काठमाडौं (हाम्रो खेलकुद) – एभरेष्ट प्रिमियर लिग (इपिएल) चौथो संस्करणमा काठमाडौं किंग्स इलेभेन र पोखरा राइनोजबीचको खेल रोमान्चक मोडमा वर्षाको कारण रोकिएको छ । टियु मैदानमा भारी वर्षा भएको हुँदा पुन खेल हुने सम्भावना कम छ । यो अवस्थामा डकवर्थ लेविस पद्धतिको आधारमा नतिजा निर्धारण हुनेछ । डकवर्थ लेविसमा पोखरा १४ रनले अगाडि छ ।

प्लेअफमा स्थान बनाउन काठमाडौंलाई यस खेल जित्नुपर्ने दबाब छ । पोखरालाई जितको लागि ३० बलमा ४१ रन आवश्यक पर्छ । रोमान्चक मोडमा पुगेको समयमा वर्षाको कारण खेल रोकिएको छ ।

जितको लागि १ सय ८३ रनको विजयी लक्ष्य पछ्याएको पोखराले १५ ओभरमा ५ विकेट गुमाउँदै १ सय ४२ रन बनाएको अवस्थामा खेल वर्षाको कारण रोकिएको छ । पोखराका युवा ब्याटर विवेक यादव २८ बलमा ४ चौका र २ छक्का सहित ४१ रनमा अविजित छन् । लोकेश बम ८ बलमा ३ चौका सहित १८ रनमा अविजित छन् ।

श्रीलंका ब्याटर असान अर्चाचिगेले २३ बलमा ४ चौका र ३ छक्का सहित ४३ रनमा क्याच आउट भए । गुलशनको तेस्रो ओभरको पाँचौं बलमा ओपनर रित गौतम एज लागेर २ रनमा अमरसिंह राउटेलाबाट क्याच आउट भएका थिए । गुलशनकै बलमा पाँचौं ओभरको दोस्रो बलमा ओपनर रिचार्ड लेभीबाट १७ रनमा क्याच आउट भएपछि पोखराले खराब सुरुवात गरेको थियो । लेभीले १३ बलमा २ चौका र १ छक्का प्रहार गरे ।

जितेन्द्र मुखियाको छैटौं ओभरको तेस्रो बलमा कप्तान विनोद भण्डारी एज लागेर विकेटकिपर रहमानउल्लाह गुरबाजबाट ५ रनमा समातिन पुगे । मुखियाले दुई बलपछि असेला गुणरत्नेलाई शून्यमा बोल्ड आउट गर्दा पोखरा ५.५ ओभरमा ३६–४ को अवस्थामा पुगेको थियो । पाँचौं विकेटका लागि असान अर्चाचिगे र विवेक यादवले ७७ रनको महत्वपूर्ण साझेदारी गर्दै पोखराको जितको सम्भावना कायमै राखेका थिए । कप्तान सन्दीप लामिछानेको १३ औं ओभरको अन्तिम बलमा अर्चाचिगे अमित श्रेष्ठबाट क्याच आउट भएका थिए । काठमाडौंका जितेन्द्र मुखियाले सर्वाधिक २ विकेट लिएका छन् ।

त्यसअघि टियु क्रिकेट मैदानमा टस हारेर ब्याटिङ थालेको काठमाडौंले निर्धारित २० ओभरमा ८ विकेट गुमाउँदै १ सय ८२ रन बनाएको थियो । काठमाडौंका अमित श्रेष्ठले ४१ बलमा ६ चौका र २ छक्का सहित सर्वाधिक ५६ रनको योगदान दिए । रायन बर्लले ४३ बलमा २ चौका र ३ छक्का सहित ५० रनमा आउट भए । तल्लोक्रममा कप्तान सन्दीप लामिछानेले ११ बलमा २ चौका र ३ छक्का सहित ३१ रनको आक्रामक इनिङ खेल्दै टोलीलाई बलियो योगफलमा पुर्याए ।

बर्लले ४२ र अमितले ३६ बलमा अर्धशतक पूरा गरेका थिए । पोखरा तीव्र गतिका बलर विवेक यादवले १ ओभरमा ७ रन खर्चेर ३ विकेट लिए । साहन अर्चाचिगे, विक्रम सोब, नन्दन यादव र किशोर महतोले १–१ विकेट लिए ।