काठमाडौं (हाम्रो खेलकुद) – ज्ञानेन्द्र मल्लको अर्धशतकसँगै नेपाली राइनोज अमेरिकाको टेक्ससमा जारी टु एक्स क्रिकेट युएसए कपको फाइनल पुगेको छ । आज फ्लोरिडा अन्डरडग्सलाई ७ विकेटले हराउँदै नेपाली राइनोज ६० हजार अमेरिकी डलर पुरस्कार रहेको प्रतियोगिताको उपाधि नजिक पुगेको हो ।
राइनोजले फाइनलमा हस्टन स्पार्कसँग खेल्नेछ । हस्टनमा पाकिस्तानी क्रिकेट टोलीका पूर्व खेलाडी कमरान अकमल,सइद अजमल पनि छन् । हस्टनले युएइ फाल्कोन्सलाई ७ विकेटले हराएर नेपाली राइनोजसँगको भेट पक्का गरेको थियो ।
१ सय २२ रनको लक्ष्य पछ्याएको नेपाली राइनोजले १५ औं ओभरमा ३ विकेट गुमाएर १ सय २५ रन बनाउँदै जित हासिल गरेको थियो । पहिलो ब्याटिङ गरेको अन्डरडग्सले २० ओभरमा ९ विकेटको क्षेतिमा १ सय २१ रन बनाएको थियो ।
टस जितेको नेपाली राइनोजले पहिले अन्डरडग्सले सुरुको १० ओभरमा ४ विकेट गुमाएर ६७ रन बनायो । राइनोजले १० ओभरमै ३ विकेट गुमाएर १ सय ५ रन जोड्नो र ३८ रनको अग्रता लियो ।
१० ओभरको दोश्रो इनिङमा अन्डरडग्सले थप ५ विकेट गुमाएर ५४ रन बटुल्दै राइनोजविरुद्ध १६ रनको अग्रता लियो । १७ रनको लक्ष्य नेपालले त्यसपछि कुनै विकेट नगुमाइ १५ ओभरमा विजय प्राप्त गर्यो । सेमिफाइनलका नायक रहे नेपाली राष्ट्रिय टोलीका उपकप्तान रहेका ज्ञानेन्द्र । २१ बलमै अर्धशतक बनाएका ज्ञानेन्द्रले २६ बलमा ५ छक्का र ६ चौकाको मद्दतमा ६२ रन बनाएका थिए । लगातार चौथो खेलमा पनि उच्च प्रदर्शन गर्ने क्रममा ओपनर सुवास खकुरेलले ३६ रन बटुले । राकेश कर्णले १२, शरद भेषावकरले ६ र सिद्धान्त लोहनीले ४ रन जोडे । अन्डरडग्सका लागि हेरोन्ड सालोले ३२, ज्योती छायाँले २९ र रिजवान चिमाले २३ रन बनाए ।
बलिङमा राइनोजका लागि सोमपाल कामी, अघिल्लो दिन शतक बनाएका शन फिडंलेले समान २ तथा कप्तान पारस खड्का, बसन्त रेग्मी र पारेरिस्टि थेरानले समान १ विकेट लिए । पारस, ज्ञानेन्द्रसहित नेपाली राइनोजमा ८ नेपाली राष्ट्रिय खेलाडी छन् ।
