एजेन्सी – ओपनर फाफ डु प्लेसिसको उत्कृष्ट ब्याटिङसँगै चेन्नई सुपर किंग्सले इन्डियन प्रिमियर लिग (आइपिएल) २०२१ को फाइनलमा कोलकता नाइट राइडर्सलाई १ सय ९३ रनको विशाल विजयी लक्ष्य दिएको छ ।

दुबईमा टस हारेर ब्याटिङको निम्तो पाएको चेन्नईले निर्धारित २० ओभरमा ३ विकेट गुमाउँदै १ सय ९२ रन बनायो । चेन्नईका ओपनर फाफ डु प्लेसिसले ५९ बलमा ७ चौका र ३ छक्का सहित सर्वाधिक ८६ रनको योगदान दिए । मोईन अली २० बलमा २ चौका र ३ छक्का सहित ३७ रनमा अविजित रहे ।

चेन्नईलाई ओपनर ऋतुराज गायकवाड र डु प्लेसिसले पहिलो विकेटका लागि ८.१ ओभरमा ६१ रनको साझेदारी गर्दै राम्रो सुरुवात दिलाएका थिए । ऋतुराजलाई स्पिनर सुनिल नारायणले शिवम माभीबाट ३२ रनमा क्याच गराउँदै साझेदारी तोडेका थिए । ऋतुराजले २७ बलमा ३ चौका र १ छक्का प्रहार गरे ।

त्यसपछि क्रिजमा आएका अनुभवी ब्याटर रोबिन उथप्पाले १५ बलमा ३ छक्का सहित ३१ रन जोड्दै आउट भएका थिए । उनी नारायणको बलमा एलबीडब्लू आउट भएका थिए । तेस्रो विकेटका लागि मोईन अली र फाफ डु प्लेसिसले ६८ रनको साझेदारी गदै विशाल योगफलमा पुर्याएका थिए । डु प्लेसिस अन्तिम बलमा क्याच आउट भएका थिए ।

कोलकता स्पिनर सुनिल नारायणले ४ ओभरमा २६ रन खर्चेर २ विकेट लिए । शिवम माभीले १ विकेट लिए ।