एजेन्सी – कोलकता नाइट राइडर्सले इन्डियन प्रिमियर लिग (आइपिएल) २०२१ को दोस्रो क्वालिफायरमा दिल्ली क्यापिटल्समाथि ३ विकेटको रोमान्चक जित निकाल्दै फाइनलमा पुगेको छ । दुई पटकको च्याम्पियन कोलकताले बुधबार दोस्रो क्वालिफायरमा दिल्ली क्यापिटल्समाथि रोमान्चक जितका साथ तेस्रो पटक आइपिएलको फाइनलमा स्थान बनाएको हो । कोलकतालाई अन्तिम ६ बलमा ७ रन आवश्यक परेको थियो ।

स्पिनर रविचन्द्रन आश्विनले पहिलो बलमा राहुल त्रिपाठीलाई १ रन दिँदा दोस्रो बल सकिब अल हसनलाई डट राखेका थिए । तेस्रो बलमा सकिब शून्यमा एलबीडब्लू आउट भएपछि खेल रोचक बनेको थियो । चौथो बलमा सुनिल नारायण लङअफमा अक्षर पटेलबाट समातिन पुगे । तर दुई बलमा ६ रन चाहिँएको अवस्थामा पाँचौं बलमा राहुल त्रिपाठीले छक्का प्रहार गर्दै कोलकतालाई फाइनलमा स्थान पक्का गराएका थिए ।

जितको लागि १ सय ३६ रनको विजयी लक्ष्य पछ्याएको कोलकताले १९.५ ओभरमा ७ विकेट गुमाउँदै पूरा गर्यो । कोलकताको जितमा बायाँ हाते युवा ओपनर वेंकटेश ऐरले ४१ बलमा ४ चौका र ३ छक्का सहित ५५ रनमा आउट भए । राहुल त्रिपाठी ११ बलमा १ छक्का सहित १२ रनमा अविजित रहे । त्यसअघि अन्तिम १८ बलमा मात्र ११ रन आवश्यक पर्दा कोलकता हातमा ७ विकेट थियो । १८ औं ओभरमा कागिसो रबाडाले १ रन खर्चेर १ विकेट लिए । १९ औं ओभरमा एनरिच नोर्कियाले ३ रन खर्चेर १ विकेट लिएपछि खेल रोचक बनेको थियो ।

सुभमन गिलले ४६ बलमा १ चौका र १ छक्का सहित ४६ रनमा आउट भए । कोलकतालाई ऐर र गिलले पहिलो विकेटका लागि १२.२ ओभरमा ९६ रनको साझेदारी गर्दै जित नजिक पुर्याएका थिए । तर तल्लोक्रममा लगातार विकेट जादा खेल अन्तिम ओभरमा पुगेको थियो । ऐर कागिसो रबाडा बलमा वैकल्पिक फिल्डर स्टिभ स्मिथबाट क्याच आउट हुन पुगेका थिए । नितिश राणा १२ बलमा १ छक्का सहित १३ रनमा क्याच आउट भए ।

दिल्लीका कागिसो रबाडाले ४ ओभरमा २३ रन खर्चेर २ विकेट लिए । रविचन्द्रन आश्विनले २ विकेट लिए । एनरिच नोर्कियाले २ विकेट लिए । आवेश खानले १ विकेट लिए ।

त्यसअघि शारजाहमा टस हारेर ब्याटिङको निम्तो पाएको दिल्लीले निर्धारित २० ओभरमा ५ विकेट गुमाउँदै १ सय ३५ रन बनाएको थियो । दिल्लीका ओपनर शिखर धवनले ३९ बलमा १ चौका र १ छक्का सहित सर्वाधिक ३६ रनको योगदान दिए । श्रेयस ऐर २७ बलमा १ चौका र १ छक्का सहित ३० रनमा अविजित रहे ।

दिल्लीलाई ओपनर पृथ्वी शा र शिखर धवनले पहिलो विकेटका लागि ४.१ ओभरमा ३२ रनको साझेदारी गर्दै मध्यम सुरुवात दिलाएका थिए । स्पिनर बरुणचक्रवर्तीले शालाई १८ रनमा एलबीडब्लू आउट गर्दैै पहिलो सफलता दिलाए । शाले १२ बलमा २ चौका र १ छक्का प्रहार गरे । मार्कस स्टोइनिस २३ बलमा १ चौका सहित १८ रनमा शिवम माभीको बलमा बोल्ड आउट हुन पुगे ।

कप्तान ऋषभ पन्त ६ बलमा १ चौका सहित ६ रनमा आउट भए । शिम्रन हेटमायर १० बलमा २ छक्का सहित १७ रनमा रन आउट भए । स्पिनर बरुणचक्रवर्तीले ४ ओभरमा २६ रन खर्चेर २ विकेट लिए । लोकी फर्गुसन र शिवम माभीले १–१ विकेट लिए । पहिलो क्वालिफायरमा दिल्लीलाई ४ विकेटले पराजित गर्दै चेन्नई सुपर किंग्स फाइनलमा पुगि सकेको छ । चेन्नई र कोलकताबीचको फाइनल शुक्रबार हुनेछ ।

दिल्ली लिगमा १४ खेलमा २० अंकका साथ शीर्ष स्थानमा रहँदै क्वालिफायर खेलेको थियो । चेन्नई १४ खेलमा १८ अंकका साथ दोस्रो स्थानमा रहँदै क्वालिफायर खेलेको थियो । तीन पटकको च्याम्पियन चेन्नई नवौं पटक फाइनलमा पुगेको हो । कोलकतामो १४ खेलमा १४ अंकका साथ नेटरनरेटमा मुम्बई इन्डिन्सलाई पछिपार्दै एलिमिनेटर खेलेको थियो । एलिमिनेटरमा रोयल च्यालेन्जर्स बेंगलोरलाई ४ विकेटले हराउँदै दिल्लीसँगको भेट पक्का गरेको थियो ।

कोलकताले २०१२ को फाइनलमा चेन्नईलाई ५ विकेटले हराउँदै उपाधि जितेको थियो । २०१४ को फाइनलमा पन्जाब किंग्सलाई ३ विकेटले पराजित गर्दै च्याम्पियन बनेको थियो । कोलकता तेस्रो र चेन्नई चौथो पटक च्याम्पियन बन्ने सोचमा हुनेछन् ।