एजेन्सी – रोयल च्यालेन्जर्स बेंगलोर पन्जाब किंग्सलाई ६ रनले पराजित गर्दै इन्डियन प्रिमियर लिग (आइपिएल) २०२१ को प्लेअफमा पुगेको छ । बेंगलोर प्लेअफमा पुग्ने तेस्रो टोली बनेको छ ।

जितको लागि १ सय ६५ रनको विजयी लक्ष्य पछ्याएको पन्जाबले निर्धारित २० ओभरमा ६ विकेट गुमाउँदै १ सय ५८ रन बनायो । पन्जाबका मयंक अग्रवालले ४२ बलमा ६ चौका र २ छक्का सहित सर्वाधिक ५७ रनको योगदान दिए । कप्तान लोकेश राहुल ३५ बलमा १ चौका र २ छक्का सहित ३९ रन बनाए । पहिलो विकेटका लागि राहुल र अग्रवालले १०.५ ओभरमा ९१ रनको साझेदारी गर्दै राम्रो सुरुवात पाएपनि त्यसपछिका ब्याटर चल्न नसक्दा पराजित हुन पुगेको हो ।

यो हारसँगै पन्जाबको अघिल्लो चरण अंक गणीतिय आशा मात्र बाँकी छ । एडेन माक्ररम २०, शाहरुख खान १६ र मोइजेस हेनरिक्स १२ रनमा आउट भए । बेंगलोरका स्पिनर युजभेन्द्र चहलले ४ ओभरमा २९ रन खर्चेर सर्वाधिक ३ विकेट हात पारे । जर्ज ग्रेटन, शाहबज अमदले १–१ विकेट लिए ।

त्यसअघि शारजाहमा टस जितेर पहिला ब्याटिङ रोजेको बेंगलोरले निर्धारित २० ओभरमा ७ विकेट गुमाउँदै १ सय ६४ रन बनाएको थियो । बेंगलोरका ग्लेन म्याक्सवेलले ३३ बलमा ३ चौका र ४ छक्का सहित सर्वाधिक ५७ रनको योगदान दिए । आइपिएलमा म्याक्सवेलले आफ्नो उच्च लयलाई निरन्तरता दिएका छन् । यसअघि म्याक्सवेलले राजस्थान रोयल्सविरुद्ध ५० रनमा अविजित र मुम्बई इन्डियन्ससँग ५६ रनको इनिङ खेलेका थिए ।

ओपनर देवदत्त पाडिक्कलले ३८ बलमा ४ चौका र २ छक्का सहित ४० रनमा आउट भए । विराट कोहली २४ बलमा २ चौका र १ छक्का सहित २५ रनमा बोल्ड आउट भए । एवि डिभिलियर्स १८ बलमा १ चौका र २ छक्का सहित २३ रनमा आउट भए । पन्जाबका मोइजेस हेनरिक्सले ४ ओभरमा १२ रन खर्चेर ३ विकेट लिए । मोहम्मद शामीले ४ ओभरमा ३९ रन खर्चेर ३ विकेट लिए ।

बेंगलोर प्लेअफमा पुग्ने तेस्रो टोली हो । चेन्नई सुपर किंग्स र दिल्ली क्यापिटल्स यस अघिनै पुगि सकेका थिए । अन्तिम चारमा स्थान बनाउन अव मुम्बई इन्डियन्स, कोलकता नाइट राइडर्स र राजस्थान रोयल्सबीच उच्च प्रतिस्पर्धा हुनेछ । तीनै टोलीको समान १० अंक छ । समान दुई दुई खेल खेल्न बाँकी छ । दुबै खेलमा फरकिलो जित निकाल्ने टोली मध्य एक नेट रनरेटको आधारमा प्लेअपमा पुग्नेछन् । पन्जाबको पनि प्लेअफको सम्भावना लगभग सकिएको छ । अंक गणीतिय झिनो आशा बाँकी छ । हैदराबाद औपचारिक रुपमा बाहिरि सकेको छ ।

अंक तालिका

चेन्नई सुपर किंग्स १२ खेलमा ९ जित र ३ मा हार सहित १८ अंकका साथ शीर्षस्थानमा छ । दिल्ली क्यापिटल्स १२ खेलमा ९ मा जित र ३ मा हार सहित १८ अंकका साथ दोस्रो स्थानमा छ । रोयल च्यालेन्जर्स बेंगलोर १२ खेलमा ८ मा जित र ४ मा हार सहित १६ अंकका साथ तेस्रो स्थानमा छ । कोलकाता १२ खेलमा ५ जित र ७ मा हार सहित १० अंकका साथ चौथो स्थानमा छ ।

पन्जाब १३ खेलमा ५ मा जित र ८ मा हार सहित १० अंकका साथ पाँचौं स्थानमा छ । राजस्थान रोयल्स १२ खेलमा ५ मा जित र ७ मा हार सहित १० अंकका छैटौं स्थानमा छ । मुम्बई १२ खेलमा ५ मा जित र ७ मा हार सहित १० अंक जोड्दै सातौ स्थानमा छ । सनराइजर्स हैदराबाद ११ खेलमा ९ मा हार र २ मा जित सहित ४ अंकका साथ पुछारमा छ ।