एजेन्सी – इन्डियन प्रिमियर लिग (आइपिएल) २०२१ को फाइनलमा कोलकता नाइट राइडर्स र चेन्नई सुपर किंग्सबीच प्रतिस्पर्धा हुँदैछ । खेल नेपाली समय अनुसार बेलुका ७:४५ मा दुबईमा सुरु हुनेछ ।

चेन्नई चौथो र कोलकता तेस्रो पटक च्याम्पियन बन्ने सोचका साथ मैदान उत्रनेछन् । चेन्नईको महेन्द्रसिंह धोनी र कोलकता ओईन मोर्गनले कप्तानी गर्नेछन् । विश्वकप च्याम्पियन यी दुई कप्तानबीचको भिडन्त प्रतिस्पर्धात्मक हुने अपेक्षा गरिएको छ ।

चेन्नई लिगमा दोस्रो स्थानमा रहँदै क्वालिफायर खेलेको थियो । क्वालिफायरमा चेन्नईले शीर्षस्थानको दिल्ली क्यापिटल्सलाई ४ विकेटले पराजित गर्दै फाइनलमा स्थान पक्का गरेको थियो । कोलकताले अन्तिम चारमा रहेर एलिमिनेटर खेलेको थियो । एलिमिनेटरमा कोलकताले रोयल च्यालेन्जर्स बेंगलोरलाई ४ विकेटले पराजित गर्दै दोस्रो क्वालिफायरमा स्थान बनाएको थियो । दोस्रो क्वालिफायरमा दिल्लीलाई ३ विकेटले पराजित गर्दै कोलकताले तेस्रो पटक फाइनलमा स्थान बनाएको थियो । चेन्नईले नवौं पटक फाइनल खेल्दैछ ।

चेन्नईमा अनुभवी र युवा खेलाडीको मिश्रण छ । अर्कोतर्फ कप्तान महेन्द्रसिंह धोनी उत्कृष्ट कप्तानीमा जित दिलाउन सक्ने अब्बल क्षमता भएका खेलाडी हुन् । युवा ओपनर ऋतुराज गायकवाड र अनुभवी फाफ डु प्लेसिस उत्कृष्ट लयमा छन् । सर्वाधिक रन बनाउने खेलाडीमा ऋतुराज र फाफ डु प्लेसिस शीर्ष पाँचमा छन् ।

दोस्रो स्थानमा रहेका ऋतुराजले १५ बलमा १ शतक र ४ अर्धशतक सहित कुल ६ सय ३ रन बनाएका छन् । समान खेलमा फाफ डु प्लेसिसले ५ अर्धशतक सहित ५ सय ४७ रनका साथ चौथो स्थानमा छन् । दुई पटक यी दुई ओपनर जोडीले शतकीय साझेदारी गरि सकेका छन् । यी दुई ब्याटरको प्रदर्शन आजको खेलमा निकै महत्वपूर्ण हुनेछ । ऋतुराजको क्लासिक ब्याटिङमा कोलकता बलर निराश बन्न सक्छन् ।

मोईन अली, सुरेश रैना, रोबिन उथप्पा मध्यक्रम सम्हाल्नेछन् । अली आक्रमक ब्याटिङ गर्दै आएका छन् । अलीले ३ सय २० रन बनाएका छन् । रैना र उथप्पा अनुभवी ब्याटर हुन् । क्वालिफायरमा उथप्पाले दिल्लीविरुद्ध ६३ रनको इनिङ खेलेका थिए । अम्बाती रायुडूले पनि राम्रो प्रदर्शन गर्दै आएका छन् । जसको कारण चेन्नईको ब्याटिङ मजबुत छ ।

धोनी प्रमुख हतियार हुन् । उनी अन्तिममा फिनिसरको भूमिका निर्वाह गर्दै आएका छन् । दिल्लीलाई हराउन धोनी अन्तिम ओभरमा नायक बनेका थिए । विश्वकै एक सर्वोत्कृष्ट फिनिसर र कप्तान मानिने धोनी उपाधिको साथ क्रिकेटबाट विश्राम लिन सक्छन् । धोनीले बढीमा अर्कोवर्ष सम्म आइपिएल खेल्ने सम्भावना छ ।

तल्लोक्रममा रविन्द्र जडेजा र ड्वेन ब्राभो जस्ता विश्वस्तरिय अलराउन्डर टोलीमा हुँदा मजबुत र सन्तुलित छ । यी दुबै ब्याटर आक्रामक सटको लागि परिचित छन् । तीव्र गतिको बलरमा शार्दूल ठाकुर, दीपक चाहर र जोश हेजलवुड छन् । शार्दूलबाट ब्याटिङमा पनि आशा राख्न सकिन्छ । स्पिनरमा अली र जडेजा हुनेछन् । धोनीको उत्कृष्ट कप्तानी, अनुवभी खेलाडीको बाहुल्यता र उच्च लय उपाधि जित्ने सोचमा छ ।

सानदार प्रदर्शन र पूनरागमनको साथ फाइनलमा स्थान बनाएको कोलकता उपाधि जित्न चाहन्छ । सुरुवाती ७ खेलमा २ खेलमा मात्र जित निकालेको कोलकताले त्यसपछि सानदार पूनरागमन गरेको थियो । तर पछिल्ला सात खेल मध्य पाँचमा जितका साथ कोलकताले फाइनलमा स्थान बनाएको हो । पछिल्ला चार खेलमा अपराजित छ । मोर्गनको कप्तानी र युवा खेलाडीको उच्च प्रदर्शनमा फाइनलमा स्थान बनाएको हो । कोलकतालाई फाइनलमा पुर्याउन युवा ओपनर सुभमन गिल र वेंकटेश ऐर नायक बन्दै आएका छन् ।

आधा सिजनपछि मौका पाएका ऐर कोलकता मुख्य हतियार बन्दै आएका छन् । बायाँ हाते ओपनर ऐरले ९ खेलमा ३ अर्धशतक सहित ३ सय २० रन बनाएका छन् । मध्यगतिमा बलिङ पनि गर्ने गर्दछन् । गिलले ४ सय २७ रन बनाएका छन् । दिल्लीलाई क्वालिफायरमा हराउन गिल र ऐरले पहिलो विकेटका लागि ९६ रनको साझेदारी गरेका थिए । तर कोलकता मध्यक्रम र तल्लोक्रम भने अपेक्षा अनुसार चल्न सकेको छैन । नितिश राणा र राहुल त्रिपाठीलाई ठूलो इनिङ खेल्न आवश्यक देखिन्छ । कप्तान ओईन मोर्गनबाट कोलकता कप्तानी इनिङ चाहन्छ । सुनिल नारायण टोलीको नायक बन्न सक्छन् । स्पिन र ब्याटिङ दुबैमा खेल जिताउन सक्छन् ।

लोकी फर्गुसन र शिवम माभी तीव्र गतिका बलिङ हतियार हुन् । स्पिनर नारायण र बरुणचक्रवर्ती छन् । सकिब अल हसन खेल्ने वा नखेल्ने अन्यौल छ । आइतबार टि२० विश्वकपमा बंगलादेशले स्कटल्यान्डविरुद्ध ओमानको अलअमरेतमा खेल्दैछ । मोर्गनको कप्तानी, उत्कृष्ट पूनरागमन र उच्च मनोबलमा रहेको कोलकता च्याम्पियन बन्न चाहन्छ ।

हेड टु हेड :

चेन्नई र कोलकताबीच कुल २५ खेल भएका छन् । चेन्नई १६ खेलमा विजयी हुँदा ८ खेलमा पराजित भएको छ । यस सिजनको लिगमा चेन्नई दुबै खेलमा विजयी भएको थियो । चेन्नई पहिलो खेलमा १८ रन र दोस्रो खेलमा २ विकेटले विजयी भएको थियो । पछिल्ला पाँच खेलमा चेन्नई चार खेलमा विजयी हुँदा १ खेलमा पराजित भएको थियो ।

आइपिएलमा यी दुई टोलीको इतिहास

आइपिएलमा चेन्नईले तीन र कोलकताले दुई पटक उपाधि जितेका छन् । चेन्नईको धोनी र कोलकता गौतम गम्भीरले उपाधि जिताएका थिए । कोलकता र चेन्नईबीच फाइनल २०१२ मा भएको थियो । कोलकताले चेन्नईलाई ५ विकेटले पराजित गर्दै उपाधि जितेको थियो । २०१४ मा पन्जाब किंग्सलाई ३ विकेटले पराजित गर्दै उपाधि जितेको थियो । कोलकता फाइनलमा पुगेको दुबै उपाधि जितेको छ ।

चेन्नईले २०१० मा मुम्बई इन्डियन्सलाई २२ रनले पराजित गर्दै पहिलो पटक च्याम्पियन बनेको थियो । २०११ मा चेन्नईले बेंगलोरलाई ५८ रनले पराजित गर्दै लगातार उपाधि जितेको थियो । २०१८ मा हैदराबादलाई ८ विकेटले पराजित गर्दै चेन्नई तेस्रो पटक च्याम्पियन बनेको थियो । चेन्नई २००८, २०१२, २०१३, २०१५ र २०१९ मा उपविजेता बनेको थियो ।