काठमाडौं (हाम्रो खेलकुद) – युवा बायाँ हाते तीव्र गतिका बलर रिजन ढकालले बंगलादेशका ओपनर तमिम इकबालको विकेट लिएका छन् । चौथो संस्करणको एभरेष्ट प्रिमियर लिग (इपिएल) मा ललितपुर प्याट्रियटर्सका रिजनले भैरहवा ग्ल्याडियटर्सका तमिमलाई १४ रनमा आउट गराएका छन् ।

टियु मैदानमा जारी खेलमा जितको लागि १ सय ७८ रनको बलियो विजयी लक्ष्य पछ्याएको भैरहवाले ६ ओभरमा ३ विकेट गुमाउँदै ३६ रन बनाएको छ । रिजनले पाँचौं ओभरको चौथो बलमा तमिमलाई कप्तान कुशल भुर्तेलबाट १४ रनमा क्याच आउट गराए । ठूलो सट खेलेका तमिम लङअफमा समातिन पुगेका थिए । तमिम पहिलो खेलमा विराटनगर वारियर्सविरुद्ध १२ रनमा आउट भएका थिए । इपिएलमा रिजनको यो पहिलो विकेट हो । तमिमले १६ बलमा ३ चौका प्रहार गरे ।

राशिद खानको बलमा प्रदीप ऐरी २ रनमा अमजतुल्लाह ओमरजाईबाट क्याच आउट भएका थिए । राशिदको बलमा रोहित २ रनमा क्याच आउट भएका छन् । भैरहवा उपुल थरंगा ५ र आरिफ शेख १ क्रिजमा छन् ।

त्यसअघि टियु मैदानमा टस हारेर ब्याटिङको निम्तो पाएको ललितपुरले निर्धारित २० ओभरमा ७ विकेट गुमाउँदै १ सय ७७ रन बनायो । सान्दुन विराक्कोडीले ४१ बलमा २ चौका र ५ छक्का सहित सर्वाधिक ५८ रनको योगदान दिए । विराक्कोडीले ३५ बलमा अर्धशतक प्रहार गरेका थिए । सन्दीप जोरा २५ बलमा २ चौका र २ छक्का सहित ३८ रनमा रन आउट भए । ललितपुरका आजमतुल्लाह ओमरजाई २२ बलमा २ चौका र ४ छक्का सहित ४२ रनमा क्याच आउट भए ।

पहिलो खेलमा भैरहवाले पोखरासँग वर्षाको कारण अंक बाँडेको थियो । दोस्रो खेलमा भैरहवाले विराटनगरलाई ६ विकेटले पराजित गरेको थियो । ललितपुर पहिलो खेलमा ७ विकेट र दोस्रो खेलमा पोखरासँग ९ विकेटले पराजित भएको हो । ललितपुरलाई आजको खेल जित्नै पर्ने दबाब छ ।