एजेन्सी – कप्तान लोकेश राहुलले विष्फोटक ब्याटिङका साथ उत्कृष्ट प्रदर्शन गरेपछि पन्जाब किंग्सले इन्डियन प्रिमियर लिग (आइपिएल) आफ्नो लिगको अन्तिम खेलमा चेन्नई सुपर किंग्सलाई ६ विकेटले पराजित गरेको छ । योसँगै पन्जावको प्लेअफमा पुग्ने झिनो अंक गणीतिय आशा कायमै रहेको छ । तर अन्य टोलीको नतिजामा निर्भर रहनेछ ।

जितको लागि १ सय ३५ रनको विजयी लक्ष्य पछ्याएको पन्जाबले १३ ओभरमा ४ विकेट गुमाउँदै पूरा गर्यो । पन्जाबका कप्तान लोकेश राहुल ४२ बलमा ७ चौका र ८ छक्का सहित ९८ रनमा अविजित रहे । राहुलले शार्दूल ठाकुरलाई १३ औं ओभरको पाँचौं बलमा चौका र छैटौं बलमा छक्का प्रहार गर्दै जित पक्का गराए । मयंक अग्रवाल १२ र एडेन माक्ररम १३ रनमा आउट भए । चेन्नईका शार्दूल ठाकुरले सर्वाधिक ३ र दीपक चाहर १ विकेट लिए ।

त्यसअघि दुबईमा टस हारेर ब्याटिङ थालेको चेन्नईले निर्धारित २० ओभरमा ६ विकेट गुमाउँदै १ सय ३४ रन बनाएको थियो । चेन्नईका फाफ डु प्लेसिसले ५५ बलमा ८ चौका र २ छक्का सहित सर्वाधिक ७६ रनको योगदान दिए । तर अन्य ब्याटरले भने राम्रो प्रदर्शन गर्न सकेनन् । ऋतुराज गायकवाड र महेन्द्र सिंह धोनीले १२–१२ रन बनाए । रविन्द्र जडेजा १५ रनमा अविजित रहे । पन्जाबका अर्शदीप सिंह र क्रिस जोर्डनले २–२ विकेट लिए । मोहम्मद शामी र रवि विश्रोईले १–१ विकेट लिए ।

पन्जाबले लिगमा अन्तिम खेलमा जित निकाल्दै प्लेअफको झिनो अंक गणीतिय सम्भावना जीवित राखेको छ । तर पन्जाबलाई प्लेअफमा पुग्न अन्य टोलीको नतिजाले प्रभाव पार्नेछ । १२ अंकनै भएका मुम्बई इन्डियन्स र कोलकाता नाइट राइडर्सले एक एक खेल्न बाँकी छ । यी दुई टोली मध्य एक टोली विजयी भएमा पन्जाब बाहिरिने छ । मुम्बई र कोलकता अन्तिम खेलमा फराकिलो अन्तरले पराजित भएमा पन्जाब नाटकीय रुपमा प्लेअफमा पुग्नसक्छ । कोलकाता र राजस्थानबीचको खेल आज हुँदै छ । राजस्थान पनि अन्तिम खेलमा जितको साथ १२ अंकका साथ प्लेअफ समीकरण जीविन राख्न चाहन्छ । मुम्बईले शुक्रकार हैदराबादसँग खेल्नेछ ।

दिल्ली एक खेल अगावै क्वालिफायरमा पुगि सकेको छ । चेन्नई सुपर किंग्स क्वालिफायरमा पुग्न औपचारिकता बाँकी छ । चेन्नई लिगको खेल सकिँदा १८ अंकका साथ दोस्रो स्थानमा छ । अन्तिम खेलमा शुक्रबार बेंगलोरले दिल्ली क्यापिटल्ससँग खेल्नेछ । बेंगलोरलाई दोस्रो स्थानमा रहँदै अविश्वसनिय नतिजा निकाल्नुपर्ने हुन्छ । अविश्वसनिय र फराकिलो जित निकालेको खण्डमा शीर्ष दुईमा रहन सक्ने समिरकण छ ।

अंक तालिका

दिल्ली क्यापिटल्स १३ खेलमा १० मा जित र ३ मा हार सहित २० अंकका साथ शीर्षस्थानमा छ । चेन्नई सुपर किंग्स १४ खेलमा ९ जित र ५ मा हार सहित १८ अंकका साथ दोस्रो स्थानमा रहँदै लिग सकाएको छ । रोयल च्यालेन्जर्स बेंगलोर १३ खेलमा ८ मा जित र ५ मा हार सहित १६ अंकका साथ तेस्रो स्थानमा छ । कोलकाता १३ खेलमा ६ जित र ७ मा हार सहित १२ अंकका साथ चौथो स्थानमा छ । पन्जाब १४ खेलमा ६ मा जित र ८ मा हार सहित १२ अंकका साथ पाँचौं स्थानमा लिग समाप्त गरेको छ ।

मुम्बई १३ खेलमा ६ मा जित र ७ मा हार सहित १२ अंकका साथ छैटौं स्थानमा छ । राजस्थान रोयल्स १३ खेलमा ५ मा जित र ८ मा हार सहित १० अंकका सातौं स्थानमा छ । सनराइजर्स हैदराबाद १३ खेलमा १० मा हार र ३ मा जित सहित ६ अंकका साथ पुछारमा छ ।