काठमाडौं (हाम्रो खेलकुद) – ललितपुरका ओपनर ब्याटर सान्दुन विराक्कोडीले एभरेष्ट प्रिमियर लिग (इपिएल) चौथो संस्करणको ११ औं खेलमा विराटनगर वारियर्सविरुद्ध उत्कृष्ट अर्धशतक प्रहार गरेका छन् ।

टियु मैदानमा टस हारेर ब्याटिङको निम्तो पाएको ललितपुरले सुरुवाती १० ओभरमा १ विकेट गुमाउँदै ९८ रन बनाएको छ । सान्दुनले २८ बलमा अर्धशतक पूरा गरे । उनले १० औं ओभरको पहिलो बलमा एक रन बटुल्दै लगातार दोस्रो अर्धशतक पूरा गरेका थिए ।

सान्दुन विराक्कोडी २९ बलमा ९ चौका र १ छक्का ५१ रनमा अविजित छन् । सान्दुनले भैरहवा ग्ल्याडिटयर्सविरुद्ध बिहीबार ५८ रनको उत्कृष्ट इनिङ खेलेका थिए । कप्तान कुशल भुर्तेल १७ बलमा ४ चौका र २ छक्का सहित ३२ रनमा क्याच आउट भए । ओपनर कुशल भुर्तेल र सान्दुन विराक्कोडीले पहिलो विकेटका लागि ६ ओभरमा ७० रनको आक्रामक साझेदारी गर्दै उत्कृष्ट सुरुवात दिएका थिए । कप्तान कुशल छैटौं ओभरको अन्तिम बलमा एज लागेर विकेटकिपर आसिफ शेखबाट क्याच आउट भएका थिए । युवा अलराउन्डर योगेन्द्र सिंह कार्की १४ बलमा १ चौका र १ छक्का सहित १५ रनमा अविजित छन् ।

विराटनगरले टोलीमा कुनै परिवर्तन गरेको छैन । ललितपुरले एक परिवर्तन गरेको छ । भारतीय विकेटकिपर ब्याटर जयकिशन कोल्सावालालाई ललितपुरको टोलीमा छन् । उनी यसअघि ललितपुरको टोलीमा थिएनन् । २०१८ मा ललितपुरले उपाधि जित्दा कोल्सावालाले उत्कृष्ट प्रदर्शन गरेका थिए । ललितपुरले ओशदा फर्नान्डोलाई बाहिर राख्दै कोल्सावालाई मौका दिएको छ ।