काठमाडौं (हाम्रो खेलकुद) – काठमाडौं किंग्स इलेभेनले एभरेष्ट प्रिमियर लिग (इपिएल) को चौथो संस्करणमा पोखरा राइनोजविरुद्ध मध्यम सुरुवात गरेको छ ।

टियु क्रिकेट मैदानमा टस हारेर ब्याटिङ थालेको काठमाडौंले १० ओभरमा २ विकेट गुमाउँदै ६८ रन बनाएको छ । अमित श्रेष्ठ २७ बलमा ५ चौका सहित ३१ रनमा अविजित छन् । रायन बर्ल २० बलमा १२ रनमा अविजित छन् । तेस्रो विकेटका लागि रायन र अमितले ५२ रनको साझेदारी गर्दै टोेलीको इनिङ अगाडि बढाएका छन् ।

दोस्रो ओभरको दोस्रो बलमा ओपनर रहमानउल्लाह गुरबाजलाई रित गौतमले १२ रनमा रन आउट गर्दै पोखरालाई महत्वपूर्ण सफलता दिलाएका थिए । रितले ननस्ट्राइकमा सिधैं स्टम्प ताक्दै गुरबाजलाई पेभिलिएनको बाटो देखाए । तेस्रो ओभरको पहिलो बलमा विक्रम सोबले सुवास खकुरेललाई २ रनमा एलबिडब्लू आउट गरेका थिए ।

काठमाडौं र पोखरा दुबैले आजको खेलमा टोलीमा एक एक परिवर्तन गरेका छन् । सिद्धान्त लोहनीको स्थानमा काठमाडौंले मोहम्मद साम्सद शेखले मौका दिएको छ । पोखराले तीव्र गतिका बलर किशोर महतोलाई मौका दिँदा स्पिन अलराउन्डर विपिन खत्रीलाई बेन्चमा राखेको छ । काठमाडौंलाई प्लेअफमा स्थान बनाउन यो खेल जित्नुपर्ने दबाब छ ।