका र १ छक्का सहित ५१ रनमा अविजित रहे । ओपनर जेसन रोयले ४२ बलमा ८ चौका र १ छक्का सहित सर्वाधिक ६० रनको योगदान दिए । ऋद्धिमान शाह १८ रनमा आउट हुँदा अभिषेक शर्मा २१ रनमा अविजित रहे ।

राजस्थानका मुस्ताफिजुर रहमान, महिपाल लोमर र चेतन सकारिया १–१ रनमा आउट भए । त्यसअघि दुबईमा टस जितेर पहिला ब्याटिङ रोजेको राजस्थानले निर्धारित २० ओभरमा ५ विकेट गुमाउँदै १ सय ६४ रन बनाएको थियो । राजस्थानका कप्तान सन्जु स्यामसनले ५७ बलमा ७ चौका र ३ छक्का सहित सर्वाधिक ८२ रनको कप्तानी इनिङ खेलेपनि टोलीलाई जिताउन सकेनन् ।

युवा ब्याट्सम्यान यशस्वी जैसवाल २३ बलमा ५ चौका र १ छक्का सहित ३६ रनमा आउट भए । महिपाल लोमर २९ र एविन लेविस ६ रनमा आउट भए । हैदराबादका सिद्धार्थ कौलले सर्वाधिक २ विकेट लिए । सन्दीप शर्मा, भुवनेश्वर कुमार र राशिद खानले एक एक विकेट लिए ।

अंक तालिका

चेन्नई सुपर किंग्स १० खेलमा ८ जित र २ मा हार सहित १६ अंक जोड्दै शीर्षस्थानमा छ । दिल्ली क्यापिटल्स १० खेलमा ८ मा जित र २ मा हार सहित १६ अंकका साथ दोस्रोमा छ । दिल्ली र चेन्नईको प्लेअफ लगभग निश्चित भएको छ । औपचारिक मात्र बाँकी छ । आइपिएल इतिहासमा १६ अंक भएर पनि प्लेअफ नखेलेको रेकर्ड छैन । रोयल च्यालेन्जर्स बेंगलोर १० खेलमा ६ मा जित र ४ मा हार सहित १२ अंकका साथ तेस्रो स्थानमा छ । कोलकाता १० खेलमा ४ जित र ६ मा हार सहित ८ अंकका साथ चौथो स्थानमा छ ।

पन्जाब १० खेलमा ६ मा हार र ४ मा जित सहित ८ अंक जोड्दै पाँचौ स्थानमा छ । राजस्थान रोयल्स १० खेलमा ६ मा हार र ४ मा जित सहित ८ अंकका साथ छैटौं स्थानमा छ । मुम्बई इन्डियन्स १० खेलमा ४ मा जित र ६ मा हार सहित ८ अंक बटुल्दै सातौ स्थानमा छ । सनराइजर्स हैदराबाद १० खेलमा ८ मा हार र २ मा जित सहित ४ अंक जोड्दै पुछारमा छ ।