काठमाडौं (हाम्रो खेलकुद) – भैरहवा ग्ल्याडियटर्सले एभरेष्ट प्रिमियर लिग (इपिएल) चौथो संस्करणको दोस्रो क्वालिफायरमा पोखरा राइनोजसँग एकै ओभरमा दुवै ओपनर गुमाएको छ ।

टियु क्रिकेट मैदानमा टस हारेर ब्याटिङ थालेको भैरहवाले ६ ओभरमा २ विकेट गुमाउँदै ४२ रन बनाएको छ । भैरहवा उपुल थरंगा ६ रनमा अविजित छन् । शार्विन मुनिआन्दी क्रिजमा छन् । भैरहवालाई ओपनर रोहित कुमार पौडेल र प्रदीप ऐरीले पहिलो विकेटका लागि ४.२ ओभरमा ३२ रनको साझेदारी गर्दै सुरुवात दिलाएका थिए ।

नियमित ओपनर तमिम इकबाल चोटका कारण फिट नभएपछि रोहितले ओपनिङ गरेका थिए । तीव्र गतिका बलर किशोर महतोेको पाँचौं ओभरको दोस्रो रोहित ठूलो सट खेल्नेधुनमा एज लागेर रिचार्ड लेभीबाट १८ रनमा क्याच आउट हुन पुगे । रोहितले १७ बलमा २ छक्का प्रहार गरे । पाँचौं ओभरमा प्रदीप मिड विकेटमा लेभीबाटै ११ रनमा समातिन पुगे । प्रदीपले ११ बलमा २ चौका प्रहार गरे ।

पोखरा र भैरहवा दुबैले आज टोलीमा दुई परिवर्तन गरेका छन् । स्पिनर सुशान भारी र सुनिल धमलालाई पोखराले बेन्चमा राखेको छ । युवा ओपनर विपिन रावल र रित गौतमलाई आजको खेलमा प्लेइङ ११ मा मौका दिएको छ ।

भैरहवाले तीव्र गतिका बलर कृष्ण कार्कीको स्थानमा स्पिनर भुवन कार्कीलाई मौका दिएको छ । बंगलादेशका ओपनर तमिम इकबाल पनि टोलीमा छैनन् । चोटका कारण एलिमिनेटर खेलमा उनी टोली दोस्रो इनिङमा फिल्डिङ गरेका थिएनन् । उनको स्थानमा शार्विन मुनिआन्दीलई मौका दिएको छ । मलेसिया शार्विनले इपिएलमा डेब्यू खेल खेलेका छन् ।

भैरहवा ग्ल्याडियटर्सले एलिमिनेटर खेलमा काठमाडौं किंग्स इलेभेनलाई १६ रनले पराजित गर्दै क्वालिफायरमा स्थान बनाएको थियो । पोखरा राइनोज पहिलो क्वालिफायरमा चितवन टाइगर्ससँग ९ विकेटले पराजित भएको थियो । आजको विजेताले फाइनलमा चितवन टाइगर्ससँग खेल्नेछ ।