काठमाडौं (हाम्रो खेलकुद) – भैरहवा ग्ल्याडियटर्सका ओपनर प्रदीप ऐरीले एभरेष्ट प्रिमियर लिग (इपिएल) चौथो संस्करणमा चितवन टाइगर्सविरुद्ध उत्कृष्ट अर्धशतक प्रहार गरेका छन् । प्रदीपले २८ बलमा अर्धशतक पूरा गर्दै भैरहवालाई सहज जिततर्फ अघि बढाएका छन् ।

प्रदीप ३० बलमा ५ चौका र ३ छक्का सहित ५३ रनमा खेलि रहेका छन् । प्रदीपले नवौं ओभरको चौथो बलमा फाइन लेगमा तीव्र गतिका बलर गौतम केसीलाई छक्का प्रहार गर्दै अर्धशतक पूरा गरेका थिए ।

जितको लागि १ सय ६५ रनको विजयी लक्ष्य पछ्याएको भैरहवाले ९ ओभरमा कुनै विकेट नगुमाई ८६ रन बनाएको छ । तमिम इकबाल २४ बलमा ५ चौका सहित ३१ रन बनाएका छन् ।

तमिमले दुई जीवनदान पाए । शेकुगे प्रसन्नाको आठौं ओभरको तेस्रो बलमा ब्यक्तिगत २९ रनमा करिम जन्नतले क्याच ड्रप गरेका थिए । त्यसअघि भीम सार्कीले प्वाइन्टमा ब्यक्तिगत २२ रनमा क्याच ड्रप गरेका थिए ।

त्यसअघि टियु क्रिकेट मैदानमा टस जितेर पहिला ब्याटिङ रोजेको चितवनले निर्धारित २० ओभरमा ८ विकेट गुमाउँदै १ सय ६४ रन बनाएको थियो । चितवनका करिम जन्नतले ३७ बलमा १ चौका र २ छक्का सहित सर्वाधिक ३५ रन बनाए । ओपनर मोहम्मद शाहजाद २४ बलमा ३ चौका र २ छक्का ३२ रनमा आउट भए । तल्लोक्रममा शेकुगे प्रसन्नाले ११ बलमा ३ छक्का सहित २४ रन बनाउँद्यै आउट भए । दीलिप नाथ ९ बलमा २ छक्का सहित १३ रनमा आउट भए ।

भैरहवा तीव्र गतिका बलर अभिनाश बोहराले अनिभनाश बोहराले ४ ओभरमा ३८ रन खर्चेर ३ विकेट लिए । कुशल मल्लले ४ ओभरमा १५ रन खर्चेर २ विकेट लिए । धाम्मिका प्रसाद, दुर्गेश गुप्ता र कृष्ण कार्कीले १–१ विकेट लिए ।