काठमाडौं (हाम्रो खेलकुद) – नेपाली राइनोजले टु एक्स युएसए कप क्रिकेटमा हाउस्टन स्पार्कस्विरुद्ध अहिले भइरहेको फाइनलको पहिलो इनिङमा ३ विकेट गुमाएर ७३ बनाएको छ । कप्तान पारस खड्का २३ र पृथु बास्कोटा १ रनमा अविजित छन् । दोस्रो इनिङमा उनीहरुले त्यहिबाट ब्याटिङ अघि बढाउने छन् ।

२० ओभरको खेल टेस्ट क्रिकेटको पद्धतीमा खेलाइएको छ । अब हाउस्टनले १० ओभर ब्याटिङ गर्नेछ । दुवै टोलीले दुई इनिङ ब्याटिङ गर्नेछन् । हाउस्टनले टस जितेर नेपाली राइनोजलाई ब्याटिङका लागि आमन्त्रण गरेको थियो । अघिल्लो दिन अर्धशतक बनाएका ज्ञानेन्द्र मल्ल ४ रन र शरद भेषाकर २ रन बनाएर आउट भएपछि नेपाली राइनोज दबाबमा परेको थियो । अमेरिकामा लगातार उच्च प्रदर्शन गरिरहेका अर्का ओपनर सुवासलाई पारस खड्काले राम्रो साथ दिएपछि टोलीको इनिङ उकासिएको थियो । सुवास पहिलो १० औं ओभरमा आउट भएका थिए । सुवासले ३२ रन बनाएका थिए ।
अघिल्लो दिन फ्लोरिडा अन्डरडग्सलाई ७ विकेटले हराउँदै नेपाली राइनोजले फाइनलमा स्थान बनाएको थियो । अर्को सेमिफाइनलमा हाउस्टन युएइ फाल्कोन्सलाई ७ विकेटले नै हराएको थियो । हास्टनमा पाकिस्तानी क्रिकेट टोलीका पूर्व खेलाडी कमरान अकमल,सइद अजमल पनि छन् ।