काठमाडौं (हाम्रो खेलकुद) – एभरेष्ट प्रिमियर लिग (इपिएल) चौथो संस्करणको फाइनलमा शनिबार चितवन टाइगर्स र पोखरा राइनोजबीच प्रतिस्पर्धा हुँदैछ । दुवै टोली इपिएलमा पहिलो पटक फाइनलमा पुगेका हुन् । चितवनका कप्तान सोमपाल कामी र पोखरा राइनोजका कप्तान विनोद भण्डारी दुवैले पहिलो पटक इपिएल फाइनल खेल्न लागेका हुन् । दुवै टोलीका कप्तानले फाइनलमा राम्रो प्रदर्शन गर्दै उपाधि जित्ने बताएका छन् ।

पोखरा कप्तान विनोदले फाइनल भनेर धेरै सोच्न आवश्यक नरहेको बताउँछन् । ‘फाइनल हो । धेरै सोचेर भन्नु पर्दैन । फाइनलमा जुन टोलीले राम्रो खेल्छ त्यहिँ टोलीले जित्ने हो । फाइनल पुग्ने दुवै टोली राम्रो हो । हाम्रो मात्र राम्रो भन्न मिल्दैन’, फाइनल अघि विनोदले भने ।

यता चितवनका कप्तान सोमपालले फाइनल अवसर रहेको बताए । ‘मेरा लागि फाइनल भन्दा पनि एउटा खेल जस्तै हो । अझै एउटा अवसर छ । खेलाडी भएपछि आत्माविश्वास हुनुपर्छ’, सोमपालले भने, ‘मलाई लाग्छ क्रिकेट दबाबले सुधार हुने हो । दबाब भन्दा पनि जिम्मेवारी जति धेरै हुन्छ त्यतिनै प्रदर्शन गर्न मज्जा आउँछ ।’

‘फाइनल पहिला पनि खेलेको हो । फाइनलमा दबाब त हुन्छ । भोलीको खेलमा पनि हुन्छ । दबाबमा कसरी सम्हालेर जाने भन्ने हुन्छ । सामान्य खेल सम्झेर खेल्ने छौं, विनोदले भने ।

पोखरा चितवनसँग लिग र पहिलो क्वालिफायर दुबैमा पराजित भएको थियो । विनोद आफूहरुले दुबै इनिङमा पहिला ब्याटिङ गर्दा राम्रो योगफल दिन नसकेको बताउँछन् ।

सोमपालले एकअर्कालाई कमजोरी राम्रोसँग थाहा भएको बताए । ‘यो यात्रा सकिएको छैन । एकअर्कालाई कमजोरी राम्रोसँग थाहा छ । जतिपनि योजना बनाएका थियौं त्यसैमा काम गर्ने हो । यो सिक्ने कुरा हो । त्यसैले दबाब छैन’, सोमपालले भने ।

चितवन लिगमा ५ खेलमा जित र १ मा हार सहित शीर्षस्थानमा रहँदै क्वालिफायर खेलेको थियो । पहिलो क्वालिफायर चितवनले पोखरालाई ९ विकेटले पराजित गरेको थियो । लिगमा पनि चितवनले पोखरालाई ९ विकेटले नै पराजित गरेको थियो । पोखरा ५ खेलमा ३ मा जित र १ मा हार सहित ७ अंकका साथ दोस्रो स्थानमा रहँदै क्वालिफायर खेलेको थियो । पोखराले भैरहवा ग्ल्याडियटर्सलाई क्वालिफायरमा ७ विकेटले पराजित गर्दै फाइनलमा स्थान पक्का बनाएको थियो ।

इपिएलको विजेताले ५० लाख र उप विजेताले १५ लाख रुपैयाँ प्राप्त गर्नेछन् । यसअघि इपिएलको पहिलो संस्करणको उपाधि २०१६ मा पन्चकन्या तेजले कलर्स एक्स फ्याक्टर्सलाई ४० रनले हराउँदै उपाधि जितेको थियो । २०१७ मा विराटनगर वारियर्सले भैरहवा ग्ल्याडियटर्सलाई १ रनले पराजित गर्दै उपाधि जितेको थियो । २०१८ को फाइनलमा ललितपुर प्याट्रियटर्सले भैरहवा ग्ल्याडियटर्सलाई १४ रनले पराजित गर्दै उपाधि जितेको थियो ।

भिडियो हेर्न यहाँ थिच्नुहोस