काठमाडौं (हाम्रो खेलकुद) – भैरहवा ग्ल्याडियटर्सले एलिमिनेटर खेलमा काठमाडौं किंग्स इलेभेनलाई १६ रनले पराजित गर्दै एभरेष्ट प्रिमियर लिग (इपिएल) चौथो संस्करणको दोस्रो क्वालिफायरमा पुगेको छ । बुधबार भएको एलिमिनेटर खेलमा भैरहवाले काठमाडौंलाई हराउँदै लगातार चौथो पटक फाइनल नजिक पुगेको छ ।

जितको लागि १ सय ८९ रनको विजयी लक्ष्य पछ्याएको काठमाडौंले निर्धारित २० ओभरमा ८ विकेट गुमाउँदै १ सय ७२ रन बनाउन सक्यो । काठमाडौंका असान प्रियंजनले ४८ बलमा ५ चौका र ४ छक्का सहित सर्वाधिक ६८ रनको योगदान दिए । काठमाडौंलाई जितको लागि अन्तिम ६ बलमा २४ रन चाहिँएको थियो । तीव्र गतिका बलर अभिनाश बोहराले ७ रन खर्चिदै जित पक्का गराए ।

काठमाडौंलाई ओपनर राजु रिजाल र अशान प्रियंजनले ४.३ ओभरमा ३३ रनको सुरुवात दिलाएका थिए । स्पिनर कुशल मल्लको बलमा मिडअनमा भुवन कार्कीले राजुको उत्कृष्ट क्याच लिएपछि भैरहवाले पहिलो सफलता हात पारेको थियो । लगत्तै अर्को बलमा कुशलले काठमाडौंका प्रमुख ब्याटर रायन बर्ललाई शून्यमा कट बिहान्ड गराउँदा काठमाडौं समस्यामा परेको थियो ।

आरिफ शेखले दशौं ओभरको दोस्रो बलमा अमित श्रेष्ठलाई १९ रनमा बोल्ड आउट गरे । अमितले १५ बलमा २ चौका प्रहार गरे । सिंगापुरका जनक प्रकाशले १४ बलमा १ चौका र ३ छक्का सहित २८ रन बनाउँदै काठमाडौंलाई जितको आशा देखाएका थिए । तर आरिफ शेखको १४ औं ओभरको पहिलो बलमा जनकलाई शरदबाट क्याच भएपछि भैरहवा खेलमा फर्किएको थियो ।

प्रियंजनले राम्रो ब्याटिङका साथ काठमाडौंलाई जितको आशा देखाई रहेका थिए । तर १७ औं ओभरको चौथो बलमा तीव्र गतिका बलर धाम्मिका प्रसादले प्रियंजनलाई बोल्ड आउट गरेपछि काठमाडौंको जितको सम्भावना टाढिएको थियो । दीनेश अधिकारीसँग तालमेल गर्न नसक्दा सन्दीप लामिछानेले ६ रनमा रन आउट भएका थिए । दीनेश ९ बलमा ३ चौका सहित १५ रन बनाए । भैरहवा कुशल मल्लले ३ ओभरमा २२ रन खर्चेर २ विकेट लिए । आरिफ शेखले ३ ओभरमा २२ रन खर्चेर २ विकेट लिए । धाम्मिका प्रसादले २ र दुर्गेश गुप्ताले १ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ रोजेको भैरहवाले निर्धारित २० ओभरमा ८ विकेट गुमाउँदै १ सय ८८ रन बनाएको थियो । भैरहवा कप्तान शरद भेषावकरले २० बलमा ७ चौका र ३ छक्का सहित सर्वाधिक ४९ रनको योगदान दिए । सन्दीप लामिछानेको अन्तिम ओभरको दोस्रो बलमा छक्का प्रहार गर्ने धुनमा डिप मिडविकेटमा अमर सिंह राउटेलाबाट क्याच आउट भएपछि शरद इपिएल इतिहासकै सर्वाधिक छिटो अर्धशतकको कीर्तिमान बनाउनबाट चुकेका थिए ।

तीव्र गतिका बलर जनक प्रकाशले चौथो ओभरको पहिलो बलमा ओपनर तमिम इकबाललाई अमित श्रेष्ठबाट ९ रनमा क्याच गराउँदै पहिलो सफलता दिलाएका थिए । दोस्रो विकेटका लागि प्रदीप ऐरी र उपुल थरंगाले ४७ रनको साझेदारी गर्दै इनिङ अगाडि बढाएका थिए । युवा स्पिनर शेर मल्लले दशौं ओभरको अन्तिम बलमा प्रदीपलाई राजु रिजालबाट क्याच गराउँदै साझेदारी तोडेका थिए । प्रदीपले २७ बलमा ६ चौका र १ छक्का सहित ३९ रन बनाए ।

थरंगालाई प्रियंजनले रायन बर्लबाट ३५ रनमा क्याच गराएका थिए । थरंगाले ३३ बलमा ५ चौका प्रहार गरे । युवा ब्याटर रोहित कुमार पौडेल १ रनमा क्याच आउट हुन पुगे । पाँचौं विकेटका लागि शरद र कुशलले ६१ रनको आक्रामक साभेदारी गर्दै बलियो योगफलमा पुर्याएका थिए । कुशल मल्ल २० बलमा ४ छक्का सहित ३२ रनमा क्याच आउट भए । आरिफ शेख ८ बलमा १ चौका र १ छक्का सहित १५ रनमा रन आउट भए ।

असान प्रियंजनले ३ ओभरमा १७ रन खर्चेर २ विकेट लिए । कप्तान सन्दीप लामिछानेले ४ ओभरमा ३६ रन खर्चेर २ विकेट लिए । शेर मल्ल, जितेन्द्र मुखिया र जनक प्रकाशले १–१ विकेट लिए ।

फाइनल प्रवेशको लागि भैरहवाले बिहीबार दोस्रो क्वालिफायरमा पोखरा राइनोजसँग खेल्नेछ । चितवन टाइगर्सले पहिलो क्वालिफायरमा पोखरा राइनोजलाई ९ विकेटले पराजित गर्दै फाइनलमा स्थान पक्का गरि सकेको छ । फाइनल शनिबार हुने छ । विजेताले ५० लाख र उपविजेताले १५ लाख प्राप्त गर्नेछन् ।