एजेन्सी – इन्डियन प्रिमियर लिग (आइपिएल) को ४३ औं खेलमा रोयल च्यालेन्जर्स बेंगलोरले राजस्थान रोयल्सलाई ७ विकेटले पराजित गरेको छ । जितको लागि १ सय ५० रनको विजयी लक्ष्य पछ्याएको बेंगालेरले १७.१ ओभरमा ३ विकेटको क्षतिमा पूरा गर्यो ।

बेंगलोरका ग्लेन म्याक्सवेल ३० बलमा ६ चौका र १ छक्का सहित सर्वाधिक ५० रनमा अविजित रहे । एवि डिभिलियर्स ४ रनमा अविजित रहे । विकेटकिपर स्रिकर भरतले ३५ बलमा ३ चौका र १ छक्का सहित ४४ रनको योगदान दिए । कप्तान विराट कोहली २० बलमा ४ चौका सहित २५ रनमा रन आउट भए । युवा ओपनर देवदत्त पाडिक्कल १७ बलमा ४ चौका सहित २२ रनमा आउट भए । राजस्थानका मुस्ताफिजुर रहमानले ३ ओभरमा २० रन खर्चेर २ विकेट लिए ।

त्यसअघि दुबईमा टस हारेर ब्याटिङको निम्तो पाएको राजस्थानले निर्धारित २० ओभरमा ९ विकेट गुमाउँदै १ सय ४९ रन बनाएको थियो । राजस्थान रोयल्सका ओपनर एविन लेविसले ३७ बलमा ५ चौका र ३ छक्का सहित सर्वाधिक ५८ रनको योगदान दिए । युवा ब्याट्सम्यान यशस्वी जैसावलले २२ बलमा ३ चौका र २ छक्का सहित ३१ रनको योगदान दिए ।

राजस्थानलाई जैसवाल र लेविसले पहिलो विकेटका लागि ८.२ ओभरमा ७७ रनको साझेदारी गर्दै राम्रो सुरुवात दिलाएका थिए । त्यसपछिका ब्याट्सम्यान चल्न नसक्दा पराजित हुन पुगेको हो । कप्तान सन्जु स्यामसन १९, क्रिस मोरिस १४, लियाम लिभिङस्टोन ६ र रियान पराग ९ रनमा आउट भए ।

बंगलोरका हर्षल पटेलले ४ ओभरमा ३४ रन खर्चेर ३ विकेट लिए । युजभेन्द्र चहल र शहबाज नदिमले २–२ विकेट लिए । ड्यानियल क्रिष्टियन र जर्ज ग्रेटनले १–१ विकेट लिए । राजस्थानले अव शनिबार चेन्नईसँग खेल्ने छ । प्लेअफमा स्थान बनाउन राजस्थानलाई बाँकी सबै खेलमा जित निकाल्नुपर्ने हुन्छ । चेन्नईलाई प्लेअफमा पुग्न औपचारिकता मात्र बाँकी छ । बेंगलोरले आइतबार पन्जाबसँग खेल्ने छ । पन्जाबलाई उक्त खेलमा हराउन सके बेंगलोरको प्लेअफ स्थान पक्का बन्नेछ । पन्जाबले बाँकी सबै खेलमा जित मात्र निकालेर प्लेअफमा पुग्न सक्दैन । अन्य टोलीको नतिजामा पनि निर्भर रहनुपर्ने हुन्छ ।

अंक तालिका

चेन्नई सुपर किंग्स १० खेलमा ८ जित र २ मा हार सहित १६ अंक जोड्दै शीर्षस्थानमा छ । दिल्ली क्यापिटल्स ११ खेलमा ८ मा जित र ३ मा हार सहित १६ अंकका साथ दोस्रो छ । दिल्ली र चेन्नईको प्लेअफ लगभग निश्चित छ । औपचारिक मात्र बाँकी छ । आइपिएल इतिहासमा १६ अंक भएर पनि प्लेअफ नखेलेको रेकर्ड छैन ।

रोयल च्यालेन्जर्स बेंगलोर ११ खेलमा ७ मा जित र ४ मा हार सहित १४ अंकका साथ तेस्रो स्थानमा छ । बेंगलोरको पनि प्लेअफ सम्भावना बलियो बनेको छ । कोलकाता ११ खेलमा ५ जित र ६ मा हार सहित १० अंकका साथ चौथो स्थानमा छ । मुम्बई इन्डियन्स ११ खेलमा ५ मा जित र ६ मा हार सहित १० अंक बटुल्दै पाँचौ स्थानमा छ ।

पन्जाब ११ खेलमा ४ मा जित र ७ मा हार सहित ८ अंकका साथ छैटौं स्थानमा । राजस्थान रोयल्स ११ खेलमा ७ मा हार र ४ मा जित सहित ८ अंकका साथ सातौ स्थानमा छ । सनराइजर्स हैदराबाद १० खेलमा ८ मा हार र २ मा जित सहित ४ अंक जोड्दै पुछारमा छ ।